კლასში პირველი პრეპარატი ტარლატამაბი წვრილუჯრედოვან ფილტვის კიბოში FDA-მ დაამტკიცა

პლატინაზე დაფუძნებული ქიმიოთერაპიისას ან მის შემდეგ დაავადების პროგრესირების მქონე, გავრცელებული სტადიის წვრილუჯრედოვანი ფილტვის კიბოს (KHAK) სამკურნალოდ tarlatamab-dlle-მ (Imdelltra, Amgen, Inc.) 16 მაისს, 2024 წელს FDA-ს (აშშ-ის სურსათისა და წამლების ადმინისტრაცია) დაჩქარებული დამტკიცება მიიღო.

კლასში პირველი ბისპეციფიკური (ორმაგი მოქმედების) პრეპარატი

კლასში პირველი ბისპეციფიკური პრეპარატი სრულიად ახალ ტიპს ნიშნავს, რომლის მსგავსი მექანიზმი ან სამიზნე მანამდე არ შემუშავებულა. Tarlatamab-dlle პირველი პრეპარატია, რომელსაც ერთდროულად სიმსივნის უჯრედების DLL3 ცილასთან და იმუნური უჯრედების CD3 ცილასთან შეუძლია შეკავშირება. იმუნური სისტემის გააქტიურებით ის სიმსივნური უჯრედების განადგურებას ისახავს მიზნად. ორმაგ სამიზნეზე მოქმედებას ტრადიციულ მკურნალობაზე მეტი ეფექტიანობისა და ნაკლები გვერდითი ეფექტების პოტენციალი შეიძლება ჰქონდეს. ამ მხრივ ტარლატამაბი მიზნობრივ მკურნალობად / „ჭკვიან“ პრეპარატად განიხილება.

ტარლატამაბი კლასში პირველი ბისპეციფიკური T უჯრედების აქტივატორია (BiTE), რომელიც უჯრედების, მათ შორის სიმსივნური უჯრედების, ზედაპირზე დელტას მსგავს ლიგანდ 3-ს (DLL3) და T უჯრედების ზედაპირზე ექსპრესირებულ CD3-ს უკავშირდება. ეს იწვევს T უჯრედების გააქტიურებას, ანთებითი ციტოკინების გამოყოფასა და DLL3-ის გამომხატველი კიბოს უჯრედების დაშლას.

FDA-ს დამტკიცება DeLLphi-301 კვლევის საფუძველზე

ეფექტიანობა შეფასდა ღია, მულტიცენტრულ, მრავალკოჰორტულ DeLLphi-301 კვლევაში ჩართულ, პლატინაზე დაფუძნებული ქიმიოთერაპიის შემდეგ პროგრესირებული, რეციდიული/მკურნალობარეზისტენტული გავრცელებული სტადიის KHAK-ის მქონე 99 პაციენტში.

სიმპტომური თავის ტვინის მეტასტაზების, ფილტვის ინტერსტიციული დაავადების ან არაინფექციური პნევმონიტისა და აქტიური იმუნოდეფიციტის მქონე პაციენტები გამორიცხეს. ტარლატამაბი ინიშნებოდა პროგრესირებამდე ან მიუღებელ ტოქსიკურობამდე.

ეფექტიანობის მთავარი საზომები იყო საერთო პასუხის მაჩვენებელი (ORR= overall response rate) და პასუხის ხანგრძლივობა.

• საერთო პასუხის მაჩვენებელი 40% (95% CI: 31, 51) იყო, ხოლო მკურნალობაზე მოპასუხე პაციენტებში პასუხის მედიანური ხანგრძლივობა 9,7 თვე (დიაპაზონი 2,7, 20,7+) იყო.

პლატინისადმი მგრძნობელობის მონაცემების მქონე 69 პაციენტში საერთო პასუხის მაჩვენებელი იყო:

• პლატინარეზისტენტული KHAK-ის მქონე 27 პაციენტში 52% (95% CI 32, 71) (პროგრესირება პლატინის ბოლო დოზიდან < 90 დღეში) და
• პლატინამგრძნობიარე KHAK-ის მქონე 42 პაციენტში 31% (95% CI 18, 47) (პროგრესირება პლატინის ბოლო დოზიდან ≥ 90 დღეში).

Tarlatamab-dlle-ის დანიშვნის ინფორმაცია შეიცავს ჩარჩოში მოქცეულ გაფრთხილებას მძიმე ან სიცოცხლისთვის საშიში ციტოკინების გამოთავისუფლების სინდრომისა (CRS) და ნევროლოგიური ტოქსიკურობის, მათ შორის იმუნურ ეფექტორულ უჯრედებთან დაკავშირებული ნეიროტოქსიკურობის სინდრომის (ICANS), შესახებ. ყველაზე ხშირი გვერდითი რეაქციები (20%-ზე მეტი) იყო CRS, დაღლილობა, ცხელება, დისგევზია (გემოვნების დარღვევა), უმადობა, კუნთ-ძვლოვანი ტკივილი, შეკრულობა, ანემია და გულისრევა. ყველაზე ხშირი ხარისხი 3 ან 4 ლაბორატორიული დარღვევები (≥5%) იყო ლიმფოციტებისა და ნატრიუმის შემცირება, შარდმჟავას მატება, საერთო ნეიტროფილებისა და ჰემოგლობინის შემცირება, აქტივირებული ნაწილობრივი თრომბოპლასტინის დროის მატება და კალიუმის შემცირება.

რეკომენდებული დოზაა 1. ციკლის 1. დღეს ინტრავენური ინფუზიით 1 საათში შეყვანილი საწყისი 1 mg, შემდეგ 1. ციკლის 8. და 15. დღეს 10 mg, შემდეგ კი ყოველ 2 კვირაში დაავადების პროგრესირებამდე ან მიუღებელ ტოქსიკურობამდე.