Xərçəng cinsi həyata necə təsir edir?

Cinsi hisslər və münasibətlər insanlar arasında xəstə olmasalar belə böyük fərqlər göstərir. Bəzi insanlar xərçəng müalicəsi boyunca cinsi istəklərində və enerji səviyyələrində çox az dəyişiklik yaşayır və ya heç dəyişiklik yaşamırlar. Digərləri xərçəngin və müalicənin fiziki və emosional təsirlərinə görə cinsi əlaqəyə daha az maraq göstərirlər.

Cinsi istəyiniz və enerji səviyyəniz müalicə zamanı dəyişərsə, bunun təbii olduğu və bir çox insanda baş verdiyi unudulmamalıdır. Bu hal stresdən, yorğunluq hissindən və müalicənin digər əlavə təsirlərindən qaynaqlana bilər. Bədəniniz barədə necə hiss etdiyiniz də rol oynaya bilər.

Müalicədən əvvəl sağlam cinsi həyatınız varsa və ya cinsəllik sizin üçün vacibdirsə, müalicə zamanı fiziki yaxınlıqdan zövq almağa davam etmək ehtimalınız var. Bu yaxınlığın yeni məna qazandığını və həyat yoldaşınıza fərqli şəkildə diqqət göstərdiyinizi görə bilərsiniz. Seks daha az əhəmiyyətli olarkən sarılmaq, toxunmaq, əlindən tutmaq və qucaqlaşmaq daha vacib ola bilər.

Bu qədər fiziki və emosional amilin olduğu hallarda sağlam cinsi həyatı qorumaq çətin ola bilər. Müalicədən əvvəl, müalicə zamanı və sonra nələr edə biləcəyinizi və edə bilməyəcəyinizi anlamaq üçün həkiminizdən və digər etibarlı mənbələrdən mümkün qədər çox məlumat alın. Narahatlıqlarınız və özünüz barədə nə hiss etdiyiniz haqqında həyat yoldaşınızla danışın.

Cinsəlliklə bağlı bütün problemlərin üçdə ikisinin qısa qiymətləndirmədən sonra bir neçə tövsiyə ilə xəstəyə və həyat yoldaşına inam aşılanması nəticəsində həll oluna bildiyi məlumdur. Qalan az hissənin isə xəstəyə və həyat yoldaşına tövsiyə ediləcək tibbi və psixoloji dəstəklə öhdəsindən gəlmək olar.

Xərçəngdə fertillik - Nəsilartırma qabiliyyəti

Xərçəng müalicəsi zamanı bəzən hamiləlik mümkündür, lakin bəzi müalicələr doğuş qüsurlarına səbəb ola bilər. Həkimlər tez-tez xəstələrə müalicə boyunca və sonrasında bir müddət kontrasepsiyadan istifadə etməyi tövsiyə edirlər.

Qadınlar müalicə alarkən aybaşılarının nizamsızlaşdığını və ya dayandığını görə bilərlər. Bu, hamilə qala bilməyəcəkləri demək deyil, buna görə kontrasepsiya lazımdır.

Kişilərdə müalicələr sperm hüceyrələrini azalda və ya zədələyə bilər. Buna baxmayaraq, kişilər adətən müalicədən sonra yenidən nəsilartırma qabiliyyəti qazanırlar.

Müalicənin nəsilartırma qabiliyyətinizə necə təsir edəcəyi barədə narahat olmağınız normaldır. Xərçəng kimi həyata ciddi təsir edə bilən xəstəliklə qarşılaşmaq cinsəllik və nəsilartırma mövzularını tam arxa plana atmağı tələb etmir; bu barədə suallarınız və ya narahatlıqlarınız haqqında müalicə başlamazdan əvvəl həkiminizlə danışmaqdan çəkinməməyi tövsiyə edirik.

Bu yazımızla  xərçəngdə cinsəllik mövzusuna giriş  etmiş olduq. Növbəti yazılarımızda kişi və qadın xərçəng xəstələri və müxtəlif xərçəng növləri üçün cinsəllik və nəsilartırma mövzularına ayrı-ayrı toxunmağı planlaşdırdıq.