COVID-19-ისთვის ტროას ცხენის მექანიზმით მოქმედი აბით მკურნალობა მოდის: Covinavir (Molnupiravir)

სულ უფრო იზრდება ჩვენი იმედი, რომ დადგება დღე, როდესაც მხოლოდ ერთი აბით COVID-19 -ის მქონე პაციენტების ორგანიზმს ვირუსისგან გავათავისუფლებთ. აშშ-ის ფარმაცევტულმა კომპანიებმა Merck-მა და Ridgeback-მა molnupiravir სახელწოდების ანტივირუსული პრეპარატის (სავაჭრო სახელია Covinavir) COVID-19-ის წინააღმდეგ გამოცდის 3 ფაზის კლინიკური კვლევის შედეგები გამოაცხადეს. მათი მიხედვით, molnupiravir მსუბუქი და საშუალო სიმძიმის COVID-19-ის მქონე პაციენტებში ჰოსპიტალიზაციის ან სიკვდილის რისკს პოტენციურად დაახლოებით 50 პროცენტით ამცირებს.

კვლევაში ჩაერთო ლაბორატორიულად დადასტურებული და სიმპტომური (ნიშნების გამომწვევი) COVID-19-ის მქონე 775 პაციენტი. მონაწილეები იყვნენ მსუბუქი და საშუალო სიმძიმის COVID-19-ის მქონე ზრდასრულები, რომლებსაც ჰქონდათ ისეთი ჯანმრთელობის პრობლემები, როგორიცაა სიმსუქნე, დიაბეტი ან გულის დაავადება, და მძიმე დაავადების უფრო მაღალი რისკის მქონედ მიიჩნეოდნენ.

• Covinavir-ის მიმღებთა დაახლოებით 7,3% მოხვდა საავადმყოფოში, მაშინ როდესაც პლაცებოს (აქტიური ნივთიერების არშემცველი) აბის მიმღებებში მაჩვენებელი 14,1% იყო.
• პლაცებოს ჯგუფში რვა ადამიანთან შედარებით, Covinavir-ის მიმღებთაგან 29 დღის განმავლობაში არც ერთი არ გარდაცვლილა.
• გარდა ამისა, კლინიკურმა მონაცემებმა აჩვენა, რომ Covinavir ყველაზე გავრცელებული SARS-CoV-2 ვარიანტების წინააღმდეგ აქტიურია .

ტროას ცხენი — Molnupiravir-ის (Covinavir) მოქმედების მექანიზმი

Covinavir თავდაპირველად გრიპის გამომწვევი ინფლუენცის ვირუსის წინააღმდეგ შემუშავებული ანტივირუსული საშუალებაა. მისი მოქმედების მექანიზმი, მოკლედ, ნუკლეინის მჟავების მიბაძვაა. მსგავსი ონკოლოგიური პრეპარატებიც დიდი ხანია გამოიყენება. Covinavir ნუკლეოზიდის ანალოგების კლასის პრეპარატია: ვირუსი ამ ყალბ მოლეკულას თავის სტრუქტურაში რთავს, შემდეგ ვირუსის გენომში მუტაცია იზრდება და ვირუსის გამრავლება ითრგუნება.

რას ნიშნავს ჩვენთვის ეს განვითარება?

• კლინიკური კვლევების შედეგად აღმოჩნდა მნიშვნელოვანი ანტივირუსული პრეპარატი, რომელიც COVID-19-ის მკურნალობას დაეხმარება. აუცილებლად უნდა აღინიშნოს, რომ COVID-19-ის პანდემიის შეჩერების ყველაზე ეფექტიანი გზებია ვაქცინაცია და ისეთი ზომების მიღება, როგორიცაა სოციალური დისტანცია, ნიღაბი და პირადი ჰიგიენა. Covinavir-ის მსგავსმა პრეპარატებმა შეიძლება კრიტიკული სიცარიელე შეავსოს იმ ადამიანების მკურნალობის საჭიროებაში, რომლებშიც ვაქცინა არ მოქმედებს, რომლებიც ვაქცინაციის მიუხედავად ინფიცირდებიან ან თანმხლები დაავადებების გამო მძიმე დაავადების მაღალი რისკი აქვთ.
• კომპანია MERCK-მა განაცხადა, რომ ძალიან მალე FDA-ს (აშშ-ის სურსათისა და წამლის ადმინისტრაციას) პრეპარატის „გადაუდებელი გამოყენების ნებართვისთვის“ მიმართავს.
• თუ FDA მოქმედი ნივთიერების სახით molnupiravir-ის შემცველ აბს დაამტკიცებს, ის COVID-19-ისთვის პერორალურად მისაღები პირველი ანტივირუსული მკურნალობა იქნება.
• საბოლოო ეტაპის კვლევის შედეგები ფარმაცევტულმა კომპანიამ გამოაცხადა, თუმცა ისინი ჯერ რეცენზირებად სამედიცინო ჟურნალში არ გამოქვეყნებულა.

*

გარე შინაარსის სანახავად მართეთ პარამეტრები

გარე შინაარსის სანახავად მართეთ პარამეტრები