Kimyaterapiya və xərçəng müalicələrinə bağlı saç tökülməsi üçün 12 tövsiyə

Kimyaterapiyaya bağlı saç tökülməsi

Saç tökülməsi (alopesiya) ən çox rast gəlinən və ən çox stress yaradan xərçəng müalicəsi yan təsirlərindən biridir. Xərçəng müalicəsində istifadə olunan dərmanların hamısı saç tökməsə də, çoxu buna səbəb olur. Kimyaterapiyaya başladıqdan sonrakı 2-4 həftə ərzində saç tökülməyə başlaya bilər. Yaxşı xəbər isə xərçəng müalicələrinə bağlı saç tökülmələrinin demək olar ki, hamısının keçici olmasıdır.

Xərçəng müalicəsinə görə saç tökülməsi barədə edə biləcəyiniz 12 şey

• Məlumatlanın: Bütün kimyaterapiya dərmanları saçınıza eyni şəkildə təsir etmir. Bəziləri yalnız saçın nazikləşməsinə səbəb olur. Digərləri saç tökülməsinə gətirə bilər. Həkiminizdən sizi dəqiq nəyin gözlədiyini soruşaraq saç tökülməsi qorxunuzu yüngülləşdirə bilərsiniz.
• Ailənizi məlumatlandırın: Xüsusilə uşaqlar saç tökülməsindən qorxa, hətta utana bilərlər. Onlara saçın tökülmə ehtimalı və müalicənizin niyə bu qədər vacib olduğu barədə məlumat verin. Nə qədər müsbət olsanız, yaxınınız da o qədər müsbət reaksiya verər.
  - Əlaqəli mövzu: Uşaqlara ana və ya atasının xərçəng olduğunu necə demək lazımdır?
• Saçlarınıza diqqət edin: Saç tökülməsini yavaşlatmaq üçün kəskin qoxulu, spirtli və ya salisil turşusu olan şampun və qulluq məhsullarından uzaq durun. Bu dövrdə saçınıza boya, perma və ya kimyəvi düzləşdirmə tətbiq etməyin. Saça forma vermək üçün burma, düzləşdirmə və ya ütüləmə alətlərindən istifadə etməyin. Yumşaq tüklü saç fırçalarından istifadə edin, feni aşağı güc və temperaturda işlədin və ya hava uyğundursa saçınızı öz-özünə qurumağa qoyun.
• Daha qısa saç formasını sınayın: Qısa modellərdə saç daha gur və dolğun görünə bilər (həmçinin parik istifadəsi daha rahat olar). Saçınızı qırxmağı seçirsinizsə, elektrikli təraş aparatından istifadə edin və ya bərbərdə etdirin.
• Dəri qulluğunuza diqqət yetirin: Saçınız töküldükdə baş dərisində həssaslıq və ya qaşınma ola bilər. Nəmləndirici şampun və saç kremi kömək edə bilər.
• Tətbiqi asan bir neçə tövsiyə: Gecə başınıza yumşaq papaq və ya yaylıq bağlamaq boşalmış saçları toplamağa kömək edə bilər. Saçınızı hörük və ya at quyruğu kimi sıxıb dartan yığmalardan çəkinin. İpək yastıq üzü də yatarkən sürtünməni azaldaraq daha yaxşı rahatlıq təmin edir.
• Başınızı qoruyun: Çöldə şal, papaq və ya şlyapa soyuqdan qoruyur. Hava istidirsə və bunlardan istifadə etmək istəmirsinizsə, günəş şüalarından qorunmaq üçün baş dərinizə günəş kremi çəkin.
• Parik və ya saç modeli barədə düşünün: Parik istifadəsinə qərar versəniz, təbii rənginizə, teksturanıza və saç tərzinizə uyğun olanı tapmaq üçün müalicənin əvvəlində alış-veriş edin.
• Sizə yaraşanı geyinin və taxın: Sevdiyiniz bir cüt sırğa və ya rəngli yaylıq/şaldan istifadə edə bilərsiniz. Qadınlar yüngül makiyaj və qaş qələmi istifadə etmək istəyə bilər. Xarici görünüşünüzə diqqət yetirmək əhvali-ruhiyyənizə və özünəinamınıza müsbət təsir edir.
• Saç tökülməsi haqqında danışın: Saçınızın tökülməsinə görə narahat, depressiv və ya özünə inamsız hiss etmək normaldır. Bu vəziyyət qadınlar üçün adətən kişilərdən daha çətin olur. Dəstək qrupu hisslərinizi bölüşə və tövsiyələr verə bilər.
• Səbirli olun: Əksər kimyaterapiyalar bitdikdən bir neçə həftə və ya ay sonra saçınız çıxmağa başlayır. Fərqli rəngdə və quruluşda ola, hətta bəzən əvvəlkindən daha gur çıxa bilər.
• Baş dərisinin soyudulması haqqında məlumatlanın: Xüsusi başlıq (kemokep) vasitəsilə saçlı dərinin soyudulmasıdır. Beləliklə, kimyaterapiyanın saç follikullarına təsiri və nəticədə saç tökülməsi azalır. Bu üsul ən çox süd vəzi xərçəngi xəstələrində adyuvant və neoadyuvant müalicə zamanı seçilir.

ƏLAQƏLİ MÖVZU

Kimyaterapiyaya bağlı saç tökülməsinin qarşısı alına bilər: Dignicap adlı saçlı dərini soyutma sistemi FDA təsdiqi aldı