კანის კიბოს, მელანომის, 3. სტადიის სამკურნალოდ პემბროლიზუმაბმა FDA-ის დამტკიცება მიიღო

2019 წლის 15 თებერვალს აშშ-ის სურსათისა და წამლის ადმინისტრაციამ (FDA) ლიმფური კვანძების ჩართვის მქონე კანის კიბოს — ავთვისებიანი მელანომისმქონე პაციენტებში, სიმსივნის ქირურგიულად სრულად ამოკვეთის შემდეგ, ადიუვანტურ მკურნალობად დაამტკიცა იმუნოთერაპიული პრეპარატი პემბროლიზუმაბი(Keytruda).
დამტკიცება ეფუძნება EORTC1325 / KEYNOTE-054 კლინიკური კვლევების შედეგებს 1019 პაციენტში, რომლებსაც IIIA (> 1 mm მეტასტაზი ლიმფურ კვანძში), IIIB ან IIIC სტადიის მელანომა ქირურგიულად სრულად ჰქონდათ ამოკვეთილი. ლორწოვანის ან ოკულარული (თვალის) მელანომის მქონე პაციენტები კვლევაში არ მონაწილეობდნენ. პაციენტები შემთხვევითად (1:1 თანაფარდობით) ორ ჯგუფად განაწილდნენ: ერთი ჯგუფი ყოველ სამ კვირაში 200 mg პემბროლიზუმაბს იღებდა, ხოლო მეორე — პლაცებოს . იგეგმებოდა მკურნალობის გაგრძელება 1 წლამდე, დაავადების განმეორებამდე ან მიუღებელი ტოქსიკურობის (გვერდითი ეფექტის) განვითარებამდე.
კვლევების პირველადი საბოლოო მაჩვენებელი იყო რეციდივის (განმეორების) გარეშე გადარჩენა (relaps free survival, RFS) .
პემბროლიზუმაბის მიმღები პაციენტების 26 %-ში, ხოლო პლაცებოს მიმღები პაციენტების 43 %-ში განვითარდა რეციდივი და ეს განსხვავება ძალიან მნიშვნელოვანი აღმოჩნდა. სიმსივნის PD-L1 დადებითობისგან დამოუკიდებლად, პემბროლიზუმაბის შემთხვევაში პლაცებოსთან შედარებით რეციდივის გარეშე გადარჩენის სარგებელი გამოვლინდა. პლაცებოს ჯგუფში რეციდივის გარეშე გადარჩენის მედიანური დრო 20.4 თვე იყო, ხოლო პემბროლიზუმაბის მიმღებ პაციენტებში მედიანურ RFS-ს ჯერ ვერ მიაღწიეს, რადგან ნახევარზე მეტს რეციდივი არ ჰქონდა. პაციენტების 76 % პემბროლიზუმაბს 6 თვის ან მეტი ხნის განმავლობაში იღებდა.
გვერდითი ეფექტების გამო პემბროლიზუმაბი პაციენტების 14 %-ში შეწყდა. პემბროლიზუმაბით ნამკურნალები პაციენტების სულ მცირე 10 %-ში ყველაზე ხშირად აღწერილი გვერდითი ეფექტები იყო დიარეა, ქავილი, გულისრევა, სახსრების ტკივილი, ჰიპოთირეოზი (ფარისებრი ჯირკვლის ჰორმონის ნაკლებობა), ხველა, გამონაყარი, ასთენია (უძლურება, სისუსტე), გრიპის მსგავსი დაავადება, წონის კლება და ჰიპერთირეოზი (ფარისებრი ჯირკვლის ჰორმონის სიჭარბე).
მელანომის ადიუვანტური მკურნალობისთვის პემბროლიზუმაბის რეკომენდებული დოზაარის 200 mg, რომელიც ყოველ 3 კვირაში 30-წუთიანი IV ინფუზიით შეჰყავთ, მაქსიმუმ 1 წლის განმავლობაში, დაავადების განმეორებამდე ან მიუღებელი გვერდითი ეფექტის განვითარებამდე.
წყაროები
fda.gov - 15 February 2019
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.