რა არის მალნუტრიცია კიბოს მქონე პაციენტებში? არასაკმარისი კვების პრევენცია და მკურნალობა

კიბო არა მხოლოდ სერიოზული, სიცოცხლისთვის საშიში პრობლემაა, არამედ ფართო გავლენის მქონე მდგომარეობაც, რომელიც პაციენტთა კვებით მდგომარეობასა და ცხოვრების საერთო ხარისხზე უარყოფითად მოქმედებს. საკვები ნივთიერებების დეფიციტმა შეიძლება მნიშვნელოვანი გავლენა მოახდინოს დაავადების განვითარებასა და მკურნალობის ეფექტიანობაზე. ამიტომ კიბოს მქონე პაციენტებში მალნუტრიციის (არასაკმარისი კვების) გაგებასა და პრევენციას სასიცოცხლო მნიშვნელობა აქვს.

მალნუტრიციის მნიშვნელობა კიბოს დროს

კვლევები მიუთითებს, რომ მალნუტრიცია (არასაკმარისი კვება) შეიძლება კიბოს მქონე პაციენტთა 30%-დან 85%-მდე მოიცავდეს და მათში სიკვდილიანობის 10%-დან 20%-მდე განაპირობებდეს.

კიბოს დროს არასაკმარისი კვება დაკავშირებულია:

• მკურნალობის ნაკლებ ვარიანტთან,
• მკურნალობაზე პასუხის შემცირებასთან,
• მკურნალობასთან დაკავშირებული გვერდითი მოვლენების მატებასთან,
• საავადმყოფოში უფრო ხანგრძლივ ყოფნასა და
• დაავადების უარეს მიმდინარეობასთან.

კიბოს მკურნალობის დროს ისეთი გვერდითი მოვლენები, როგორიცაა გულისრევა, ღებინება, დიარეა, გემოს ცვლილება და მადის დაკარგვა, იწვევს პაციენტის არასაკმარის კვებასა და სარკოპენიას (კუნთოვანი მასის დაკარგვას).

ახალი კვლევა

ნიუ-იორკის NYU Langone Perlmutter-ის ონკოლოგიურ ცენტრში ჩატარებული კვლევის მიხედვით, არასაკმარისი კვების ყველაზე მაღალი მაჩვენებლები

• ზედა კუჭ-ნაწლავის ტრაქტის,
• თავისა და კისრის,
• ფილტვის,
• ჰემატოლოგიური (ლეიკემია-ლიმფომა),
• გინეკოლოგიური (ქალებისთვის დამახასიათებელი) და
• კოლორექტალური კიბოს დროს გამოვლინდა.

აშშ-ის კიბოს ეროვნული ინსტიტუტი (US-NCI) რეკომენდაციას იძლევა, პაციენტების კვებითი მდგომარეობა კიბოს მკურნალობის დაწყებამდე შეფასდეს და შეფასებები მთელი მკურნალობის განმავლობაში გაგრძელდეს.

მაშინ, როდესაც ქიმიოთერაპია, რადიოთერაპია და კიბოს სამკურნალო მრავალი პრეპარატი ორგანიზმისთვის კატაბოლურ გვერდით მოვლენებს იწვევს, საკვები და სითხეები ორგანიზმის აღდგენას უწყობს ხელს და მკურნალობის შემდეგი ეტაპისთვის ამზადებს.

მნიშვნელოვანია, კიბოს მქონე პაციენტების კვებით მდგომარეობას რეგულარულად აკვირდებოდეს, იდეალურ შემთხვევაში, „ონკოლოგიური დიეტოლოგი“. ამ მიდგომით უფრო ეფექტიანად შეიძლება:

• მკურნალობასთან დაკავშირებული სიმპტომებისა და ჩივილების მართვა,
• პაციენტებისთვის აქტიური მხარდაჭერის გაწევა ძლიერი და ჯანსაღი სხეულის ქსოვილების შესანარჩუნებლად,
• ენერგიისა და ცილის მიღების შენარჩუნება ან გაუმჯობესება,
• მკურნალობის დაბალი ამტანობის მქონე პაციენტების რისკის შემცირება,
• მეტაბოლური დისბალანსის მინიმუმამდე დაყვანა,

და შედეგად პაციენტთა ცხოვრების ხარისხის გაუმჯობესება.

დასკვნა

კიბოს მქონე პაციენტების კვებითმა მდგომარეობამ შეიძლება მნიშვნელოვანი გავლენა მოახდინოს მკურნალობის წარმატებასა და ცხოვრების საერთო ხარისხზე. ამიტომ საჭიროა არასაკმარისი კვების რისკის ამოცნობა და მისი რაც შეიძლება სწრაფად მართვა. შესაბამისი სამედიცინო კვებითი თერაპიითა და კვების შესახებ განათლებით შეიძლება მკურნალობის ამტანობა გაიზარდოს, ცხოვრების ხარისხი გაუმჯობესდეს და ჯანმრთელობის საერთო შედეგებზე დადებითი გავლენა მოხდეს.