დადასტურდა ასპირინის ეფექტი მსხვილი ნაწლავის კიბოს პრევენციაში
ასპირინის სარგებელი წლებია ვიცით და მას გულ-სისხლძარღვთა დაავადებების პროფილაქტიკისთვის დაბალი დოზით იყენებენ; ახლა დადასტურდა, რომ იგი მსხვილი ნაწლავის კიბოსგანაც იცავს.
სისხლძარღვში წლების განმავლობაში წარმოქმნილი ათეროსკლეროზული ფოლაქები დროთა განმავლობაში ზედაპირს სცილდება. მოწყვეტილ ფოლაქებს სისხლის კოლტები ფარავს და წარმოქმნილი სტრუქტურა სისხლის ნაკადს ამცირებს. ასპირინი შედედებას უშლის ხელს და ნაკადის შემცირებას არ უშვებს. ეს გულის კუნთის, ტვინისა და სხვა ქსოვილების ჟანგბადით უკეთ მომარაგებას უწყობს ხელს. საბოლოოდ, სისხლის ნაკადის სიჩქარის შენარჩუნებით ასპირინი გულ-სისხლძარღვთა დაავადებების პრევენციაში გვეხმარება. კოლორექტალური კიბოს განვითარების პრევენციის მექანიზმი ჯერ გარკვეული არ არის, თუმცა მიიჩნევა, რომ სარგებელი ასპირინის ანთების საწინააღმდეგო მოქმედებას შეიძლება უკავშირდებოდეს.
დღეში ერთხელ დაბალი დოზის ასპირინის (100 mg ან ნაკლები) მიერ გულ-სისხლძარღვთა დაავადებებისა და კოლორექტალური (მსხვილი ნაწლავის) კიბოსგან დაცვის მტკიცებულებები 12 აპრილს, 2016 წელს, ამერიკის შინაგანი მედიცინის ჟურნალში გამოქვეყნდა. ამგვარად, მსხვილი ნაწლავის კიბოს პრევენციისთვის ასპირინის გამოყენების რეკომენდაცია ამერიკის კიბოს პრევენციის სამსახურის (USPSTF- US Preventive Service Task Force) გაიდლაინში შევიდა.
კვლევა ჩატარდა ადამიანებში, რომელთა გულ-სისხლძარღვთა დაავადების განვითარების რისკი 10 წლის განმავლობაში %10-ზე მაღალი იყო. ყველაზე მეტი სარგებელი მიიღეს 50-დან 69 წლამდე ადამიანებმა, რომლებმაც ასპირინის მიღება ადრე დაიწყეს. ამის მიხედვით, დღეში 100 mg ან უფრო დაბალი დოზის ასპირინის მიმღებ 50-69 წლის ადამიანებში გულ-სისხლძარღვთა დაავადებებთან ერთად კოლორექტალური კიბოს რისკიც შემცირდა. იმავე კვლევაში 50 წელზე უმცროსებსა და 70 წელზე უფროსებში ასპირინის ეფექტი შეზღუდული იყო და გამოყენების რეკომენდაციისთვის საკმარისი მტკიცებულება ვერ მოიპოვეს.
კვლევის წინასწარი ანგარიშის წარდგენისას, 2011 წელს, აღინიშნა, რომ ამერიკაში სიკვდილიანობის ნახევარზე მეტს გულის დაავადებებით, ინსულტითა და ნაწლავის კიბოთი სიკვდილი შეადგენდა. ამ თვალსაზრისით უაღრესად მნიშვნელოვანია კვლევის საბოლოო აღმოჩენა, რომ გულ-სისხლძარღვთა დაავადებებისა და მსხვილი ნაწლავის კიბოს ეფექტიანი პრევენცია შესაძლებელია.
ასპირინის კიბოსგან დამცავი მოქმედება ბოლო წლების აქტუალური და საინტერესო თემაა. ნაჩვენებია, რომ სისხლდენის რისკის არმქონე ადამიანებში (რომლებსაც არ აქვთ კუჭის წყლული, ბოლო წლებში არ ჰქონიათ სისხლდენა ან არ იღებენ სისხლდენის რისკის გამზრდელ წამლებს) ასპირინს პროსტატის, ძუძუსა და მრავალი სხვა კიბოსგან დაცვის დამხმარე მოქმედება აქვს. თუმცა არ უნდა დაგვავიწყდეს, რომ ხანგრძლივმა გამოყენებამ სისხლდენის რისკი შეიძლება გაზარდოს. ამიტომ პროფილაქტიკური მიზნითაც იგი ექიმის ინფორმირებითა და კონტროლით უნდა გამოიყენებოდეს.
წყაროები
Aspirin Use for the Primary Prevention of Cardiovascular Disease and Colorectal Cancer: U.S. Preventive Services Task Force Recommendation Statement.
Clinical Guidelines. 12 April 2016. Annals of Internal Medicine
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.