Kimyaterapiya haqqında bilinən 11 yanlış və doğruları

Xərçəng müalicələrindən kimyaterapiya haqqında ətrafdan eşidilən, internet və sosial mediada dolaşan və ya televiziya kanallarında yayılan çoxlu məlumat arasında doğrunu yanlışdan ayırmaq xərçəng xəstələri və yaxınları üçün olduqca çətindir. Təəssüf ki, bu məlumatların çoxu yanlışdır. Ən çox eşidilən və mühüm olan 11 yanlış məlumatı elmi mənbələrdən istifadə edərək bu yazıda sizin üçün topladıq.

1-Həkimim kimyaterapiyaya başlamalı olduğumu dedi, yəqin ki, son günlərimi yaşayıram.

Otuz il əvvəl kimyaterapiya seansı almaq adətən sağlamlıq vəziyyətinizin çox pis olduğu demək idi. Bu gün belə deyil, çünki kimyaterapiya tez-tez adyuvant (qoruyucu) müalicə kimi istifadə edilir; yəni əməliyyat və / və ya şüa müalicəsi kimi əsas müalicədən sonra xərçəngin geri qayıtmasının qarşısını almaq üçün verilir.

2. Xəstəxanada çox vaxt keçirməli olacağam və bu, həyatımı çox çətinləşdirəcək.

Kimyaterapiya dərmanları xəstənin vəziyyətinə və ehtiyaclarına görə bu gün bir çox fərqli yolla tətbiq edilir. Əksər kimyaterapiyalar iynə və ya kateterlə intravenoz (venadaxili) verilir. Bəzən dərmanlar evdə çox asanlıqla qəbul edə biləcəyiniz həb və ya maye formada verilə bilər.

- Qısaca kimyaterapiya nədir, necə aparılır? Kimyaterapiya niyə lazımdır?

3. Uzun müddət xəstə olacağam və ürəkbulanmam olacaq.

Ürəkbulanma və qusma çox rast gəlinən yan təsirlərdir, lakin hər kəs eyni şikayəti yaşamır. Yaşadığınız ürəkbulanma, qusma və ya ağrı barədə həkimlərinizlə danışın. Bu şikayətləri nəzərə alaraq müalicə sxemlərinizi tənzimləyə və şikayətləri yüngülləşdirə bilərlər.

- Kimyaterapiyaya bağlı ürəkbulanma və qusmanın qarşısı alına bilər! Səbəbi və müalicəsi

4. Heç yan təsir yaşamıramsa, yəqin ki, kimyaterapiya işə yaramır.

Xərçəng müalicələri bəziləri üçün çox çətin olduğundan xəstələr əziyyət çəkmədən sağala bilməyəcəklərini düşünə bilərlər. Eyni müalicəni alan bəzi xəstələrdə nə üçün yan təsirlərin az olduğu tam bilinmir. Yan təsir yaşamamağınız müalicənizin işə yaramadığı demək deyil.

5. Yalnız bir növ kimyaterapiya var və bütün xərçəngləri müalicə edə bilər.

Bir çox insan hər xərçəng növünün eyni kimyaterapiya dərmanı ilə müalicə edilə biləcəyini düşünür, lakin belə deyil. Fərqli dərman növləri müxtəlif xərçəngləri hədəfləyir və müxtəlif yollarla işləyir. Bəzi hədəflər xərçəng hüceyrələrini yox etmək, şişləri kiçiltmək və xərçəngə bağlı şikayətləri yüngülləşdirməkdir. Bu dərmanlar digər müalicələrdən əvvəl, sonra və ya onlarla birlikdə verilə bilər.

6. Bütün saçlarım töküləcək.

Bütün kimyaterapiya dərmanları saç tökülməsinə səbəb olmur. Lakin saç itkisi yaşayan xəstələrdə kimyaterapiya tamamlandıqdan təxminən 3 ay sonra saç böyük ölçüdə bərpa olunur. Bəzi hallarda yenidən uzanma müalicə bitməzdən əvvəl belə başlayır.

- Kimyaterapiyaya bağlı saç tökülməsinin qarşısı alına bilər: Dignicap adlı saçlı dərini soyutma sistemi FDA təsdiqi aldı

7. Xərçəng olmağım qismətdir, heç kim bunu dəyişə bilməz.

Bu bir inancdır, lakin tibbi xərçəng müalicəsi almaq həyatınızı xilas edəcək ən mühüm şey ola bilər. Tətbiq edilən müalicələr xəstəliyin gedişini dəyişə, həyatı xilas edə və ya ömrü uzada bilər.

- XƏRÇƏNG NƏDİR? Niyə və necə yaranır? Qısaca bütün proses!

8. Kimyaterapiya həyati təhlükəli ciddi infeksiyaya səbəb ola bilər.

Ciddi infeksiyalar kimyaterapiya alan xəstələrdə artıq geniş yayılmır, çünki bu gün kimyaterapiya daha çox nəzarətlə tətbiq edilir və əgər leykopeniya yaranacağı gözlənilirsə, qoruyucu inyeksiyalar tətbiq edilə bilər.

9. Kimyaterapiyadan sonra uşaq sahibi ola bilməyəcəyəm.

Kimyaterapiya alan insanların uşaq sahibi olmaqla bağlı narahatlığı çox normaldır. Bu məsələnin öhdəsindən gəlmə yolları var. Məsələn, qadınlar yumurtalarını, kişilər isə sonrakı istifadə üçün spermlərini həkimlərin uyğun gördüyü şəkildə saxlaya bilərlər. Müalicədən sonra uşaq sahibi olmaq sizin üçün vacibdirsə, kimyaterapiyaya başlamazdan əvvəl reproduktiv seçimləriniz haqqında mütəxəssislə görüşə bilərsiniz.

- Xərçəngdən sağalmış qadınların hamiləlik şansı üçdə bir aşağıdır - lakin

10. Kimyaterapiya müalicəsi xərçənglə mübarizədən daha pis hiss etdirəcək.

Müalicə edilməyən xərçənglə kimyaterapiyanın üstün və mənfi tərəfləri müqayisə ediləndə mütləq kimyaterapiya dəstəklənməlidir. Kimyaterapiyanın sınandığı bir çox tədqiqatda adətən sağqalım müddətinin uzanması və ya xəstəliyə bağlı şikayətlərin azalması, həyat keyfiyyətinin artması görülür.

- Xərçəng xəstəsində HƏYAT KEYFİYYƏTİ

11. Müsbət münasibətimi və normal rejimimi davam etdirsəm, yaxşı hiss edəcəyəm.

Müsbət münasibət vacibdir, lakin fiziki yan təsirlərə səbəb olan amillər genetik quruluşunuzdan və orqanizminizin dərmanları necə emal etməsindən asılıdır. Buna düşüncə gücünün elə də təsiri olmaya bilər. Gələcəkdə müalicələrin fərdiləşdirilməsi ilə daha az şikayətlə daha uğurlu müalicələrin aparıla biləcəyi gözlənilir.

- Müsbət münasibət süd vəzi xərçəngi olan insanların ömrünə təsir edirmi?