იწვევს ჰემოროი (ბუასილი) კოლონის კიბოს?

ჰემოროის (ბუასილის) სიმპტომები და ნიშნები ხშირად კოლონისა და სწორი ნაწლავის (კოლორექტალური) კიბოს მსგავსია. თუმცა არ არსებობს მტკიცებულება, რომ ჰემოროი მსხვილი ნაწლავის (კოლონისა და სწორი ნაწლავის) კიბოს იწვევს. კოლონის კიბო და ჰემოროი ძალიან განსხვავებული მდგომარეობებია, რომელთაც განავალში სისხლდენის გამოწვევა შეუძლია.

ამიტომ განავალში სისხლის შემჩნევისას ექიმთან მიმართვა მნიშვნელოვანია.

რა არის ჰემოროი (ბუასილი)?

მარტივად რომ ვთქვათ, ჰემოროი სწორი ნაწლავის (მსხვილი ნაწლავის ბოლო ნაწილის) ან ანუსის შეშუპებული ვენებია. ჰემოროის ტიპი მის მდებარეობაზეა დამოკიდებული:

შიდა ჰემოროი: სწორ ნაწლავში არსებულ ვენებს მოიცავს. აქ ტკივილს ვერ გრძნობთ. შესაძლოა ერთადერთი სიმპტომი სისხლდენა ან სწორ ნაწლავში სისავსის შეგრძნება იყოს.

გამოვარდნილი ჰემოროი: შიდა ჰემოროია, რომელიც გარეთ გამოსვლამდე გრძელდება. დაბანისას პაციენტებმა შეიძლება უმტკივნეულო კვანძი ან მოჭერა იგრძნონ. ის შეიძლება ქავილიანი და / ან მტკივნეული იყოს და თრომბი წარმოქმნას. გამოწვეული სისხლდენა ჩვეულებრივ კაშკაშა წითელია.

გარეთა ჰემოროი: ანუსის გარეთა ვენებს მოიცავს. ისინი შეიძლება გასკდეს ან გაწმენდისას ხახუნით სისხლმდენი გახდეს. შეიძლება ქავილიანი და / ან მტკივნეული იყოს და გამოვარდნილი ჰემოროის მსგავსად შიგნით თრომბიც განვითარდეს.

შეიძლება ჰემოროიმ კოლონისა და სწორი ნაწლავის კიბო გამოიწვიოს?

არ არსებობს მტკიცებულება, რომ ბუასილის პრობლემა კოლონისა და სწორი ნაწლავის კიბოს იწვევს. როგორც აღინიშნა, ორივე მდგომარეობას შეიძლება ერთმანეთის მსგავსი სიმპტომები და ჩივილები ჰქონდეს. აღსანიშნავია, რომ კოლონისა და სწორი ნაწლავის კიბო ნებისმიერ ასაკში შეიძლება განვითარდეს, თუმცა კოლორექტალური კიბოების უმრავლესობა 50 წლის ზემოთ ვითარდება. ამიტომ განსაკუთრებით ხანდაზმულ ასაკში ახლად გამოვლენილი სისხლი განავალში, დეფეკაციის ჩვევის ცვლილება, შეკრულობა და ანუსის მიდამოში სისავსის შეგრძნება ყურადღებას საჭიროებს.

- რა არის მსხვილი ნაწლავის — კოლონისა და სწორი ნაწლავის კიბო? რა მიზეზები და რისკფაქტორები აქვს?

რა არის ჰემოროის სიმპტომები და მისგან გამოწვეული ჩივილები?

ადამიანთა უმრავლესობა ჰემოროის პრობლემას სამედიცინო დახმარების გარეშე — მაგალითად, შეკრულობის წინააღმდეგ ზომების მიღებით — აგვარებს და ექიმს მხოლოდ ჩივილების გაუარესებისას მიმართავს.

როგორც შიდა, ისე გარეთა ჰემოროიმ შეიძლება რექტალური გამონადენი (კაშკაშა წითელი სისხლი) და ქავილი გამოიწვიოს.

შიდა ჰემოროი ჩვეულებრივ იწვევს გამოვარდნას ან უმტკივნეულო სისხლდენას, რომელსაც ტუალეტის ქაღალდზე სისხლის ან დეფეკაციასთან დაკავშირებული სისხლდენის სახით აღწერენ. გარეთა ჰემოროიმ შეშუპების გამო ანუსის მიდამოში უსიამოვნო შეგრძნება შეიძლება შექმნას.

რა შეიძლება გაკეთდეს ჰემოროის სამკურნალოდ?

თუ ანუსიდან სისხლდენა და / ან მასთან დაკავშირებული ჩივილები გაქვთ, თავდაპირველად ოჯახის ექიმს მიმართეთ. თუ დადგინდა, რომ ჩივილის მიზეზი მხოლოდ ჰემოროია, ცხოვრების წესისა და კვების სათანადო ცვლილებებით მას დიდი ალბათობით მოიშორებთ:

• შეკრულობის პრევენცია
• კვებაში ბოჭკოს წილის გაზრდა)
• უხვი სითხის დალევა (ალკოჰოლის გარდა)
• რეგულარული ვარჯიში

ექიმმა შეიძლება შემდეგი საშუალებების გამოყენება გირჩიოთ:

• ადგილობრივი საანესთეზიო (გამაყუჩებელი) მალამო / კრემი და
• ქავილის ან ტკივილისთვის შეიძლება ჰიდროკორტიზონის შემცველი კრემების გამოყენება.

ჰემოროის შემთხვევაში, რომელიც ცხოვრების წესის ცვლილებითა და მედიკამენტური მკურნალობით არ უმჯობესდება, განიხილება ოპერაცია ან მინიმალურად ინვაზიური (უოპერაციო) ტექნიკა.

- შეიძლება დაგაინტერესოთ: კვების რჩევები შეკრულობის დროს და კერძის რეცეპტის მაგალითი