იწვევს თუ არა Covid-ის ვაქცინები უნაყოფობას ან მუცლის მოშლას?

Covid-19-ის ვაქცინები უნაყოფობას და მუცლის მოშლას იწვევსო — ასეთი მტკიცებები ყველა საწინააღმდეგო სამეცნიერო მტკიცებულების მიუხედავად კვლავ ვრცელდება ინტერნეტში. მრავალი ექსპერტი ორსულობისას Covid-19-ის ვაქცინის რეკომენდაციაში დაჟინებულია, თუმცა არიან ნეიტრალურად განწყობილებიც და ისინი, ვინც ვაქცინისგან თავის შეკავებას ურჩევს. მაგრამ Covid-19-ის ვაქცინების „უსაფრთხოების“ შესახებ იმდენი მონაცემი დაგროვდა, რომ თავშეკავება ახლა აქტიურ „ვაქცინაციის წახალისებად“ გადაიქცა. უკვე ცნობილია, რომ თვით Covid-ს შეუძლია ორსულობა რისკის ქვეშ დააყენოს.
უნაყოფობასა და მუცლის მოშლაზე ზოგიერთი მტკიცება და მიზეზები, თუ რატომ არის ისინი მცდარი
კვლევის მიხედვით, Covid-ის ვაქცინა საკვერცხეებში გროვდება — არასწორია!
ეს მტკიცება ერთი კვლევის არასწორი ინტერპრეტაციიდან მომდინარეობს. კვლევაში ვირთხებს ადამიანისთვის განკუთვნილზე ბევრად მაღალი დოზის ვაქცინა მისცეს (1333-ჯერ მეტი). ინექციიდან 48-ის შემდეგ მთლიანი დოზის მხოლოდ 0,1% დაგროვდა ცხოველების საკვერცხეებში. გაცილებით მეტი (ერთი საათის შემდეგ 53% და 48 საათის შემდეგ 25%) ინექციის ადგილზე აღმოჩნდა (ადამიანებში, ჩვეულებრივ, მკლავზე). შემდეგი ყველაზე გავრცელებული ადგილი ღვიძლი იყო, რომელიც სისხლიდან ნარჩენი პროდუქტების მოცილებას ეხმარება (48 საათის შემდეგ 16%).
BioNTech -ის მსგავსი mRNA ვაქცინები ორგანიზმის იმუნური სისტემის გამააქტიურებელი ვირუსის გენეტიკური მასალის შემცველი ცხიმოვანი ბუშტუკის (ლიპიდური ნანონაწილაკის) გამოყენებით შეჰყავთ. ამიტომ ზოგიერთი ადამიანი მცდარად ასკვნის, რომ ვაქცინა ცხიმოვან ქსოვილში გროვდება. ლიპიდური ნანონაწილაკის დანიშნულება ვაქცინის შიგთავსის ცხიმოვან ქსოვილში დაგროვება კი არა, სისხლის მიმოქცევით ადვილად გადატანა და უჯრედების მემბრანაში ადვილად გავლაა.
აცრილებზე დაკვირვებით მიღებული მონაცემები აჩვენებს, რომ ვაქცინები მუცლის მოშლას იწვევს — არასწორია!
აცრის შემდეგ ნებისმიერ პერიოდში მუცლის მოშლა არ ნიშნავს, რომ მისი მიზეზი ვაქცინაა. უფრო დეტალურად, ვაქცინით მუცლის მოშლის გამოწვევის საჩვენებლად უნდა შედარდეს აცრილი და აუცრელი ორსული ქალების ჯგუფებში მუცლის მოშლის მაჩვენებლები. თუ სხვაობა არ არის, მუცლის მოშლის რისკი ვაქცინას ვერ მიეწერება. ჩატარებული კვლევების შედეგებიც სწორედ ასეთია.
ერთ კვლევაში აღმოჩნდა, რომ აცრილებში მუცლის მოშლის მაჩვენებელი მოსახლეობაში მოსალოდნელ 12,5%-ს შეესაბამებოდა. Imperial College London-ის რეპროდუქციული იმუნოლოგიის სპეციალისტი, დოქტორი Victoria Male, ამბობს, რომ ასეთი შეტყობინების სისტემები ძალიან კარგია ვაქცინის იმ გვერდითი ეფექტების გამოსავლენად, რომლებიც მოსახლეობაში, ჩვეულებრივ, იშვიათია.
მენსტრუალური ციკლის ცვლილებები, მუცლის მოშლა და გულის პრობლემები მოსახლეობაში ისედაც გავრცელებული მდგომარეობებია; ამიტომ ასეთი არასასურველი მოვლენების ვაქცინებისთვის მიწერა სიფრთხილეს მოითხოვს. მონაცემებში ამ მდგომარეობების დანახვა შეშფოთებას არ იწვევს, რადგან ისინი აცრის გარეშეც მოსალოდნელია. შეშფოთება და დაუყოვნებლივი კვლევა მხოლოდ მაშინ არის საჭირო, თუ ეს მონაცემები აუცრელებში არსებულზე გაცილებით მეტ მუცლის მოშლის შემთხვევას შეესაბამება — ამჟამად კი ასეთი მდგომარეობა არ არის.
