აზიანებს ელექტრონული სიგარეტი ფილტვებს? ელექტრონული სიგარეტის სერია 2

ელექტრონული სიგარეტი იყიდება მტკიცებით, რომ იგი მოწევის შეწყვეტაში დამხმარე საშუალება და სიგარეტის ჯანსაღი ალტერნატივაა. რამდენად ჯანსაღი ალტერნატივაა ელექტრონული სიგარეტი?

ელექტრონული სიგარეტების უმეტესობას კარტრიჯი, ბატარეა და გამფრქვევი აქვს. კარტრიჯი შეიცავს თხევად ხსნარს, რომელსაც გამფრქვევი ათბობს და აორთქლებს. აორთქლების შემდეგ მომხმარებელს მისი ჩასუნთქვა ჩვეულებრივი სიგარეტის მსგავსად შეუძლია. ელექტრონული სიგარეტით მისაღები ნიკოტინის რაოდენობას მომხმარებელი თავად განსაზღვრავს, ზოგი კი ნიკოტინის არმქონე ელექტრონულ სიგარეტს ირჩევს. ელექტრონული სიგარეტი ფართოდ იყიდება როგორც მოწევის შეწყვეტისთვის ეფექტური მოწყობილობა. ექიმები კი ამ მოწყობილობის შესახებ ორ ჯგუფად არიან გაყოფილი.

არის ეს მართლაც შეწყვეტის ჯანსაღი გზა?

ევროპულ რესპირატორულ ჟურნალში (European Respiratory journal) გამოქვეყნებულ კვლევაში ელექტრონული სიგარეტების მოკლევადიანი ეფექტების დადგენას შეეცადნენ. კვლევაში 32 მოხალისე მონაწილეობდა. მათგან 8-ს ადრე არასოდეს მოეწია, ხოლო 24 რეგულარული მწეველი იყო. მოხალისეებიდან 11-ს ფილტვის ნორმალური ფუნქცია ჰქონდა, ხოლო 13-ს ასთმა ან ფილტვის ქრონიკული ობსტრუქციული დაავადება (ფქოდ) აღენიშნებოდა.

მკვლევრებმა სპირომეტრიის ტესტი ჩაატარეს, რათა დაენახათ, რა ხდება ელექტრონული სიგარეტის კვამლის ფილტვებში 10 წუთის განმავლობაში ჩასუნთქვისას. სპირომეტრია ექიმის კაბინეტში ჩატარებული ტესტია ასთმის, ფილტვის ქრონიკული ობსტრუქციული დაავადებისა და სუნთქვაზე მოქმედი გარკვეული მდგომარეობების სადიაგნოსტიკოდ. ფილტვის ქრონიკული დაავადების შესამოწმებელი კვლევების დროს სპირომეტრია ასევე გამოიყენება იმის დასადგენად, რამდენად კარგად მუშაობს ფილტვები. სპირომეტრია ზომავს, რამდენ ჰაერს ჩაისუნთქავთ და რამდენს ამოისუნთქავთ. იგი ასევე ზომავს, რა რაოდენობის ჰაერს რა სიჩქარით ამოისუნთქავთ. საშუალოზე დაბალი სპირომეტრიული მაჩვენებლები მიუთითებს, რომ ფილტვები ისე კარგად არ მუშაობს, როგორც საჭიროა.

შედეგად აღმოჩნდა, რომ ელექტრონული სიგარეტის 10 წუთის განმავლობაში გამოყენება სასუნთქი გზების წინააღმდეგობის დაუყოვნებელ მატებას იწვევდა. კვლევის ძირითადი შედეგები ასეთია:

• არასოდეს მწეველებში 10 წუთმა წინააღმდეგობა მნიშვნელოვნად გაზარდა.
• რეგულარულ მწეველებშიც დადგინდა, რომ ელექტრონული სიგარეტის 10-წუთიანი გამოყენება სასუნთქი გზების წინააღმდეგობას კვლავ მნიშვნელოვნად ზრდიდა.
• ასთმისა და ფქოდ-ისას ერთჯერადმა 10 წუთმა მნიშვნელოვანი მატება არ გამოიწვია.

შედეგად, მკვლევრებმა აღნიშნეს, რომ მონაწილეებში ელექტრონული სიგარეტის გამოყენებასთან დაკავშირებული სასუნთქი გზების წინააღმდეგობის მნიშვნელოვანი ზრდა აღმოაჩინეს და გააფრთხილეს, რომ მოწყობილობამ შესაძლოა დაუყოვნებელი ზიანი გამოიწვიოს.

დაკავშირებული თემები

- ელექტრონული სიგარეტის საქმეს ვხსნით!..

- ახალგაზრდებში ელექტრონული სიგარეტი ვრცელდება; უფრო დიდი საფრთხეა კანაფის მიღება ელექტრონული სიგარეტით. სერია-3.