ქალებში D ვიტამინის დონესა და კოლონისა და სწორი ნაწლავის კიბოს შორის შესაძლო კავშირი

დიდი დაკვირვებითი კვლევის შედეგებმა აჩვენა, რომ სისხლში D ვიტამინის დონესა და ქალებში კოლორექტული (მსხვილი ნაწლავის) კიბოს რისკს შორის კავშირი არსებობს. შედეგები Cancer Epidemiology, Biomarkers & Prevention ჟურნალში გამოქვეყნდა.
პლაზმის ან შრატის ნიმუშებში 25-ჰიდროქსივიტამინ D-ის [25 (OH) D] დონის შემსწავლელმა ადრეულმა დაკვირვებითმა კვლევებმა გარკვეული მხარდაჭერა აჩვენა D ვიტამინის მაღალ დონესა და კოლორექტული კიბოს შემცირებულ რისკს შორის კავშირისთვის. ძუძუსა და პროსტატის კიბოს რისკის შედეგები კი წინააღმდეგობრივი იყო.
კვლევა მელბურნის ერთობლივი კოჰორტული კვლევის ნაწილი იყო. ეს კვლევა ავსტრალიაში ჯანმრთელ ზრდასრულებზე დასაკვირვებლად 1990-იანი წლების დასაწყისში დაიწყო და კვებისა და ცხოვრების წესის არაგადამდებ დაავადებათა განვითარებაზე გავლენას პროსპექტიულად, ანუ მომავლის მიმართულებით, აფასებს.
კიბოს დიაგნოზის არმქონე 29.205 მონაწილის ძირითადი ჯგუფიდან შემთხვევითად შეარჩიეს 1332 ქალისა და 1664 მამაკაცის ქვეჯგუფი. შემთხვევები მოიცავდა მონაწილეებს, რომლებსაც 2007 წლის დეკემბრამდე კოლონ-სწორი ნაწლავის, ძუძუს ან პროსტატის კიბო დაუდგინდათ. ანალიზში შევიდა კოლორექტული კიბოს 547, ძუძუს კიბოს 634 და პროსტატის კიბოს 824 შემთხვევა.
კვლევის უმნიშვნელოვანესი აღმოჩენა იყო სისხლში D ვიტამინის მაღალ დონესა და ქალებში კოლორექტული კიბოს რისკს შორის უკუკავშირი: რისკის %48-ით შემცირება. თუმცა მამაკაცებში ასეთი რისკის შემცირების გამოვლენა.
საინტერესოა, რომ D-ის მაღალი დონის მქონე ადამიანებში BRAF V600E მუტანტური კოლორექტული კიბოს რისკი % 29-ით ნაკლები იყო. ამ მუტაციის დადებითობა კოლონისა და სწორი ნაწლავის კიბოებში დაახლოებით %10-ია.
სისხლში D ვიტამინის დონესა და ძუძუს ან პროსტატის კიბოს რისკს, ესტროგენის რეცეპტორის სტატუსს (ძუძუს კიბოში), სტადიას ან KRAS სტატუსს (კოლორექტულ კიბოში) შორის მნიშვნელოვანი კავშირი არ გამოვლენილა.
შენიშვნა: კვლევა სისხლში D ვიტამინის დონესა და ქალებში კოლორექტულ კიბოს შორის კავშირის დამადასტურებელ შედეგებს გვთავაზობს, მაგრამ მხოლოდ ამ შედეგებით მიზეზშედეგობრივ კავშირზე საუბარი არ შეიძლება. ანუ ვერ ვიტყვით, რომ D ვიტამინის დანამატი ქალებს კოლორექტული კიბოსგან იცავს: იმ ქალებში, რომლებსაც კოლორექტული კიბო ნაკლებად უვითარდებათ, D ვიტამინის მაღალი დონის სხვა მიზეზებიც შეიძლება არსებობდეს. ეს კვლევა სხვა მიზეზებს არ ავლენს და მკაფიო მიზეზშედეგობრივ კავშირს ვერ ხსნის.
წყაროები
Circulating 25-hydroxyvitamin D concentration and risk of breast, prostate, and colorectal cancers: the Melbourne Collaborative Cohort Study.
Cancer Epidemiol Biomarkers Prev, 6 March 2019.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.