ჰომეოპათი კოვიდის ყალბი მკურნალობისა და აცრის ყალბი ბარათების გაცემის ბრალდებით დააკავეს!
ამ სტატიაში
ჰომეოპათი ექიმი ჰომეოპროფილაქტიკური იმუნიტეტის გრანულების/ელექსირების გაყიდვისა და კლიენტებისთვის ისეთი Moderna -თი აცრის დამადასტურებელი Covid-19-ის ვაქცინაციის ბარათების გაცემის გამო დააკავეს, თითქოს ისინი აცრილები იყვნენ. 41 წლის Juli A. Mazi-ს ელექტრონული კომუნიკაციის გამოყენებით თაღლითობასა და ჯანმრთელობის საკითხებზე არაერთი მცდარი განცხადების გაკეთებას ედავებიან. როგორც აღნიშნავენ, ეს ჰომეოპროფილაქტიკურ იმუნიტეტსა და აცრის ყალბ ბარათებთან დაკავშირებული პირველი ფედერალური თაღლითობის საქმეა.
ჰომეოპათია „მსგავსი მსგავსს კურნავს“ პრინციპზე დაფუძნებული ალტერნატიული მედიცინის მეთოდია, რომლის დროსაც თითქმის ათიათასობით ჯერ განზავებულ ჰომეოპათიურ პროდუქტებს იყენებენ. ამ მეთოდის მიმდევარს ჰომეოპათი ეწოდება. მიუხედავად იმისა, რომ ჰომეოპათია ერთ-ერთი ყველაზე სუსტი მტკიცებულებების მქონე ალტერნატიული მკურნალობაა, ის კვლავ პოპულარული გახდა წყლის მეხსიერების შესახებ მტკიცების წყალობით. ცხოველურ, მცენარეულ ან მინერალურ კომპონენტებს ათასობით ჯერ აზავებენ და ჰომეოპათიურ პროდუქტებად იყენებენ. ერთ-ერთი ხშირად შერჩეული პროდუქტი არის ქეცის პარაზიტის მიერ კანზე გამოწვეული დაზიანებიდან მიღებული სითხე.
- დაკავშირებული თემა: რა არის ჰომეოპათია? აქვს თუ არა ადგილი კიბოს მკურნალობაში? (დეტალურად)
Covid-19-თან დაკავშირებული თაღლითობის პირველი საქმე
შემთხვევა 2021 წლის აპრილში გამჟღავნდა, როდესაც ერთმა ადამიანმა აშშ-ის ჯანმრთელობისა და სოციალური მომსახურების დეპარტამენტის გენერალური ინსპექტორის ოფისში იჩივლა, რომ მისმა ოჯახის წევრებმა ჰომეოპათ Juli A. Mazi-სგან იმუნიტეტის გრანულები შეიძინეს. მომჩივნის თქმით, ოჯახის წევრები ამბობდნენ, რომ Mazi-ს გრანულები Covid-19-ის ვირუსს შეიცავდა და იმუნურ სისტემაში ანტისხეულების პასუხს გამოიწვევდა. წერილობით ჩვენებაში ნათქვამია, რომ ოჯახის არც ერთ წევრს არ ჰქონდა მიღებული აშშ-ის სურსათისა და წამლის ადმინისტრაციის (FDA) მიერ ნებადართული Covid-19-ის ვაქცინა, თუმცა Mazi-მ ოჯახს Moderna-ს სახელწარწერიანი Covid-19-ის აცრის ბარათები გაუგზავნა. Mazi ოჯახს ეუბნებოდა, ჰომეოპროფილაქტიკური იმუნიტეტის გრანულების მიღების შემდეგ ბარათებზე მოენიშნათ, რომ Moderna-ს ვაქცინა მიიღეს. ასევე ამტკიცებენ, რომ იგი კლიენტებს ბარათების ყალბად შევსების ინსტრუქციას აძლევდა, თითქოს Moderna-ს ორი დოზა ჰქონდათ მიღებული, და Moderna-ს პარტიის ნომრებსაც კი აწვდიდა.
გარდა ამისა, ამტკიცებენ, რომ Mazi ცრუ განცხადებებს აკეთებდა კალიფორნიის სკოლების ბავშვთა დაავადებებზე ვაქცინაციის მოთხოვნების დაკმაყოფილების შესახებ და ჰომეოპროფილაქტიკურ იმუნიტეტთან ერთად აცრის ყალბ ბარათებსაც გასცემდა, რომლებსაც მშობლები კალიფორნიის სკოლებში აგზავნიდნენ.
Mazi აცხადებდა, რომ მის კლიენტებს შეეძლოთ ბავშვებისთვის Covid-19-ის მიმართ იმუნიტეტის გრანულები მიეცათ და რომ „დოზა ჩვილებისთვისაც იგივეა“. იგი ასევე ამტკიცებდა, რომ გრანულების გადაყლაპვა Covid-19-ის წინააღმდეგ მთელი სიცოცხლის განმავლობაში სრულ იმუნიტეტს უზრუნველყოფდა და FDA-ს მიერ დამტკიცებული ვაქცინები „ტოქსიკურ კომპონენტებს“ შეიცავდა; ამგვარად, ის Covid-19-ის ვაქცინაციის ირგვლივ გავრცელებულ დეზინფორმაციასა და შიშსაც იყენებდა.
გენერალური პროკურორის მოადგილემ ლიზა მონაკომ პრესგანცხადებაში თქვა: „ბრალდებულს ედავებიან, რომ FDA-ს მიერ დამტკიცებული ვაქცინების შესახებ შიშის გაღვივებითა და მცდარი ინფორმაციის გავრცელებით საზოგადოებას ატყუებდა, საფრთხეს უქმნიდა და ამავდროულად ადამიანების სიცოცხლისთვის საშიშ ყალბ მკურნალობას ყიდდა . უფრო უარესი კი ის არის, რომ, როგორც ამტკიცებენ, იგი Covid-19-ის აცრის ყალბ ბარათებს ქმნიდა და კლიენტებს ეუბნებოდა, აცრილად მოენიშნათ თავი, რითაც დაავადების გავრცელების შეკავებისა და კონტროლის მცდელობებს უშლიდა ხელს.“
Mazi-ს წინააღმდეგ საქმე აღიძრა პანდემიის დროს ჯანდაცვის პროგრამებთან დაკავშირებულ უკანონო საქმიანობაზე რეაგირების მცდელობების ორგანიზატორ DOJ-ის ჯანდაცვის თაღლითობის განყოფილების COVID-19-ის უწყებათაშორის სამუშაო ჯგუფთან თანამშრომლობით.
რა არის ჰომეოპათიური პრეპარატები?
ჰომეოპროფილაქტიკა ადამიანის იმუნური სისტემის სტიმულირებისა და იმუნიტეტის მინიჭების მიზნით დაავადების განზავებულ რაოდენობასთან შეხებას გულისხმობს.
არ არსებობს მაღალი ხარისხის სამეცნიერო კვლევა, რომელიც აჩვენებს, რომ ჰომეოპათიური პრეპარატები ინფექციური დაავადებების პრევენციაში ეფექტურია. ტიპური ჰომეოპათიური პრეპარატების აღწერის თანახმად, დაავადებას, ქსოვილს ან მცენარის ექსტრაქტს წყლით აზავებენ „იმ წერტილამდე, როდესაც პროცესის ბოლოს პრეპარატში საწყისი მასალა აღარ რჩება“.
*
- დაკავშირებული თემა: ჰომეოპათიის გამო ბავშვი გარდაიცვალა
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.