პანდემიის მიუხედავად შთამბეჭდავი კლინიკური კვლევები: ევროპის ონკოლოგიური კონგრესი ESMO 2021

მთელ მსოფლიოში ონკოლოგიის პროფესიონალების შემკრები ორი დიდი კონგრესიდან ერთ-ერთი, ევროპის ონკოლოგიური კონგრესი 2021, გასული წლის შემდეგ წელსაც COVID-19-ის პანდემიის გამო ვირტუალურად იმართება. ღონისძიება 17-21 სექტემბერს ტარდება.

ევროპის სამედიცინო ონკოლოგიის საზოგადოება (European Society for Medical Oncology, ESMO) 1975 წელს დაარსების შემდეგ ევროპის და მთელი მსოფლიოს ონკოლოგიური კვლევების მხარდაჭერის მისიას ასრულებს.

წელს უკვე მეორედ ვირტუალურად ჩასატარებელი კონგრესი, არსებული ჯანდაცვის კრიზისისა და სამედიცინო კვლევებზე მისი გავლენის მიუხედავად, ონკოლოგიური კვლევების გამოცოცხლებას ადასტურებს. ეს ძალიან მნიშვნელოვანია, რადგან პანდემიამ და იძულებითმა ჩაკეტვებმა კლინიკურ კვლევებზე ღრმა გავლენა მოახდინა.

ESMO 2021-ზე გამორჩეული სამკურნალო მიღწევები

წელს ESMO 2021-ზე გინეკოლოგიურ (ქალებისთვის სპეციფიკურ) და კუჭ-ნაწლავის კიბოებში იმუნოთერაპიის სულ უფრო მზარდი როლი წარდგენილი კლინიკური მონაცემების მთავარი მახასიათებელია.

კონგრესზე წარსადგენი კლინიკური მონაცემების უმეტესი ნაწილი კიბოს სხვადასხვა ტიპში იმუნური საკონტროლო წერტილის ინჰიბიტორების კლასის იმუნოთერაპიების როლზეა ორიენტირებული.

ბოლო წლებში ფილტვის კიბოს, მელანომისა და ძუძუს კიბოს მსგავს ზოგ კიბოში მოლეკულური დახასიათების (გენეტიკური კლასიფიკაციის) და მკურნალობის მხრივ მრავალ მნიშვნელოვან მიღწევას შევესწარით.

ESMO 2021 კონგრესი მეზოთელიომის, სარკომისა და უცნობი პირველადი კერის კარცინომის (CUP) მქონე პაციენტებისთვის შთამბეჭდავი შედეგებით ყველა ტიპის სიმსივნის უფრო ფართო მოლეკულური დახასიათების (გენეტიკური ტესტის) საჭიროებას ნათელს მოჰფენს. ბიომარკერების აღმოჩენისა და გაგების მიღწევების წყალობით ახლა მომავლისკენ გახედვის დროა. მართლაც, ამაღელვებელია იმის გაგება, როგორ გააუმჯობესებს გუშინ წარმოუდგენელი ჭკვიანი პრეპარატების გამოყენება სარკომასა და იშვიათ კიბოებში ეფექტიანობას.

ESMO 2021 ასევე იქნება ადრეული სტადიის ფილტვის კიბოსა და მელანომაში ოპერაციის შემდგომი დამცავი მკურნალობისთვის იმუნოთერაპიის მიღების კონგრესი.

ბოლოს, ეს იქნება ძუძუს კიბოში დიდი ინტერესით მოსალოდნელი საერთო გადარჩენის მონაცემებისა და ფილტვის კიბოში ახალი იმედის მომცემი სამიზნეებისა და იმუნური მკურნალობების კონგრესი.

