ამცირებს თუ არა ბოჭკოებით მდიდარი კვება ნაწლავის კიბოს რისკს?

მრავალი წლის განმავლობაში ჩატარებული კვლევების შედეგების მიხედვით, ბოჭკოებით მდიდარი კვება, აქამდე ცნობილი მრავალი სარგებლის გარდა, მსხვილი ნაწლავის კიბოსგან დაცვასაც უწყობს ხელს. ამ კავშირში განსაკუთრებით ეფექტურია მარცვლეულსა და სრულმარცვლოვან პროდუქტებში შემავალი ბოჭკოები.

ბოჭკო, სხვაგვარად საკვები უჯრედისი, მცენარეების ის ნაწილია, რომელსაც ჩვენი ორგანიზმი ვერ ითვისებს. ის ძირითადად გვხვდება ხილში, ბოსტნეულში, მარცვლეულსა და პარკოსნებში. ბოჭკოების არსებობს 2 ტიპი: წყალში ხსნადი და უხსნადი. ხსნადი ბოჭკოები ამცირებს ქოლესტერინს, ხელს უწყობს სისხლში შაქრის დონის რეგულირებას და სასარგებლოა წონის კონტროლისთვის. ამგვარად, ისინი ასევე ამცირებს გულის დაავადებების რისკს. ხსნადი ბოჭკოებით მდიდარი საკვებია პარკოსნები, შვრიის ფაფა, ქატოიანი შვრია, ქერი და ხილი. უხსნადი ბოჭკოები ხელს უწყობს ნაწლავის ფუნქციების მოწესრიგებასა და ყაბზობის თავიდან აცილებას და უხვად გვხვდება ხორბალში, მწვანე ბოსტნეულსა და ხილის კანში. გარდა ამისა, ბოჭკოები ხელს უწყობს ისეთი პრობლემებისგან დაცვას, როგორიცაა დივერტიკულური ნაწლავის დაავადება, გაღიზიანებული ნაწლავის სინდრომი, ჰემოროიდები (ბუასილი), ნაღვლის ბუშტის კენჭები და კუჭის თიაქარი. ბოჭკოებით მდიდარი კვების ამდენი სარგებლის გარდა, წლების განმავლობაში იკვლევენ იმასაც, არის თუ არა ის დაკავშირებული ნაწლავის კიბოსგან დაცვასთან.

1970-იან წლებში, იმ ფაქტზე დაყრდნობით, რომ სოფლის მცხოვრებ აფრიკელებში, რომელთა კვებაშიც ბოჭკოებით მდიდარი საკვები ჭარბობდა, ნაწლავის კიბო უფრო იშვიათად გვხვდებოდა, მიიჩნიეს, რომ ბოჭკოები ნაწლავის კიბოს რისკს ამცირებდა და ამ საკითხზე კვლევები დაიწყო. 10 წლის წინ ჩატარებული კვლევები მიუთითებდა, რომ ბოჭკოები ამ მხრივ ეფექტური არ იყო, თუმცა ბოლო წლებში ჩატარებული სანდო კვლევები მხარს უჭერს მოსაზრებას, რომ ბოჭკოები ნაწლავის კიბოს რისკს ამცირებს. განსაკუთრებით ბოლო პერიოდში ინგლისურ სამედიცინო ჟურნალში, “British Medical Journal”-ში, გამოქვეყნებულ კვლევაში მიღებულმა შედეგებმა დაადასტურა ეს მოსაზრება, განსაკუთრებით მარცვლეულსა და სრულმარცვლოვან პროდუქტებში შემავალი ბოჭკოების შემთხვევაში.

ეს კვლევა ჩატარდა ბოლო წლებში ამ საკითხზე გამოქვეყნებული 25 ცალკეული კვლევის მონაცემების შეგროვებისა და ანალიზის გზით. კვლევაში შეისწავლეს არა მხოლოდ ის, ამცირებს თუ არა ზოგადად ბოჭკოები ნაწლავის კიბოს რისკს, არამედ სხვადასხვა საკვებში არსებული ბოჭკოების ტიპების გავლენაც ამ კავშირზე. საბოლოოდ დადგინდა, რომ მარცვლეულსა და სრულმარცვლოვან პროდუქტებში შემავალი ბოჭკოები ამცირებს ნაწლავის კიბოს რისკს, თუმცა ხილში, ბოსტნეულსა და პარკოსნებში არსებული ბოჭკოები ასეთ გავლენას არ ახდენს.

შედეგად, ბოჭკოებით მდიდარი საკვები, მრავალი სარგებლის გარდა, ასევე ხელს უწყობს ერთ-ერთი ყველაზე ხშირად გავრცელებული კიბოს, მსხვილი ნაწლავის კიბოსგან დაცვას. ამისთვის ყოველდღიურ კვებაში მცირე ცვლილებების შეტანით შეგიძლიათ გაზარდოთ ბოჭკოების წილი და თავიდან აიცილოთ მომავალში წარმოშობილი მრავალი ჯანმრთელობის პრობლემა.