ამოცვენილი წამწამები კვლავ იზრდება? რა უნდა იცოდეთ

ადამიანები დამწვრობის ან ქიმიოთერაპიის მსგავსი მრავალი მიზეზით კარგავენ წამწამებს. მიუხედავად იმისა, რომ ამას დიდი დრო სჭირდება, წამწამები კვლავ იზრდება.

თმის მსგავსად, წამწამებიც ზრდის ციკლებს გადის, ამიტომ რამდენიმე მათგანის ჩამოცვენა, ჩვეულებრივ, შეშფოთების მიზეზი არ არის. თუმცა ტრავმებმა და დაავადებებმა წამწამების უმეტესობის დაკარგვა შეიძლება გამოიწვიოს.

რა არის წამწამების დაკარგვის მიზეზები?

წამწამების დაკარგვის გამომწვევი მდგომარეობები და მათი მიზეზები:

• დამწვრობა: ამერიკის ოფთალმოლოგიის აკადემიის (American Academy of Ophthalmology) მიხედვით, თუ წამწამები დაიწვა, მაგრამ ფესვები არ დაზიანდა, ისინი ჩვეულებრივ 6 კვირაში კვლავ იზრდება. თუმცა თუ ფესვებიც დაზიანდა, წამწამები შეიძლება აღარ გაიზარდოს.
• ქიმიოთერაპია: კიბოს სამკურნალო პრეპარატებმა ზოგჯერ წამწამების ჩამოცვენა შეიძლება გამოიწვიოს. ამას ყველა ქიმიოთერაპიული პრეპარატი არ იწვევს. თუმცა თუ ადამიანი თმის ცვენის გამომწვევად ცნობილ ქიმიოთერაპიულ პრეპარატს იღებს, თავის კანთან ერთად სხეულის სხვა ნაწილებიც დაზარალდება. სხეულის თმა, წარბები და წამწამები ამ მდგომარეობით ხშირად ზიანდება. ეს შეშფოთების მიზეზი არ არის. ჩვეულებრივ, ქიმიოთერაპიის დასრულებიდან მალევე წამწამები კვლავ ზრდას იწყებს.
• წამწამების მოჭრა: ადამიანთა უმეტესობა წამწამებს არ იჭრის. მაგრამ ვინც ამას აკეთებს, მათ წამწამები, ჩვეულებრივ, დროთა განმავლობაში ძველ სიგრძეს უბრუნდება.
• წამწამების ამოგლეჯა: ტრიქოტილომანიაარის ფსიქოლოგიური მდგომარეობა, რომელიც თმის/ბეწვის ამოგლეჯის იმპულსით ხასიათდება. ამ იმპულსმა სხეულის ნებისმიერ ადგილზე თმა შეიძლება მოიცვას, ანუ წამწამებსაც შეეხოს. ამოგლეჯილი წამწამების ხელახლა ზრდას რამდენიმე თვე შეიძლება დასჭირდეს.
• წამწამების დაგრძელების პროცედურა: წამწამების დაგრძელება ბუნებრივ წამწამებზე ბოჭკოების მიწებებაა უფრო სქელი და გრძელი წამწამების მისაღებად. თუმცა პროცედურამ ბუნებრივი წამწამები შეიძლება ამოგლიჯოს ან დააზიანოს. თუ ბუნებრივი წამწამები დაგრძელების პროცესში დაიკარგა, ისინი ჩვეულებრივ რამდენიმე თვეში კვლავ იზრდება.
• ფარისებრ ჯირკვალთან დაკავშირებული მდგომარეობები: ფარისებრი ჯირკვალი ფარისებრ ჰორმონს წარმოქმნის. მისი მეტისმეტად ბევრი ან ცოტა წარმოქმნა სხვადასხვა გამოვლინებას იწვევს, მათ შორის თმისა და ბეწვის დაკარგვას. წარბების ცვენა შეიძლება განვითარდეს როგორც ჰიპერთირეოზის (ზედმეტად აქტიური ფარისებრი ჯირკვალი), ისე ჰიპოთირეოზის (არასაკმარისად აქტიური ფარისებრი ჯირკვალი) დროს. წამწამები, ჩვეულებრივ, ფარისებრი ჰორმონების დისბალანსის მკურნალობის შემდეგ კვლავ იწყებს ზრდას.
• კეროვანი ალოპეცია: კეროვანი ალოპეცია იმუნური სისტემის მიერ თმის ფოლიკულებზე ზემოქმედების გამომწვევი აუტოიმუნური მდგომარეობაა. ის თავის თმის, წარბებისა და წამწამების დაკარგვას იწვევს. ამჟამად კეროვანი ალოპეციის საბოლოო მკურნალობა არ არსებობს, მაგრამ არსებული მკურნალობები სიმპტომების შემცირებაში შეიძლება დაგვეხმაროს.

იზრდება წამწამები უფრო სწრაფად შინ დამზადებული საშუალებებით?

