Enhertu-მ FDA-ს დამტკიცება მიიღო HER2-დაბალი და ულტრადაბალი ძუძუს კიბოსთვის
ამ სტატიაში
ამერიკის სურსათისა და წამლის ადმინისტრაციამ (FDA) 2025 წლის 27 იანვარს პაციენტებისთვის, რომლებსაც აქვთ HER2-დაბალი ან HER2-ულტრადაბალი, ოპერაციით მოუცილებელი ან მეტასტაზური ძუძუს კიბო და მეტასტაზურ ეტაპზე მანამდე ენდოკრინული თერაპიის სულ მცირე ერთი სახეობა მიიღეს, trastuzumab deruxtecan (T-DXd; Enhertu) დაამტკიცა.
ეს მნიშვნელოვანი გადაწყვეტილება DESTINY-Breast06 ფაზა 3 კვლევის შედეგებს დაეფუძნა. კვლევაში ჰორმონული რეცეპტორების (HR) დადებითი, HER2-დაბალი ან HER2-ულტრადაბალი შორსწასული ან მეტასტაზური ძუძუს კიბოს პაციენტებში T-DXd შეადარეს მკვლევრის მიერ შერჩეულ ქიმიოთერაპიას.
FDA-მ ასევე დაამტკიცა Ventana-ს PATHWAY anti-HER-2 (4B5) Rabbit Monoclonal Primary Antibody ტესტი, როგორც თანმხლები დიაგნოსტიკური საშუალება Enhertu-თი მკურნალობისთვის HER2-ultralow ძუძუს კიბოს მქონე პაციენტების გამოსავლენად (მემბრანის შეღებვით IHK 0). ტესტი მანამდე დამტკიცებული იყო Enhertu-თი მკურნალობისთვის HER2-low ძუძუს კიბოს მქონე პაციენტების გამოსავლენად (IHK 1+ ან IHK 2+/FISH-).
HER2-დაბალი და HER2-ულტრადაბალი: რას ნიშნავს ეს?
HER2 სტატუსი მნიშვნელოვანი ბიომარკერია, რომელიც ძუძუს კიბოს უჯრედებში ადამიანის ეპიდერმული ზრდის ფაქტორის რეცეპტორი 2-ის (HER2) ცილის რაოდენობის გასაზომად გამოიყენება. HER2-დაბალი და HER2-ულტრადაბალი ახალი კატეგორიებია, რომლებიც HER2-უარყოფითი ძუძუს კიბოს ქვეჯგუფების უკეთ გასაგებად და მკურნალობის არჩევანების გასაფართოებლად ჩატარებული კვლევებიდან წარმოიშვა. ამ კატეგორიების მიმდინარე განსაზღვრებებია:
HER2-დაბალი (HER2-Low)
- განსაზღვრება: HER2-დაბალი სტატუსის დროს იმუნოჰისტოქიმიურ (IHK) ტესტში HER2 ცილა ფასდება როგორც 1+ ან 2+ თუმცა in situ ჰიბრიდიზაციის (ISH) ტესტში HER2 გენის ამპლიფიკაცია უარყოფითია.
- კლინიკური მახასიათებლები: ამ ჯგუფში, ჩვეულებრივ, ჰორმონული რეცეპტორების (HR) დადებითი პაციენტები შედიან. HER2 ექსპრესია გამოხატულია, თუმცა დადებითი კატეგორიის დონეს არ აღწევს.
HER2-ულტრადაბალი (HER2-Ultralow)
- განსაზღვრება: HER2-ულტრადაბალი სტატუსის დროს HER2 ცილა სიმსივნური უჯრედების მხოლოდ 10%-ზე ნაკლებში სუსტი ან არასრული მემბრანული შეღებვით ვლინდება. IHK შეიძლება წარმოვიდგინოთ, როგორც 0-სა და 1+-ს შორის მაჩვენებელი.
- კლინიკური მახასიათებლები: HER2-ულტრადაბალ სიმსივნეებს, ჩვეულებრივ, HER2-დაბალი ან HER2-უარყოფითი (HER2-null) სიმსივნეებისგან განსხვავებული კლინიკოპათოლოგიური მახასიათებლები აქვთ. მაგალითად:
- უფრო მაღალი Ki-67 პროლიფერაციის ინდექსი (უჯრედების სწრაფი გამრავლება).
- ჰორმონული სტატუსის მიხედვით განსხვავებული ქირურგიული და მკურნალობის შედეგები.
HER2 Null
- განსაზღვრება: HER2 null არის მდგომარეობა, როდესაც HER2 ექსპრესია საერთოდ არ ვლინდება, ანუ უჯრედებში HER2 შეღებვა არ აღინიშნება.
- კლინიკური მახასიათებლები: HER2 null სიმსივნეებში ჰორმონული რეცეპტორების დადებითობა უფრო იშვიათია, ვიდრე HER2-ულტრადაბალ და HER2-დაბალ სიმსივნეებში.
