Kimyaterapiyadan sonra saçlar nə qədər vaxtda uzanır?

Bütün kimyaterapiyalar saç tökmür, lakin əksəriyyəti az və ya çox saç tökülməsinə səbəb olur. Bununla yanaşı, kimyaterapiyaya görə tökülən saçlar əsasən müalicədən sonra yenidən çıxır.
Kimyaterapiya xərçəng hüceyrələrini məhv edə bilər, lakin saç kökü kimi «sürətlə çoxalan» normal hüceyrələrə də zərər verə bilər. Buna görə insanların çoxu kimyaterapiyadan sonra saçlarının ən azı bir hissəsini itirir.
Kimyaterapiyadan sonra saç çıxma prosesi yavaş, lakin sabitdir və saç tökülməsi nadirən daimidir.
Kimyaterapiyadan sonra saçların yenidən çıxması haqqında bəzi məlumatlar:
- Saç tökülməsi xəstənin saçının müalicədən əvvəl qalın və ya nazik quruluşlu olub-olmamasına görə dəyişə bilər.
- Kimyaterapiyadan əvvəl saçları sürətlə böyüyən insanların saçları kimyaterapiyadan sonra da sürətlə böyüməyə meyilli olur.
- Saçların uzanması kimyaterapiya artıq sağlam hüceyrələrə təsir etmədikdə başlaya bilər; bu müddət alınan kimyaterapiyadan və onun tətbiq müddətindən asılı olaraq dəyişir.
- Saç böyümə göstəriciləri insanın yaşı, ümumi sağlamlığı və hansı irqə mənsub olması kimi digər amillərdən asılı olaraq da dəyişir.
Kimyaterapiyadan sonra saçlar nə qədər vaxtda uzanır?
Kimyaterapiya verilən xərçəng xəstələrinin saçları, kirpikləri, qaşları və bədənin digər yerlərindəki tükləri tökülə bilər.
Saç tökülməsi adətən ilk müalicədən 2 həftə sonra başlayır və 1-2 ay ərzində daha çox tökülməyə davam edir.
Eyni şəkildə insanın saçı son kimyaterapiya müalicəsindən dərhal sonra yenidən böyüməyə başlamır. Gecikmə kimyaterapiya dərmanlarının bədəni tərk etmək və sağlam bölünən hüceyrələrə təsirinin dayanması üçün vaxta ehtiyac duymasından qaynaqlanır.
Kimyaterapiya alan insanların çoxu son müalicədən bir neçə həftə sonra məhdud miqdarda nazik, tüklü saç görməyə başlayacaq. Əsl saçlar son kimyaterapiyadan bir və ya iki ay sonra düzgün şəkildə böyüməyə başlayır.
Kimyaterapiya verilən insanların yalnız çox az hissəsində saçlar əvvəlki kimi olmur. Müəyyən kimyaterapiya kombinasiyaları daimi saç itkisi riskini artırır. Məsələn, bir çox xərçəngin müalicəsində istifadə edilən dosetaksel adlı kimyaterapiyanın bəzi insanlarda daimi saç itkisinə səbəb olduğu bilinir.
Aşağıdakı zaman cədvəli kimyaterapiyadan sonra saçların uzanma vaxtını göstərir:
- 2-3 həftə: Yüngül, zəif seçilən saç formaları.
- 1-2 ay: Daha qalın saçlar inkişaf etməyə başlayır.
- 2-3 ay: Saç 2-3 cm böyümüş ola bilər.
- 6 ay: Saç 5-8 cm qədər uzanır. Baş dərisinin bəzi hissələrində saç daha yavaş çıxa bilər.
- 12 ay: Saçlar 10-15 cm qədər uzanır və fırça kimi sərt formaverici vasitələrə daha davamlı olur.
Xüsusilə əvvəllər uzun saçları olan insanlar üçün saçın əvvəlki üslubuna qayıtması bir neçə il çəkə bilər.
Kimyaterapiyadan sonra yeni çıxan saçların quruluşu əvvəlkindən fərqli ola bilərmi?
Bəzi saç follikulları digərlərindən əvvəl aktiv böyümə dövründə ola bilər. Bu baş verdikdə insanın başındakı saç uzunluğu yenidən forma verməyi çətinləşdirə bilər. Eyni şəkildə əvvəlcə qeyri-bərabər və ya yamaqlı görünüş ola bilər.
