COVID-19-ის ვაქცინებმა პირველ წელს 20 მილიონი ადამიანის სიკვდილი თავიდან აიცილა

The Lancet Infectious Diseases-ში 23 ივნისს ონლაინ გამოქვეყნებული კვლევის მიხედვით, COVID-19-ის ვაქცინაციის პირველ წელს ვაქცინებმა COVID-19-თან დაკავშირებული დაახლოებით 19,8 მილიონი სიკვდილი თავიდან აიცილა.

ლონდონის Imperial College-ის ოლივერ ჯ. უოტსონმა და მისმა კოლეგებმა გაზომეს COVID-19-ის ვაქცინაციის პროგრამების პირველი წლის გლობალური გავლენა და შეაფასეს, დამატებით რამდენი სიცოცხლე დაიკარგებოდა, არცერთი ვაქცინა რომ არ ყოფილიყო ხელმისაწვდომი. ასევე შეფასდა დამატებითი სიკვდილის შემთხვევები, რომელთა თავიდან აცილებაც შესაძლებელი იქნებოდა COVID-19-ის ვაქცინებზე გლობალური წვდომის პროგრამის (COVAX) მიერ დასახული 20-პროცენტიანი და ჯანმოს (ჯანმრთელობის მსოფლიო ორგანიზაციის) მიერ დასახული 40-პროცენტიანი ვაქცინაციით მოცვის მიზნების მიღწევის შემთხვევაში.

• დაკავშირებული თემა: რატომ უნდა ავიცრა კორონავირუსზე? უსაფრთხოა ასე სწრაფად შექმნილი ვაქცინა?

მკვლევრების შეფასებით, 8 დეკემბრიდან 2020 წელს 8 დეკემბრამდე 2021 წელს ვაქცინებმა 185 ქვეყანაში COVID-19-თან დაკავშირებული 19,8 მილიონი სიკვდილი თავიდან აიცილა.

თუ ყველა ქვეყანა მიაღწევდა COVAX-ის მიერ დასახულ სრული/საკმარისი ვაქცინაციით მოცვის 20-პროცენტიან მიზანს, დაბალი შემოსავლის ქვეყნებში დამატებით სიკვდილიანობის 45 პროცენტის თავიდან აცილება იქნებოდა შესაძლებელი; თუ ყველა ქვეყანა 2021 წლის ბოლომდე მიაღწევდა ჯანმოს მიერ დასახულ 40-პროცენტიან მიზანს, დამატებით სიკვდილიანობის 111 პროცენტის თავიდან აცილება იქნებოდა შესაძლებელი.

ავტორები წერენ: „მეტი სიცოცხლის გადარჩენა შეიძლებოდა, ვაქცინები მსოფლიოს მრავალ ნაწილში უფრო სწრაფად რომ განაწილებულიყო და გლობალურად მათი მიღება გაძლიერებულიყო“. რა თქმა უნდა, პანდემიის განმავლობაში პრობლემები მხოლოდ ვაქცინების განაწილებასა და წარმოებას არ უკავშირდებოდა; მცდარი ინფორმაცია და საზიანო ჭორები (მაგალითად, მტკიცება, რომ ვაქცინები უნაყოფობას იწვევს) ასევე მნიშვნელოვნად აფერხებდა მოსახლეობის აცრას.

• დაკავშირებული თემა: როგორ ვებრძოლოთ სოციალურ მედიაში სამედიცინო ჭორებს, რომლებიც მილიონობით ადამიანის სიცოცხლეს აზიანებს?