FDA-მ საკვები დანამატების გამყიდველი 10 კომპანია გააფრთხილა

აშშ-ის სურსათისა და მედიკამენტების ადმინისტრაციამ (FDA), მედიკამენტებისა და კოსმეტიკის შესახებ კანონის (FD&C კანონი) დარღვევით, დეპრესიისა და ფსიქიკური ჯანმრთელობის სხვა დარღვევების სამკურნალოდ საკვები დანამატების გამყიდველი 10 კომპანია გააფრთხილა. მათ შორის არიან Enlifta LLC; Lifted Naturals; Mountain Peak Nutritionals; SANA Group LLC.; Wholesome Wellness; Dr. Garber’s Natural Solutions; ProHealth Inc.; Blossom Nature LLC; FDC Nutrition Inc.; და Silver Star Brands, Inc.

ეს დანამატები დეპრესიისა და ფსიქიკური ჯანმრთელობის დარღვევების სამკურნალოდ იყიდება. თუმცა ისინი მედიკამენტებად დაუმტკიცებელი პროდუქტებია, რომლებმაც მომხმარებლებს შეიძლება ზიანი მიაყენოს. პანდემიის პერიოდში ადამიანები შესაძლოა დეპრესიისადმი უფრო მიდრეკილნი გახდნენ (იხილეთ ონკოლოგიური პაციენტის ფსიქოლოგიური მტრები კორონავირუსის პანდემიის დროს). FDA-ს სურსათის უვნებლობისა და გამოყენებითი კვების ცენტრის საკვები დანამატების პროგრამების ოფისის დირექტორმა Steven Tave-მ განაცხადა, რომ ადამიანების უკანონო დანამატებისგან დასაცავად მოქმედება დაიწყეს.

FD&C კანონის მიხედვით, დაავადების განკურნების, მკურნალობის ან შემსუბუქებისათვის განკუთვნილი პროდუქტები მედიკამენტების ჯგუფს მიეკუთვნება, მაშინაც კი, თუ მათ საკვები დანამატების ეტიკეტი აქვთ. ამიტომ მათზე მედიკამენტებისათვის მოქმედი მოთხოვნები ვრცელდება. FDA-ს მიერ დამტკიცებული მედიკამენტებისგან განსხვავებით, ამ პრეპარატების შესაბამისი დოზა, დანიშნულებისათვის ვარგისიანობა, სხვა მედიკამენტებთან ურთიერთქმედება და გვერდითი მოვლენები შეფასებული არ არის.

მომხმარებლებმა, ზოგადად, სიფრთხილე უნდა გამოიჩინონ დაავადებების პრევენციის, შემსუბუქების ან განკურნების მიზნით გაყიდული პროდუქტების მიმართ. FDA ნებისმიერი საკვები დანამატისა თუ მედიკამენტის გამოყენებამდე ექიმის, ფარმაცევტის ან ჯანდაცვის სხვა სპეციალისტის დახმარების მიღებას გირჩევთ. ზოგიერთი დანამატი შეიძლება მედიკამენტებთან ან სხვა დანამატებთან ურთიერთქმედებდეს. ამასთან, თუ განცხადებები იმდენად კარგად ჟღერს, რომ დაუჯერებელია, სავარაუდოდ, ასეც არის. თუ მომხმარებელი ფიქრობს, რომ პროდუქტმა შეიძლება რეაქცია ან დაავადება გამოიწვიოს, მან დაუყოვნებლივ უნდა შეწყვიტოს მისი გამოყენება და ექიმს დაუკავშირდეს.

FDA-მ აღნიშნულ კომპანიებს მოსთხოვა, წარედგინათ თავიანთი არგუმენტები იმის შესახებ, თუ რატომ ფიქრობენ, რომ კანონის მოთხოვნები არ დაურღვევიათ. დარღვევების დაუყოვნებლივ გამოუსწორებლობას შეიძლება მოჰყვეს სამართლებრივი ზომები, მაგალითად, პროდუქტების კონფისკაცია.

FDA, რომელიც აშშ-ის ჯანმრთელობისა და ადამიანური მომსახურების დეპარტამენტის უწყებაა, საზოგადოებრივ ჯანმრთელობას იცავს ადამიანებისა და ცხოველებისათვის განკუთვნილი მედიკამენტების, ვაქცინების, სხვა ბიოლოგიური პროდუქტებისა და სამედიცინო მოწყობილობების უსაფრთხოებისა და ეფექტიანობის უზრუნველყოფით. ის ასევე პასუხისმგებელია სურსათის, კოსმეტიკის, საკვები დანამატების, ელექტრონული გამოსხივების გამომყოფი პროდუქტებისა და თამბაქოს ნაწარმის რეგულირებაზე.