Zamanla saç daha müntəzəm böyümə qaydasına malik olacaq. Lakin saçın quruluşu əvvəlkindən fərqli ola bilər. Xərçəng müalicəsi bitən bir çox insanda saç quruluşunun dəyişdiyi görülür; məsələn, saç daha qıvrım, dalğalı və ya daha kövrək ola bilər. Hətta saç rəngi qismən dəyişənlər də az deyil.
Bəzən insanın saçında dəyişiklik olub-olmayacağını proqnozlaşdırmağın yolu yoxdur.
- Marağınızı çəkə bilər: Boya yoxdur – xərçəng xəstəsinin boz saçları immunoterapiyadan sonra qaraldı
Kimyaterapiyadan sonra saç uzanması stimullaşdırılıb artırıla bilərmi?
Yaxşı saç baxımı insanın saçları yenidən çıxarkən onları sağlam saxlaya bilər.
Daha çox saç itkisinə səbəb ola biləcək həddindən artıq fırçalama və ya prosedurlardan çəkinmək tövsiyə edilir. İsti saç düzləşdiriciləri və ya fen kimi isitmə cihazları ilə forma vermək saçlara zərər verə və nazik, kövrək görünməsinə və ya qırılmasına səbəb ola bilər.
Kimyaterapiyadan sonra saç böyüməsini stimullaşdırmaq üçün dərman istifadəsi böyük ölçüdə eksperimentaldır və insan bunlardan istifadə edərkən qəti nəticə gözləməməlidir. Saç çıxaran dərmanların çoxu kimyaterapiya əvəzinə saç tökülməsinin digər səbəblərini müalicə etmək üçün hazırlanmışdır.
Xəstələrin bu mövzuda narahatlıqları varsa, saç «uzatma / tökülməsinin qarşısını alma» müalicələrinin risk və faydalarını həkimləri ilə müzakirə etmələri tövsiyə olunur.
- 2004-cü ilə aid siçan tədqiqatında saçlı dəriyə tətbiq edilən estrogenin saç böyümə göstəricisini artıra bildiyi tapılmışdır. Lakin bu, süd vəzi xərçəngi müalicəsi almış xəstələrə tövsiyə edilməsi riskli yanaşmadır.
- 1996-cı ildə 22 qadında aparılan kiçik tədqiqatda minoksidil adlı tanınmış saç böyütmə müalicəsinin kimyaterapiyaya bağlı saç tökülməsində fayda göstərə biləcəyi görüldü.
- Daha yeni araşdırma minoksidilin saçların yenidən böyüməsini sürətləndirə və hətta kimyaterapiya zamanı saç tökülməsini azalda biləcəyini düşündürdü.
Nəticə
Uyğun parik, papaq və ya bandana seçmək saçların yenidən canlanmasını gözləyərkən kömək edə bilər.
Kimyaterapiya zamanı saç itirmək narahatedici ola bilər, lakin bu saç tökülməsi demək olar ki, həmişə müvəqqətidir.
Həm kişilərdə, həm də qadınlarda kimyaterapiya zamanı saç tökülməsinin qarşısını alan və ya azaldan FDA təsdiqli soyuq papaq sistemi də var. DigniCap kimi tanınan bu cihaz xərçəng xəstələrində alopesiya (keçəllik) ehtimalını azaltmaq üçün baş dərisini soyutmaqla işləyir.
*
- Kimyaterapiya və xərçəng müalicələrinə bağlı saç tökülməsi üçün 12 tövsiyə - Xərçəng xəstələri üçün gözəllik-kosmetika tövsiyələri
Mənbələr
Topical Estrogen Accelerates Hair Regrowth in Mice After Chemotherapy-Induced Alopecia by Favoring the Dystrophic Catagen Response Pathway to Damage.
Journal of Investigative Dermatology, 2004.
2. Duvic M, Lemak NA, Valero V ve ark.
A randomized trial of minoxidil in chemotherapy-induced alopecia.
J Am Acad Dermatol, 1996.
3. Trüeb RM.
Chemotherapy-induced alopecia.
Curr Opin Support Palliat Care. 2010.
4. FDA allows marketing of cooling cap to reduce hair loss during chemotherapy.
fda.gov
5. Mevlüde Demir, Önder Kırca, Sadettin Kılıçkap, Yasemin Can, İrfan Öğretmen, Mustafa Özdoğan.
Kemoterapiye Bağlı Geçici Saç Kaybını Önlemede Skalp Soğutma: Tek Merkez Deneyimi
21. Ulusal Kanser Kongresi, Sözel Bildiri
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.