რა არის ტიპი 3C დიაბეტი? რატომ გვხვდება ამ პაციენტებში პანკრეასის კიბო უფრო ხშირად?
ამ სტატიაში
არსებობს დიაბეტის მრავალი სახეობა. ყველაზე ცნობილია ტიპი 1, ტიპი 2 დიაბეტი და ორსულობისას განვითარებული გესტაციური დიაბეტი. ტიპი 3c დიაბეტიბოლოს აღწერილ დიაბეტის ტიპებს შორისაა. პანკრეატოგენურ დიაბეტადაც წოდებული ტიპი 3 c დიაბეტი პანკრეასის კიბოს ადრეული ნიშანი შეიძლება იყოს.
ტიპი 3c დიაბეტი პანკრეასის დაზიანების შემდეგ შეიძლება განვითარდეს. იგი სხვა ტიპებისგან განსხვავდება, თუმცა ნაკლები ცნობადობის გამო ყველაზე ხშირად ტიპი 2 დიაბეტში ერევათ.
რა არის ტიპი 3c დიაბეტი? როგორ ვითარდება?
ინსულინის ფუნქციაა სისხლში არსებული გლუკოზის (შაქრის) უჯრედებში შეღწევისა და ორგანიზმის კვების უზრუნველყოფა. ინსულინი პანკრეასიდან გამოყოფილი, სიცოცხლისთვის აუცილებელი ჰორმონია. მისი დეფიციტისას გლუკოზა უჯრედებში ვეღარ შედის და სისხლში ძლიერ იმატებს. როდესაც პანკრეასი ორგანიზმისთვის საკმარისი ინსულინის გამომუშავებას წყვეტს, ტიპი 3c დიაბეტი ვითარდება.
როგორ ვითარდება ტიპი 3c დიაბეტი?
პანკრეასის დაავადებები ტიპი 3c დიაბეტს იწვევს. მათ შორისაა პანკრეატიტი (პანკრეასის ანთებითი დაავადება), პანკრეასის კიბო, კისტური ფიბროზი და ჰემოქრომატოზი (რკინის დაგროვება / ბრინჯაოს დიაბეტი).
პანკრეასის ოპერაციების შემდეგაც შეიძლება ტიპი 3 c დიაბეტი განვითარდეს.
რა სიმპტომები აქვს ტიპი 3c-ს?
- უნებლიე წონის კლება ერთ-ერთი უმნიშვნელოვანესი სიმპტომია.
- მუცლის ტკივილი
- ძლიერი დაღლილობის შეგრძნება
- დიარეა და ცხიმიანი განავალიც შეიძლება აღინიშნოს.
ტიპი 3c დიაბეტის დიაგნოსტიკა
ტიპი 3c დიაბეტის დიაგნოსტიკის მთავარი სირთულე ცნობიერების ნაკლებობაა. ამიტომ ტიპი 3c-ის მქონე ბევრ პაციენტს არასწორად უსვამენ 2 დიაბეტის დიაგნოზს. პანკრეასის პრობლემებისა და დიაბეტის ერთდროულად არსებობისას უნდა გვახსოვდეს ტიპი3c დიაბეტის შესაძლებლობა.
ტიპი 3c დიაბეტის მკურნალობა
მკურნალობა შეიძლება რთული იყოს, რადგან დაავადება მრავალი მიზეზით ვითარდება და პანკრეასის დაზიანების მიხედვით განსხვავდება. არსებული სახელმძღვანელოების მიხედვით მკურნალობა თავდაპირველად მეტფორმინით უნდა დაიწყოს. თუ სისხლში შაქარი საკმარისად არ მცირდება ან წონის კლება გრძელდება, მკურნალობას ინსულინი უნდა დაემატოს. შესაბამისი დიეტისა და ცხოვრების წესის ცვლილებების ეფექტი, თუმცა სადავოა, სასარგებლო იქნება.
ტიპი 3c დიაბეტისა და პანკრეასის კიბოს კავშირი
პანკრეასის კიბოს ჩვეულებრივ შორსწასულ სტადიაზე ადგენენ. ეს იმით აიხსნება, რომ ადრეულ სტადიებზე იგი თვალსაჩინო სიმპტომებს არ იძლევა. დღემდე კვლევები ძირითადად პანკრეასის კიბოსა და ტიპი 2 დიაბეტის კავშირზე ტარდებოდა. მათი უმეტესობით დამაჯერებელი სამეცნიერო მტკიცებულებები ვერ მიიღეს. ამაში დიდ როლს ასრულებს როგორც პანკრეასის კიბოსა და ტიპი 2 დიაბეტის მეტად რთული კავშირი, ისე ამ კავშირში სიმსუქნის მონაწილეობა.
ესპანეთის კიბოს კვლევის ეროვნულმა ცენტრმა (CNIO) ახლახან კვლევის შედეგები გააზიარა. კვლევაში პანკრეასის კიბოს მქონე ყოველი 4 პაციენტიდან 1-ს (%26) ტიპი 3c დიაბეტი განუვითარდა.
მიიჩნევა, რომ დასავლეთის ქვეყნებში ტიპი 3c დიაბეტის წილი დაახლოებით %5-10-ია. ვინაიდან ხშირად მას არასწორად ტიპი 2 დიაბეტად ადგენენ, შესაძლოა სიხშირე ნავარაუდევზე მაღალი იყოს. ამასთანავე, ტიპი 3c დიაბეტის სწორი დიაგნოზი მეტად მნიშვნელოვანია როგორც შესაბამისი მკურნალობისთვის, ისე პანკრეასის კიბოს ადრეული დიაგნოსტიკის ხელშეწყობისთვის.
წყაროები
2. Relationship Between Type 3c Diabetes and Pancreatic Cancer, The ASCO Post
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.