FDA-ს დამტკიცება DESTINY-Breast06 კვლევის საფუძველზე
ძუძუს კიბო მსოფლიოში ქალებში ყველაზე გავრცელებული კიბოა, რაც მკურნალობის არჩევანების მუდმივ განვითარებას მოითხოვს. Trastuzumab deruxtecan აქამდე გამოიყენებოდა როგორც მხოლოდ HER2-დადებით ან HER2-დაბალ სიმსივნეებში დადასტურებულად ეფექტიანი მკურნალობა. თუმცა მისი ახალი გამოცდა მიმდინარეობს ჰორმონული რეცეპტორების (HR) დადებით სიმსივნეებსა და HER2-დაბალი ან HER2-ულტრადაბალი ექსპრესიის მქონე პაციენტებში და ამ სფეროებში ეფექტიანობის მაჩვენებელი კვლევები შეზღუდულია. განსაკუთრებით ამ პაციენტებისთვის მკურნალობის შემდგომ ხაზებში ეფექტიანი და ასატანი თერაპიების საჭიროება ამ კვლევას კრიტიკულ მნიშვნელობას ანიჭებს.
კვლევის დიზაინი და მეთოდები
DESTINY-Breast06 სახელწოდების ფაზა III კვლევაში 866 პაციენტი HR-დადებითი, HER2-დაბალი ან HER2-ულტრადაბალი მეტასტაზური ძუძუს კიბოთი, რომელთაც სულ მცირე ერთი ენდოკრინული თერაპიის შემდეგ დაავადების პროგრესირება აღენიშნათ, შემთხვევით ორ ჯგუფად გაანაწილეს:
- Trastuzumab deruxtecan-ის ჯგუფი (T-DXd): ეს ჯგუფი ანტისხეულ-პრეპარატის კონიუგატ T-DXd-ით მკურნალობდა.
- ქიმიოთერაპიის ჯგუფი: ამ ჯგუფმა ექიმის არჩევანის მიხედვით შერჩეული სტანდარტული ქიმიოთერაპია მიიღო.
პაციენტებს მანამდე ქიმიოთერაპია არ ჰქონდათ ჩატარებული და კვლევაში ენდოკრინულ თერაპიაზე უპასუხობის გამო ჩაერთნენ. კვლევამ შეაფასა T-DXd-ის გავლენა პროგრესირების გარეშე სიცოცხლის ხანგრძლივობაზე (PFS) და მკურნალობის სხვა შედეგებზე.
შედეგები: პროგრესირების გარეშე სიცოცხლის ხანგრძლივობის მნიშვნელოვანი ზრდა
713 პაციენტს HER2-დაბალი, ხოლო 153-ს HER2-ულტრადაბალი ძუძუს კიბო ჰქონდა.
კვლევამ აჩვენა, რომ T-DXd პროგრესირების გარეშე სიცოცხლის ხანგრძლივობას (PFS) მნიშვნელოვნად ზრდიდა:
- T-DXd-ის ჯგუფი: პროგრესირების გარეშე სიცოცხლის მედიანური ხანგრძლივობა 13.2 თვე იყო.
- ქიმიოთერაპიის ჯგუფი: პროგრესირების გარეშე სიცოცხლის მედიანური ხანგრძლივობა მხოლოდ 8.1 თვე იყო.
ეს შედეგი აჩვენებს, რომ T-DXd ქიმიოთერაპიასთან შედარებით კიბოს პროგრესირებას 38%-ით ამცირებს (პროგრესირების ან სიკვდილის რისკების თანაფარდობა 0.62; 95% CI, 0.52-დან 0.75-მდე; P<0.001).
ამასთან, T-DXd ეფექტიანი აღმოჩნდა პაციენტების ყველა ქვეჯგუფში — განსაკუთრებით ენდოკრინული თერაპიის შემდეგ სწრაფი პროგრესირების მქონე პაციენტებში (<6 თვე). ეს ადასტურებს, რომ პრეპარატი პაციენტების ფართო ჯგუფისთვის იმედის მომცემია.
გვერდითი მოვლენები
Trastuzumab deruxtecan-ის ჯგუფში პაციენტების 52,8%-ს, ხოლო ქიმიოთერაპიის ჯგუფში 44,4%-ს აღენიშნა მე-3 ან უფრო მაღალი ხარისხის სიმძიმის არასასურველი მოვლენები. ფილტვის ინტერსტიციული დაავადება (ILD) ან პნევმონიტი trastuzumab deruxtecan-ის ჯგუფში 49 პაციენტს (11,3%) განუვითარდა; მათგან 3 შემთხვევა მე-5 ხარისხის სიმძიმის იყო. ქიმიოთერაპიის ჯგუფში კი მხოლოდ 1 პაციენტში (0,2%) დაფიქსირდა მე-2 ხარისხის პნევმონიტი.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.