გარგარის კურკით კიბოს მკურნალობის მცდელობისას პაციენტი მოიწამლა

ავსტრალიელი 67 წლის პროსტატის კიბოს პაციენტს ციანიდით მოწამვლა განუვითარდა გარგარის კურკების გამო, რომლებსაც დაავადების დასაძლევად დანამატის სახით იღებდა. სამედიცინო ჩარევის შედეგად იგი არ გარდაიცვალა, თუმცა ორგანიზმში ჟანგბადის დონე უკიდურესად დაეცა და ციანიდით მოწამვლის ნიშნები ჰქონდა. ციანიდით მოწამვლა სასიკვდილო მდგომარეობაა.

ყველაფერი „ბუნებრივი“ უვნებელია?

ეს საკმაოდ გავრცელებული მცდარი წარმოდგენაა და გარგარის კურკა მისი ერთ-ერთი ყველაზე ცნობილი მაგალითია. გარგარის კურკაში არსებული ამიგდალინი ორგანიზმში მეტაბოლიზდება და ციანიდად გარდაიქმნება. მისი ფართოდ ცნობილი კომერციული ფორმის სახელია Laetril ; ეს ფიტოთერაპიის პროდუქტი, მტკიცების თანახმად, ნორმალური ქსოვილების დაზიანების გარეშე მხოლოდ კიბოს უჯრედებს კლავს. თუმცა სინამდვილე ასეთი არ არის.

როდესაც პაციენტი კიბოს ოპერაციისთვის ანესთეზიის ქვეშ იმყოფებოდა, ექიმებმა ჟანგბადის უკიდურესად დაბალი დონე შენიშნეს, რამაც მოწამვლის ადრეული მკურნალობა შესაძლებელი გახადა. შემდეგ სისხლის ანალიზებში ციანიდის დონე ნორმას 25-ჯერ აღემატებოდა. მოგვიანებით პაციენტის მდგომარეობა სამეცნიერო ანგარიშში აღწერეს, როგორც მაგალითი იმისა, თუ როგორ შეიძლება ალტერნატიულმა მკურნალობამ პაციენტები საფრთხეში ჩააგდოს.

ბევრს სჯერა, რომ გარგარის კურკა — და ბევრი სხვა კურკაც — კიბოსგან იცავს ან კიბოს მკურნალობს. აღინიშნა, რომ პროსტატის კიბოს მქონე ეს 67 წლის პაციენტი გარგარის კურკის ექსტრაქტთან ერთად ხილის კურკების დანამატს, Novadalin-საც იღებდა.

სიმართლე B17 ვიტამინის შესახებ

მიუხედავად იმისა, რომ ნამდვილი ვიტამინი არ არის, დღეს B17 ვიტამინად წოდებული ამიგდალინი ორგანიზმში ციანიდად გარდაქმნის შემდეგ უჯრედების ჟანგბადის მეტაბოლიზმზე მოქმედებს. განსაკუთრებით ზიანდება ტვინისა და გულის უჯრედები, რომლებსაც ჟანგბადის სტაბილური დონე სჭირდება. დიდი ხანია ცნობილია, რომ ამიგდალინი მხოლოდ კიბოს უჯრედებისთვის კი არა, ნორმალური უჯრედებისთვისაც ტოქსიკურია, თუმცა მრავალ ქვეყანაში იგი უკონტროლოდ იყიდება, ან ინტერნეტამბების გავლენით პაციენტები განკურნების იმედით გარგარის კურკების რეგულარულ მიღებას იწყებენ.

გაფრთხილებები გარგარის კურკის შესახებ

ზუსტი რიცხვის დასახელება რთულია, თუმცა ცნობილია, რომ მოზრდილებში დღეში 10-ზე მეტი გარგარის კურკის მიღებამ შეიძლება მოწამვლა გამოიწვიოს; ბავშვებზე კი უფრო მცირე რაოდენობაც შეიძლება მოქმედებდეს. 2016 წელს ევროპის სურსათის უვნებლობის უწყების ანგარიშში აღწერეს გარგარის კურკებით გამოწვეული ციანიდით მოწამვლის გამო ჰოსპიტალიზებული მრავალი ბავშვი. 28 თვის გოგონა 10 კურკის ჭამის შემდეგ ციანიდით მოწამვლით გარდაიცვალა. ციანიდით მოწამვლა სხვადასხვა სახისა და სიმძიმის ნიშნებს იწვევს: გულისრევიდან, უძილობიდან და გაღიზიანებადობიდან სიკვდილამდე.

შედეგად, გარგარის კურკის ექსტრაქტი ამიგდალინი, რომელსაც ნამდვილი ვიტამინის არყოფნის მიუხედავად B17 ვიტამინს უწოდებენ, ტოქსიკურია და ჯანმრთელობისთვის საზიანოა. კიბოს მკურნალობაში მისი ეფექტიანობის მტკიცებულება არ არსებობს.

დაკავშირებული თემა: 

• ანტიოქსიდანტები კიბოს არ კლავს, არამედ ხელს უწყობს მის განვითარებას