ყველაზე საყურადღებო 2 კვლევა შემდეგია:

• მაღალი რისკის II სტადიის მელანომისსრული ქირურგიული მოცილების შემდეგ pembrolizumab-ის (Keytruda) ადიუვანტურ გამოყენებას პლაცებოს შემადარებელი კვლევა KEYNOTE-716 და
• IB-IIIA სტადიის არაწვრილუჯრედოვან ფილტვის კიბოშიადიუვანტური ქიმიოთერაპიის შემდეგ საუკეთესო მხარდამჭერ მზრუნველობასა და atezolizumab-ის (Tecentriq) იმუნოთერაპიას შემადარებელი IMpower010 კვლევის ანალიზი.

სხვა გამორჩეული თემებია:

• მკურნალობისადმი რეზისტენტული, რეციდივირებული ან მეტასტაზური სერვიქსის (საშვილოსნოს ყელის) კიბოსთვის pembrolizumab + ქიმიოთერაპიასა და პლაცებო + ქიმიოთერაპიას შემადარებელი III ფაზის KEYNOTE-826 კვლევის შედეგები,
• შორს წასული კუჭის კიბოს/გასტროეზოფაგური შეერთების კიბოს/საყლაპავის ადენოკარცინომის პირველი ხაზის მკურნალობაში nivolumab (Opdivo) + ქიმიოთერაპიის ან ipilimumab-ის (Yervoy) ქიმიოთერაპიასთან შემადარებელი CheckMate 649 კვლევის შედეგები,
• KRASG12C მუტაციის დადებითობის მქონე კოლორექტალური კიბოს პაციენტებისთვის adagrasib-ის (MRTX849, Mirati Therapeutics) მონოთერაპიის ან cetuximab-თან კომბინაციის 1/2 ფაზის კვლევა KRYSTAL-1-დან მიღებული შედეგები,
• ავთვისებიანი პროგრესირებადი ფეოქრომოციტომებისა და პარაგანგლიომების პირველი საერთაშორისო რანდომიზებული კვლევა, რომელიც Sunitinib-ს (Sutent) პლაცებოს ადარებს, FIRSTMAPPP-დან მიღებული მონაცემები,
• მაღალი რისკის არამეტასტაზური პროსტატის კიბოს მქონე მამაკაცებში მხოლოდ ანდროგენების დათრგუნვის თერაპიის (ADT) აბირატერონის აცეტატთან + პრედნიზოლონთან შემადარებელი (ენზალუტამიდით ან მის გარეშე)  STAMPEDE პროტოკოლის გაერთიანებული ანალიზი,
• აბირატერონის აცეტატით + პრედნიზონით საერთო გადარჩენის შემსწავლელ 3 ფაზის კვლევა PEACE-1-ში ჩარიცხულ, მანამდე უმკურნალო შორს წასული კასტრაციისადმი მგრძნობიარე პროსტატის კიბოს მქონე მამაკაცებში მიღებული შედეგები.

კიბოს პაციენტების COVID-19-ის წინააღმდეგ ვაქცინაცია

გასულ წელს კონგრესის კიდევ ერთი მთავარი თემა COVID-19-ის პანდემიის გავლენა იყო კიბოს პაციენტებზე. წელს კიბოს პაციენტებზე COVID-19-ის პანდემიის გავლენის მონაცემებთან ერთად ვიხილავთ COVID-19-ის ვაქცინის გავლენის შედეგებს პაციენტებსა და მათ მკურნალობებზე. მაგალითად, TRACERx Renal კვლევის CAPTURE ქვეკვლევა შეისწავლის SARS-CoV-2 ინფექციის წინააღმდეგ ადაპტურ იმუნიტეტსა და კიბოს პაციენტებში ვაქცინაციას.

იმავე სესიაზე წარდგენილი იქნება სოლიდური (ორგანოთა) კიბოსთვის ქიმიოთერაპიის, იმუნოთერაპიის ან ქიმიოიმუნოთერაპიის მიმღები პაციენტების SARS-CoV-2-ის წინააღმდეგ ვაქცინაციასთან დაკავშირებული VOICE კვლევის მონაცემები.

ESMO 2021-ს ყურადღებით მივადევნებთ თვალს და კვლევების რიცხობრივ შედეგებსა და ჩვენს კომენტარებს გაგიზიარებთ.