ახალგაზრდა და ხანდაზმული ზრდასრულების კიბოს გენომური განსხვავებების ამსახველმა კვლევამ ყურადღება მიიპყრო

ახალი კვლევის შედეგები მიანიშნებს, რომ რამდენიმე გენეტიკურმა მახასიათებელმა შეიძლება გადამწყვეტი როლი ითამაშოს კიბოს მქონე ახალგაზრდა ზრდასრული პაციენტებისთვის (<50 წლის ასაკამდე) უფრო ეფექტური მკურნალობის ვარიანტების შერჩევაში. მკვლევრებმა სისტემატურად შეადარეს კიბოს 14 განსხვავებული ტიპის გენომები, რომლებიც როგორც ახალგაზრდა, ისე ხანდაზმულ ადამიანებს აზიანებს, და დაასკვნეს, რომ კანის, მსხვილი ნაწლავის ან სხვა კიბოს მქონე ახალგაზრდა პაციენტებს შეიძლება ისეთი მკურნალობა სჭირდებოდეთ, რომელიც ხანდაზმულებში ჩვეულებრივ გამოყენებულისგან მნიშვნელოვნად განსხვავდება.

რატომ იკვლევენ ახალგაზრდა და ხანდაზმული ადამიანების სიმსივნეების გენეტიკას

სულ მცირე ორი ახალი კვლევის თანახმად, ახალგაზრდა ზრდასრულებში კიბოს დიაგნოსტირების სიხშირე იზრდება. თუმცა, როგორც ამ კვლევის ავტორები აღნიშნავენ, სხვადასხვა კიბოს მკურნალობის შესახებ ცოდნის დიდი ნაწილი ხანდაზმულ პაციენტებზე ჩატარებულ კვლევებს ემყარება. არსებული ცოდნის ხანდაზმული ონკოლოგიური პაციენტებიდან მიღება ახალგაზრდა პაციენტებთან დაკავშირებით აშკარა ცოდნის ხარვეზს ტოვებს, რომელიც უნდა შეივსოს. 

ამის შესასწავლად მკვლევრებმა 50 წელზე უმცროსი 1757 ზრდასრული პაციენტისგან მიღებული 14 განსხვავებული ტიპის სიმსივნის გენომური მონაცემები 50 წელზე უფროსი 3608 პაციენტის მონაცემებს შეადარეს.

მონაცემები აშშ-ის კიბოს ეროვნული ინსტიტუტის მიერ დაფინანსებული პროექტიდან, კიბოს გენომის ატლასიდან  იქნა მიღებული. მკვლევრებმა თითოეული სიმსივნისთვის სისტემატურად შეადარეს გენეტიკური მუტაციები, ქრომოსომული ცვლილებები, სიმსივნის იმუნური სისტემის ფაქტორები და ცნობილი კიბოს საწინააღმდეგო თერაპიით მკურნალობის პოტენციალი. შემდეგ მათ კიბოს გენომის საერთაშორისო კონსორციუმიდან მიღებული დამატებითი ნიმუშებით შედეგები დაადასტურეს.

- დაკავშირებული თემა: რატომ იზრდება კიბოს სიხშირე ახალგაზრდა ზრდასრულებსა და მოზარდებში?

მნიშვნელოვანი მიგნებები

საერთო ჯამში, შედეგებმა აჩვენა, რომ ახალგაზრდა ზრდასრულების სიმსივნის თითოეული ტიპი ხანდაზმული პაციენტების შესაბამისი სიმსივნეებისგან გენომური ნიშნების გარკვეული ერთობლიობით შეიძლება განვასხვაოთ.

მაგალითად, დაბალი ხარისხის გლიომებში არსებული კარგად ცნობილი მუტაციების შეფარდებითი სიხშირე პაციენტის ასაკთან ერთად მნიშვნელოვნად იცვლებოდა. ამის საპირისპიროდ, ახალგაზრდა ზრდასრულების ენდომეტრიუმის (საშვილოსნოს) სიმსივნეებს ხანდაზმული პაციენტების სიმსივნეებზე მეტი მუტაციის ქონის ტენდენცია ახასიათებდა.

თუმცა კიბოს ტიპებს შორის ზოგიერთი საერთო ტენდენციაც შეინიშნებოდა. ყველაზე მნიშვნელოვანი ის იყო, რომ შედეგები ახალგაზრდა ზრდასრულების იმუნური სისტემის მიერ სიმსივნეების უმეტესობაზე განსხვავებულ რეაქციას ვარაუდობდა. ეს მოიცავდა მაკროფაგებისა და დენდრიტული უჯრედების რეაქციებს, რომლებსაც კიბოს საწინააღმდეგო იმუნოთერაპიები ხშირად იყენებს.

ბოლოს, მკვლევრებმა აღმოაჩინეს რამდენიმე განსხვავება იმაში, თუ როგორ შეიძლება უპასუხონ ახალგაზრდა და ხანდაზმული ზრდასრულების სიმსივნეებმა მკურნალობის სხვადასხვა ვარიანტს, მაგალითად, BRAF გენის კიბოს გამომწვევი მუტაციების წინააღმდეგ შექმნილ პრეპარატებს. მაგალითად, აღმოჩნდა, რომ anti- BRAF პრეპარატებმა კანის კიბოს მქონე ახალგაზრდა ზრდასრულ პაციენტებში შეიძლება უფრო ხშირად უზრუნველყოს ეფექტური მკურნალობის ვარიანტები, ვიდრე იმავე სიმსივნის მქონე ხანდაზმულებში. ამის საპირისპიროდ, მსხვილი ნაწლავის კიბოს მქონე ხანდაზმულმა პაციენტებმა anti-BRAF მკურნალობის ვარიანტებით შეიძლება უფრო მეტი სარგებელი მიიღონ, ვიდრე ახალგაზრდებმა.

ავტორებმა ეს შედეგები კიბოს სხვა მკვლევრებისთვის ხელმისაწვდომი გახადეს. ისინი ასევე გეგმავენ სხვებთან თანამშრომლობას ახალგაზრდა ზრდასრულებში სიმსივნეებთან ბრძოლის ახალი იდეების შესამოწმებლად.

კვლევას ხელმძღვანელობდა Mount Sinai-ის Icahn-ის სამედიცინო სკოლის გენეტიკისა და გენომური მეცნიერებების ასისტენტ-პროფესორის, Kuan-lin Huang-ის  ლაბორატორიის ყოფილი მაგისტრანტი William Lee .