ზოგიერთმა ადამიანმა წარმოადგინა გრაფიკებიც, რომლებიც სხვა ვაქცინებისა და წამლების შესახებ წარსულ წლებში შეტყობინების გამკეთებელთა რაოდენობის მკვეთრ ზრდას აჩვენებდა. ეს გამოიყენებოდა იმის მისანიშნებლად, რომ Covid-ის ვაქცინა ნაკლებად უსაფრთხოა. თუმცა ზრდა ამას არ გვეუბნება.
ვაქცინებმა შეიძლება პლაცენტას შეუტიოს — მტკიცებულება არ არსებობს!
სამეცნიერო მკვლევარ Micheal Yeadon-ის ფართოდ გავრცელებულ წერილში, რომელიც Covid-ზე სხვა შეცდომაში შემყვან განცხადებებსაც აკეთებდა, Yeadon ამტკიცებდა, რომ Pfizer-ისა და Moderna-ს ვაქცინებში არსებული კორონავირუსის სპაიკცილა ჰგავს პლაცენტის წარმოქმნაში მონაწილე სინციტინ-1 ცილას. მან ივარაუდა, რომ ამის გამო ვირუსის საწინააღმდეგო ანტისხეულებს შესაძლოა განვითარებადი ორსულობისთვისაც შეეტია. ზოგი ექსპერტი მიიჩნევს, რომ სწორედ ეს არის Covid-ის ვაქცინების მიერ ნაყოფიერების დაზიანების შესახებ ყველა წარმოდგენის ძირითადი წყარო.
სინამდვილეში, სინციტინ-1 და კორონავირუსის სპაიკცილა ერთმანეთს იმდენადვე ჰგავს, როგორც შემთხვევით შერჩეული ნებისმიერი ორი ცილა. ორგანიზმი ასე ადვილად რომ ირეოდეს, ყოველი ინფიცირებისა და ანტისხეულების გამომუშავებისას საკუთარი ორგანოების წინააღმდეგ შეტევის რისკის წინაშე იქნებოდა.
ამ მტკიცებებზე სწორი პასუხის საპოვნელად აშშ-ის მეანმა Randy Morris-მა ინ-ვიტრო განაყოფიერების მკურნალობის მიმღებ პაციენტებზე დაკვირვება დაიწყო, რათა ენახა, განსხვავდებოდა თუ არა წარმატებული ორსულობის ალბათობა ვაქცინაციის სტატუსის მიხედვით. დოქტორ Morris-ის კვლევაში მონაწილე 143 პირს შორის აცრილ, აუცრელ და ადრე ინფიცირებულ ქალებს ემბრიონის წარმატებული იმპლანტაციისა და ორსულობის გაგრძელების დაახლოებით თანაბარი ალბათობა ჰქონდათ.
დოქტორმა Morris-მა აღნიშნა, რომ ამ შიშების გამავრცელებლები არ ხსნიან, რატომ სჯერათ, რომ ვაქცინის მიმართ წარმოქმნილი ანტისხეულები ნაყოფიერებაზე უარყოფითად მოქმედებს, ბუნებრივი ინფექციით წარმოქმნილი იგივე ანტისხეულები კი — არა.
Covid-ის ვაქცინა სპერმატოზოიდების რაოდენობას ამცირებს — პირიქით!
2021 წლის 17 ივნისს ავტორიტეტულ სამედიცინო ჟურნალ JAMA-ში გამოქვეყნებულ კვლევაში, რომელიც COVID-19-ის mRNA ვაქცინის 2 დოზამდე და შემდეგ სპერმის პარამეტრებს შეისწავლიდა, აცრილ მამაკაცებში სპერმის არცერთი პარამეტრი არ შემცირებულა. ვინაიდან ვაქცინები ცოცხალ ვირუსს კი არა, mRNA-ს შეიცავს, ნაკლებად სავარაუდოა მათი გავლენა სპერმის პარამეტრებზე. შედეგებმა ყველა პარამეტრში სტატისტიკურად მნიშვნელოვანი „ზრდაც“ კი აჩვენა, თუმცა ცვლილების სიდიდე ნორმალური ინდივიდუალური ვარიაციის ფარგლებში იყო. ასევე, ზრდა შესაძლოა მეორე ნიმუშის აღებამდე თავშეკავების გახანგრძლივებული პერიოდით ყოფილიყო გამოწვეული.
წყაროები
2. S. Rachel. Covid vaccine: Fertility and miscarriage claims fact-checked. (11.08.2021). Covid vaccine: Fertility and miscarriage claims fact-checked. BBC News: https://www.bbc.com/news/health
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.