წამწამების ზრდის დასაჩქარებლად ბევრი ადამიანი სხვადასხვა სახლში დამზადებულ წამალსა თუ საშუალებას იყენებს. ზეითუნის ზეთი, წამწამების მასაჟი და ბიოტინის პროდუქტები ყველაზე პოპულარული შინაური მკურნალობებია. თუმცა, თუ დაკარგული წამწამების სამკურნალოდ ასეთ საშუალებებს გამოიყენებენ, კითხვა „წამწამები უფრო სწრაფად აღდგება?“ ინტერესს იწვევს. დიდი ალბათობით, ამ კითხვაზე პასუხია არა.

არ არსებობს სამეცნიერო მტკიცებულება, რომ რომელიმე შინ დამზადებული საშუალება წამწამების ხელახლა ზრდას დაეხმარება. მიუხედავად იმისა, რომ ბიოტინს კანისა და თმის ჯანმრთელობაში როლის მქონედ მიიჩნევენ, შეზღუდული რაოდენობის კვლევაა იმის შესახებ, უწყობს თუ არა ხელს თმის ზრდას.

წამწამების ცვენის მკურნალობა

უმეტეს შემთხვევაში დამწვრობითა და ქიმიოთერაპიით დაკარგული წამწამები დროთა განმავლობაში კვლავ იზრდება. ქიმიოთერაპიის შემდეგ დაბრუნებული წარბები შეიძლება უფრო მეჩხერი, უფრო სქელი ან ადრინდელის მსგავსი იყოს.

თუ წარბები ფარისებრ ჯირკვალთან დაკავშირებული მდგომარეობის ან აუტოიმუნური დაავადების გამო დაიკარგა, ადამიანს წარბების ცვენის შესაჩერებლად, დიდი ალბათობით, ძირითადი ჯანმრთელობის პრობლემის მკურნალობა დასჭირდება.

წარბების ხელახლა ზრდისთვის საჭირო დრო წარბების რაოდენობასა და ცვენის მიზეზზეა დამოკიდებული. წამლებით მკურნალობაც შეიძლება დაეხმაროს წარბების ხელახლა ზრდას. ექიმმა თვალის წვეთების სახით შეიძლება დანიშნოს ბიმატოპროსტი .

ერთ კვლევაში შეისწავლეს ბიმატოპროსტის გამოყენება 41 ადამიანში, რომლებმაც კეროვანი ალოპეციის გამო წამწამები დაკარგეს. კვლევის მონაწილეები ერთი წლის განმავლობაში ყოველდღე ზედა წამწამების ხაზზე % 0,03 ბიმატოპროსტს ისვამდნენ. მონაწილეთა დაახლოებით %70-ს წამწამები მცირედ მაინც აღუდგა.

წამწამების დაცვა

უბედური შემთხვევები შეიძლება მოხდეს და ამ ვითარებებში ბუნებრივი წამწამების დაკარგვის თავიდან აცილება ყოველთვის შესაძლებელი არ იყოს. ამიტომ ადამიანს რისკების შესამცირებლად გარკვეული ნაბიჯების გადადგმა შეუძლია.

ესენია;

• ჯანსაღი კვება: ზოგი საკვები ნივთიერების დეფიციტმა თმის ცვენა შეიძლება გამოიწვიოს. ამ დეფიციტებმა წამწამებზეც შეიძლება იმოქმედოს. თმის ჯანმრთელობაში როლის მქონე საკვები ნივთიერებები შეიძლება მოიცავდეს:
• C ვიტამინს
• B ვიტამინს
• D ვიტამინს
• თუთიას
• რკინას
• ცილას
• წამწამების ასაპრეხი ხელსაწყოების თავიდან აცილება: მათმა მომხმარებლებმა შემთხვევით წამწამები შეიძლება ამოგლიჯონ, რამაც ფოლიკულები შეიძლება დააზიანოს.
• ღამით მაკიაჟის მოცილება: თვალის მაკიაჟის, განსაკუთრებით ტუშის, მთელი ღამით დატოვებამ წამწამები შეიძლება გამოაშროს. გამომშრალი წამწამების დამტვრევისა და ნაადრევად ჩამოცვენის ალბათობა უფრო მაღალია.
• თვალების სრესა: თვალების ძალიან ძლიერად მოსრესამ წამწამების ცვენა შეიძლება გამოიწვიოს. თმა ნაზია, ამიტომ სრესისას რბილი და ფაქიზი მოპყრობაა საჭირო.

დასკვნა

თმის მსგავსად, წამწამებსაც ბუნებრივი ზრდის ციკლი აქვს და ხშირად ცვივა. რამდენიმე წამწამის დაკარგვა ნორმალურია და შეშფოთებას არ მოითხოვს.

თუმცა მრავალი მიზეზით წამწამების ინტენსიური ცვენა შეიძლება მოხდეს. უმეტეს შემთხვევაში ისინი მკურნალობის გარეშეც კვლავ იზრდება. ამასთან, წამწამების ზრდის დაჩქარების მსურველთათვის შესაძლოა დამხმარე მკურნალობებიც არსებობდეს.

თუ ადამიანი დარწმუნებული არ არის, რატომ სცვივა წამწამები, საუკეთესო გზა ექიმთან მიმართვაა ძირითადი მიზეზის დასადგენად.