მეტასტაზური კოლორექტალური კიბოს მკურნალობის ახალი ვარიანტი — Fruquintinib-მა FDA-ს დამტკიცება მიიღო

მეტასტაზური კოლორექტალური კიბოს (mKRK) მქონე მოზრდილი პაციენტებისთვის, რომლებსაც მანამდე fluoropyrimidine-ზე, oxaliplatin-სა და irinotecan-ზე დაფუძნებული ქიმიოთერაპია, anti-VEGF და RAS-ის ველური ტიპისა და სამედიცინო შესაბამისობის შემთხვევაში anti-EGFR მკურნალობა ჰქონდათ მიღებული, fruquintinib-მა (Fruzaqla, Takeda Pharma.) 2023 წლის 8 ნოემბერს FDA-ს (აშშ-ის სურსათისა და მედიკამენტების ადმინისტრაცია) დამტკიცება მიიღო.

როგორია Fruquintinib-ის მოქმედების მექანიზმი?

Fruquintinib პერორალური ტიროზინკინაზის ინჰიბიტორია, რომელიც მეტასტაზური კოლორექტალური კიბოს მკურნალობაში გამოიყენება. მისი მოქმედება მიმართულია სისხლძარღვთა ენდოთელური ზრდის ფაქტორის (VEGF) გზებისკენ, რომლებიც კიბოს უჯრედების ზრდასა და გავრცელებაში კრიტიკულ როლს ასრულებს. VEGF სიმსივნისთვის ახალი სისხლძარღვების წარმოქმნას (ანგიოგენეზს) და, შესაბამისად, მის კვებასა და ზრდას უზრუნველყოფს. Fruquintinib VEGF რეცეპტორების ბლოკირებით ამ პროცესს თრგუნავს, რითაც სიმსივნის ზრდას ზღუდავს და კიბოს უჯრედების მეტასტაზირების უნარს ამცირებს. ამ მექანიზმით fruquintinib განსაკუთრებით სხვა მკურნალობებისადმი რეზისტენტული მეტასტაზური კოლორექტალური კიბოს უჯრედების საკონტროლოდ გამოიყენება.

FDA-ს დამტკიცება FRESCO-2 კვლევის საფუძველზე

ეფექტიანობა FRESCO-2 და FRESCO კვლევებში შეფასდა.

საერთაშორისო, მრავალცენტრიანმა, რანდომიზებულმა, ორმაგად ბრმა, პლაცებოკონტროლირებულმა FRESCO-2 კვლევამ შეაფასა mKRK-ის მქონე 691 პაციენტი, რომელთაც დაავადება გაუპროგრესირდათ fluoropyrimidine-ზე, oxaliplatin-სა და irinotecan-ზე დაფუძნებული ქიმიოთერაპიის, anti-VEGF ბიოლოგიური მკურნალობის, RAS-ის ველური ტიპის შემთხვევაში anti-EGFR ბიოლოგიური მკურნალობისა და trifluridine/tipiracil-ის ან regorafenib-ის სულ მცირე ერთის მიღების შემდეგ.

ჩინეთში ჩატარებულმა მრავალცენტრიანმა, პლაცებოკონტროლირებულმა FRESCO კვლევამ შეაფასა მეტასტაზური კოლორექტალური კიბოს მქონე 416 პაციენტი, რომელთაც დაავადება fluoropyrimidine-ზე, oxaliplatin-სა და irinotecan-ზე დაფუძნებული ქიმიოთერაპიის შემდეგ გაუპროგრესირდათ.

ორივე კვლევაში პაციენტები შემთხვევითად განაწილდნენ, რომ ყოველი 28-დღიანი ციკლის პირველ 21 დღეს პერორალურად დღეში ერთხელ 5 mg fruquintinib ან პლაცებო და საუკეთესო მხარდამჭერი მოვლა მიეღოთ (2:1).

პაციენტები მკურნალობას დაავადების პროგრესირებამდე ან მიუღებელ ტოქსიკურობამდე იღებდნენ.

ორივე კვლევაში ეფექტიანობის მთავარი საზომი საერთო გადარჩენა იყო.

შედეგები

• FRESCO-2-ში fruquintinib-ით ნამკურნალებთა საერთო გადარჩენის მედიანა 7,4 თვე იყო (95% GA: 6,7, 8,2), პლაცებოს ჯგუფში კი 4,8 თვე (95% GA: 4,0, 5,8) (HR 0,66 [95% GA: 0,55, 0,80] p-მნიშვნელობა < 0,001).
• FRESCO-ში შესაბამისი მკურნალობის ჯგუფების საერთო გადარჩენის მედიანა 9,3 თვე (95% GA: 8,2, 10,5) და 6,6 თვე იყო (95% GA: 5,9, 8,1) (HR 0,65 [95% GA: 0,51, 0,83] p-მნიშვნელობა < 0,001).

ყველაზე ხშირი არასასურველი რეაქციები (პაციენტთა 20%-ზე მეტში) იყო ჰიპერტენზია, ხელისგულ-ტერფის ერითროდისესთეზია, პროტეინურია, დისფონია, მუცლის ტკივილი, დიარეა და ასთენია.

Fruquintinib-ის რეკომენდებული დოზაა პერორალურად დღეში ერთხელ 5 mg, ყოველი 28-დღიანი ციკლის პირველ 21 დღეს, საკვებთან ერთად ან მის გარეშე, დაავადების პროგრესირებამდე ან მიუღებელ ტოქსიკურობამდე.