როგორ მოქმედებს კიბო სქესობრივ ცხოვრებაზე?

სქესობრივი გრძნობები და დამოკიდებულებები ადამიანებს შორის დაავადების გარეშეც მნიშვნელოვნად განსხვავდება. ზოგს კიბოს მკურნალობისას სქესობრივი სურვილი და ენერგია მცირედ ეცვლება ან საერთოდ უცვლელი რჩება. სხვებს კიბოსა და მკურნალობის ფიზიკური და ემოციური ეფექტების გამო სქესობრივი ურთიერთობისადმი ინტერესი უმცირდებათ.

თუ მკურნალობისას სქესობრივი სურვილი და ენერგია იცვლება, გახსოვდეთ, რომ ეს ბუნებრივია და ბევრს ემართება. მიზეზი შეიძლება სტრესი, დაღლილობა ან სხვა გვერდითი მოვლენა იყოს. საკუთარ სხეულთან დამოკიდებულებაც მნიშვნელოვან როლს თამაშობს.

თუ მკურნალობამდე ჯანსაღი სქესობრივი ცხოვრება გქონდათ ან სექსუალობა თქვენთვის მნიშვნელოვანია, მკურნალობისას ფიზიკური სიახლოვებით სიამოვნების გაგრძელება შესაძლებელია. შეიძლება ამ სიახლოვემ ახალი მნიშვნელობა შეიძინოს და პარტნიორის მიმართ დამოკიდებულებაც სხვაგვარი გახდეს. სექსი ნაკლებად მნიშვნელოვანი, ხოლო ჩახუტება, შეხება, ხელის დაჭერა და მოხვევა უფრო მნიშვნელოვანი შეიძლება გახდეს.

მრავალი ფიზიკური და ემოციური ფაქტორის ფონზე ჯანსაღი სქესობრივი ცხოვრების შენარჩუნება შეიძლება რთული იყოს. ექიმისა და სხვა სანდო წყაროებისგან მაქსიმალურად შეიტყვეთ, რისი გაკეთება შეგიძლიათ და რისი — არა მკურნალობამდე, მის დროს და შემდეგ. პარტნიორს გაუზიარეთ თქვენი შეშფოთება და საკუთარი თავის მიმართ გრძნობები.

ცნობილია, რომ სექსუალობასთან დაკავშირებული პრობლემების ორი მესამედი მოკლე შეფასებით, რამდენიმე რეკომენდაციითა და პაციენტისა და პარტნიორისთვის თავდაჯერების მიცემით შეიძლება მოგვარდეს. დარჩენილ მცირე ნაწილს სამედიცინო და ფსიქოლოგიური მხარდაჭერით შეიძლება გაუმკლავდნენ.

კიბო და ფერტილობა — ნაყოფიერება

ორსულობა ზოგჯერ კიბოს მკურნალობის დროსაც შესაძლებელია, თუმცა ზოგმა მკურნალობამ თანდაყოლილი მანკები შეიძლება გამოიწვიოს. ექიმები ხშირად ურჩევენ პაციენტებს კონტრაცეფციას მკურნალობის განმავლობაში და მის შემდეგ გარკვეული პერიოდით.

მკურნალობისას ქალებს მენსტრუაცია შეიძლება არარეგულარული გაუხდეთ ან შეუწყდეთ. ეს ორსულობის შეუძლებლობას არ ნიშნავს, ამიტომ კონტრაცეფცია საჭიროა.

მამაკაცებში მკურნალობამ სპერმატოზოიდების რაოდენობა შეიძლება შეამციროს ან დააზიანოს ისინი. მიუხედავად ამისა, მკურნალობის შემდეგ ნაყოფიერება ხშირად აღდგება.

ბუნებრივია, ღელავდეთ მკურნალობის გავლენაზე თქვენს ნაყოფიერებაზე. კიბოს მსგავსი სიცოცხლეზე ძლიერ მოქმედი დაავადების არსებობა სექსუალობისა და ნაყოფიერების საკითხების მთლიანად უკანა პლანზე გადაწევას არ მოითხოვს. გირჩევთ, მკურნალობის დაწყებამდე ექიმთან კითხვებისა და შიშების განხილვა არ მოგერიდოთ.

ამ სტატიით კიბოს დროს სექსუალობის თემას შევეხეთ შესავლის სახით . შემდეგ სტატიებში ვგეგმავთ სექსუალობისა და ნაყოფიერების საკითხების ცალკე განხილვას ქალი და მამაკაცი პაციენტებისა და სხვადასხვა კიბოსთვის.