საბოლოოდ ფილტვის კიბოში KRAS მუტაციაზე მიმართული მკურნალობა გამოჩნდა

ახალმა ანტიკიბოს საშუალებამ, KRAS ინჰიბიტორმა „AMG 510“-მა, 2019 წლის ფილტვის კიბოს მსოფლიო კონფერენციაზე წარმოდგენილი ფაზა-1 კლინიკური კვლევის შედეგებით, შორს წასული არაწვრილუჯრედოვანი ფილტვის კიბოს თითქმის ყველა პაციენტში სიმსივნის კონტროლი უზრუნველყო.
KRAS ცილა უჯრედის ნორმალურ ზრდაში მონაწილე ერთ-ერთი მნიშვნელოვანი მოლეკულაა. KRAS გენით წარმოებული ცილა გარე გარემოდან მიღებული სიგნალების უჯრედის ბირთვში გადაცემაში მონაწილეობს. მუტაციის შემთხვევაში უჯრედი „აგრესიულად“ იზრდება. მუტანტური KRAS მუდმივად აგზავნის „გამრავლდი“ ბრძანებას მაშინაც, როდესაც უჯრედს გარე სიგნალი არ მიუღია. KRAS მიზანმიმართული პრეპარატების მიმართ განვითარებულ წამლის რეზისტენტობაზეც პასუხისმგებელია.

KRAS მუტაციები ხშირად ეგზონ 1-ში მდებარე კოდონ 12-ში (%80) და 13-ში (%15), ასევე ეგზონ 2-ში მდებარე კოდონ 61-ში გვხვდება. პაციენტებში ყველაზე ხშირია Gly12AIa, Gly12Asp, Gly12Arg, Gly12Cys, Gly12Ser, Gly12Val, Gly13Asp მუტაციები.
KRAS მუტაციაზე ეფექტიანად მიმართული მკურნალობა ფილტვის კიბოსთვის ძალიან მნიშვნელოვანი ეტაპი იქნება
7 სექტემბერს 2019 წელს ბარსელონაში დაწყებული ფილტვის კიბოს მსოფლიო კონფერენციის ყველაზე საყურადღებო კვლევა ეხებოდა ფილტვის კიბოში მანამდე გაურკვეველი კლინიკური მნიშვნელობის მქონე KRAS გენის მუტაციის — KRAS G12C ვარიანტის — წინააღმდეგ შემუშავებულ AMG 510 კოდური სახელის ანტიკიბოს მოლეკულას.
AMG 510-ით ნამკურნალები 23 პაციენტის პასუხები ასეთი იყო:
- 11 პაციენტში პარციალური/ნაწილობრივი პასუხი,
- 11 პაციენტში სტაბილური დაავადება,
- 1 პაციენტში პროგრესირება (პროგრესირებადი დაავადება).
ფაზა-1 კვლევიდან ფაზა-2 კვლევაში გადასული 13 პაციენტიდან 7-ში (% 54) ნაწილობრივი პასუხი, ხოლო 6-ში სტაბილური დაავადება მიიღეს.
პირველი შედეგები ფილტვის კიბოს მსოფლიო კონფერენციაზე Washington-ის უნივერსიტეტის ექიმმა Ramaswamy Govindan-მა წარმოადგინა. მისი თქმით, AMG 150-ს შესაფერისი უსაფრთხოების პროფილი ჰქონდა, რადგან დოზის შემზღუდველი ან დაგროვებადი გვერდითი ეფექტი არ გამოვლენილა.
„AMG 510-მა KRAS G12C მუტაციადადებით არაწვრილუჯრედოვან ფილტვის კიბოს პაციენტებში ადრეულ კლინიკურ კვლევებშიც კი იმედისმომცემი ანტისიმსივნური აქტივობა აჩვენა. ფაზა-I კომბინაციის კვლევის შემდეგ ფაზა-II მონოთერაპიის კვლევა გრძელდება“, განაცხადა მან.
KRAS G12C მუტაცია არაწვრილუჯრედოვანი ფილტვის კიბოების დაახლოებით % 13-ში დადებითია და ამ გენეტიკურ ცვლილებაზე მიმართული დამტკიცებული მკურნალობა აქამდე არ არსებობდა. AMG 510 პირველი თაობის მცირე მოლეკულური KRAS ინჰიბიტორია, რომელიც KRAS-ს სპეციფიკურად და შეუქცევადად აფერხებს.
KRAS G12C მუტაცია ასევე გვხვდება კოლორექტული და აპენდიქსის კიბოების % 3-5-ში და ზოგი სხვა სიმსივნის % 1-დან % 3-მდე.

კვლევის დეტალები
კვლევა მოიცავს პაციენტებს, რომელთა დაავადებაც წინა სტანდარტული მკურნალობისას ან მის შემდეგ პროგრესირდა და რომლებსაც აქტიური ტვინის მეტასტაზები არ აქვთ და შორს წასული არაწვრილუჯრედოვანი ფილტვის კიბოს (KHDAK) მქონენი არიან. კვლევის საწყისი მონაცემები მანამდე 2019 წლის ASCO-ს ყოველწლიურ შეხვედრაზეაღიწერა.
- მკვლევრებმა 34 არაწვრილუჯრედოვანი ფილტვის კიბოს პაციენტის ჩათვლით სულ 76 პაციენტი ჩართეს.
- 34 პაციენტის ასაკის მედიანა 67,5 იყო და 18 ქალი იყო.
- 3 პაციენტის გარდა ყველას ECOG 0 ან 1 ფუნქციური სტატუსი ჰქონდა და 5 პაციენტის გარდა ყველას მანამდე მედიანურად 3.5 სისტემური ანტიკიბოს მკურნალობა ჰქონდა მიღებული.
- პაციენტების სამ მეოთხედს ნებისმიერი ხარისხის გვერდითი ეფექტები ჰქონდა, ხოლო 12-ს (% 35.3) მკურნალობასთან დაკავშირებული, უმეტესად მსუბუქი ეფექტები. არავის ჰქონია მე-4 ხარისხის ან ფატალური მკურნალობასთან დაკავშირებული გვერდითი ეფექტი და მათ გამო მკურნალობა არავის შეუწყვეტია. ყველაზე ხშირი იყო დიარეა (4 პაციენტი) და გულისრევა (2 პაციენტი); მე-3 ხარისხის ეფექტი იყო დიარეა 2 პაციენტში და ანემია 1 პაციენტში.
- პირველი პასუხი ობიექტური პასუხის მქონე 11 პაციენტიდან 10-ში დაახლოებით 5 კვირაში დაფიქსირდა. მკურნალობის ხანგრძლივობის მედიანა პასუხის მქონეებში 15.1 კვირა, ხოლო სტაბილური დაავადების მქონე 11 პაციენტში 10 კვირა იყო.
დასასრულ, ამ მცირე კლინიკური კვლევის მიხედვით AMG 510 KRAS G12C მუტაციადადებით ფილტვის კიბოში საკმაოდ ეფექტიანი და გვერდითი ეფექტების პროფილით მისაღები ჩანს. თუმცა KRAS მუტაციების მრავალფეროვნების გავლენა AMG 510-ზე, წამლის რეზისტენტობა და თანმხლები მუტაციების მოქმედება უფრო ფართო კლინიკური კვლევებით გაირკვევა.
წყაროები
Phase 1 study of safety, tolerability, PK and efficacy of AMG 510, a novel KRASG12C inhibitor, evaluated in NSCLC.
IASLC 20th World Conference on Lung Cancer; September 7-10, 2019; Barcelona, Spain. Abstract OA02.02.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.