Aşağı dozalı aspirin qadınlarda kolon xərçəngi riskini azaldır

10 il ərzində qadınlarda aspirin istifadəsinin xərçəng xəstəliyinə təsirini araşdıran tədqiqatçılar onun kolon xərçəngi riskini azaltdığını müəyyən ediblər.

Təxminən 100 ildir istifadə olunan aspirin artıq hər evdə olan bir dərmana çevrilmişdir. Adətən ağrıkəsici və hərarətsalıcı kimi istifadə olunan aspirinin orqanizmə faydalı bir çox xüsusiyyəti vardır. Damar tıxanıqlığı, infarkt və şəkərli diabetdə olduğu kimi, xərçəng xəstəliklərində də müşahidə olunan müsbət təsirləri gözardı edilə bilməyəcək xüsusiyyətdədir.

Ümumiyyətlə, orqanizmdə yaranan xərçənglə əlaqəli dəyişikliklərin və qan hüceyrələrinin çoxalmasının qarşısını alan, xərçəng hüceyrələrinin öz-özünü məhv etməsini təmin edən, qan damarlarında inkişafı dayandıraraq xərçəng hüceyrələrinə oksigen getməsinin qarşısını alan təsiredici xüsusiyyətlərə malik aspirin Amerikada aparılan bir araşdırmaya görə qadınlarda kolon xərçəngi riskini azaldır.

Amerikada Daxili Xəstəliklər Jurnalında dərc olunan tədqiqat nəticələri günaşırı aşağı dozalı aspirin istifadə edən qadınlarda kolon xərçəngi riskinin azaldığını göstərmişdir. Lakin faydaları ilə yanaşı, mədə qanaması riskini də artırdığı müəyyən edilmişdir.

Həyati risk daşıyan kolorektal xərçənglə bağlı əvvəllər aparılmış bəzi araşdırmalar gündəlik qəbul edilən aspirinin xərçəngin yaranma riskini azaltdığını göstərmişdir. Keçmişdə aparılan araşdırmalar da genetik yolla keçən kolon xərçəngi riskini azaltdığını müəyyən etmişdir. Bu məsələdə Amerikada tövsiyə olunan yanaşma, yaşı 55 - 79 arasında olan qadınların zərurət yarandıqda potensial faydaları üçün aspirin istifadə etməsidir.

Ürək-damar xəstəlikləri və xərçəng riski üzərində E vitamininin və aspirinin təsirini qiymətləndirmək məqsədilə 10 il ərzində aparılan araşdırmada xərçəngi və ya ürək-damar xəstəliyi olmayan, yaşı 45 və ya daha çox olan 39 876 xəstə iştirak etmişdir. İştirakçı qadınların bir qisminə 10 il ərzində günaşırı 100mg aspirin verilmiş, digərlərinə isə plasebo (dərman kimi verilən təsirsiz maddə) tətbiq edilmişdir. Araşdırma müddəti ərzində (10 il) müşahidə olunan xəstələrin sayı 33 682 olmuşdur.

Araşdırma davam edərkən keçən 10 il ərzində 5,071 xərçəng hadisəsi müəyyən edilmişdir (2,070 süd vəzi xərçəngi, 451 kolorektal xərçəng və 431 ağciyər xərçəngi). Bu xərçəng xəstələrinin 1,391-ində həyati risk yaranmışdır. Aspirin istifadə edən iştirakçı qadınlarda kolon xərçəngi riski %20 nisbətində azalmış, qadınlarda süd vəzi və ağciyər xərçəngi riskində isə azalma müşahidə olunmamışdır. Bütün araşdırma müddətində aspirin istifadə edən qrupda müəyyən edilən yan təsirlər mədə qanaması və xoradır.

Buna əsasən, sağlam qadınlarda uzun müddət günaşırı aşağı dozada istifadə edilən aspirinin kolorektal xərçəng riskini azalda biləcəyi müəyyən edilmişdir. Lakin sağlam orta yaşlı qadınlarda aspirinin geniş istifadəsinin mədə qanaması riski daşıdığı və ümumilikdə xərçəng riskini azaltmadığı diqqətdən kənarda saxlanılmamalı məqamlardır. Həmişə qeyd etdiyim kimi, dərman istifadəsi həkim nəzarətində həyata keçirilməli olan bir haldır. Sizi müalicə edən və/və ya müayinələrinizi aparan həkiminiz sağlamlıq vəziyyətiniz barədə ətraflı məlumata malikdir. Bu da hansı dərmanın sizin üçün uyğun olduğunu müəyyənləşdirmək deməkdir.

Unutmayın! Şüurlu dərman istifadəsi orqanizminizin lazımsız yüklənməsinin qarşısını alacaq və sağlamlığınızı qoruyacaq.