Metastatik kolorektal xərçəngdə yeni müalicə seçimi – Fruquintinib FDA təsdiqi aldı

Daha əvvəl fluoropirimidin, oksaliplatin və irinotekan əsaslı kimyaterapiya, anti-VEGF və RAS vəhşi tipdirsə, tibbi baxımdan uyğundursa anti-EGFR müalicəsi almış yetkin metastatik kolorektal xərçəng (mKRK) xəstələri üçün fruquintinib (Fruzaqla, Takeda Pharma.) 8 noyabr 2023-cü ildə FDA (ABŞ Qida və Dərman İdarəsi) təsdiqi aldı.

Fruquintinibin təsir mexanizmi necədir?

Fruquintinib metastatik kolorektal xərçəngin müalicəsində istifadə edilən, ağızdan qəbul olunan tirozin kinaza inhibitorudur. Təsir mexanizmi xərçəng hüceyrələrinin böyüməsində və yayılmasında mühüm rol oynayan vaskulyar endotelial böyümə faktoru (VEGF) yollarını hədəfləməyə əsaslanır. VEGF şişlərin yeni qan damarları yaratmasını (angiogenez), bununla da şişlərin qidalanmasını və böyüməsini təmin edir. Fruquintinib VEGF reseptorlarını bloklayaraq bu prosesi ləngidir, beləcə şişin böyüməsini məhdudlaşdırır və xərçəng hüceyrələrinin metastaz vermə qabiliyyətini azaldır. Bu mexanizmlə fruquintinib xüsusən digər müalicələrə davamlı metastatik kolorektal xərçəng hüceyrələrini nəzarət altına almaq üçün istifadə olunur.

FRESCO-2 tədqiqatı ilə gələn FDA təsdiqi

Effektivlik FRESCO-2 və FRESCO tədqiqatlarında qiymətləndirildi.

Beynəlxalq, çoxmərkəzli, randomizə edilmiş, ikiqat kor, plasebo nəzarətli FRESCO-2 tədqiqatı daha əvvəl fluoropirimidin, oksaliplatin, irinotekan əsaslı kimyaterapiya, anti-VEGF bioloji müalicəsi və RAS vəhşi tipdirsə anti-EGFR bioloji müalicəsi, həmçinin trifluridin/tipirasil və ya regorafenibdən ən azı birini alıb xəstəliyi irəliləmiş 691 mKRK xəstəsini qiymətləndirdi.

Çində aparılmış çoxmərkəzli, plasebo nəzarətli FRESCO tədqiqatı daha əvvəl fluoropirimidin, oksaliplatin və irinotekan əsaslı kimyaterapiya alıb xəstəliyi irəliləmiş 416 metastatik kolorektal xərçəng xəstəsini qiymətləndirdi.

Hər iki tədqiqatda xəstələr hər 28 günlük dövrün ilk 21 günü ərzində gündə bir dəfə ağızdan 5 mg fruquintinib və ya plasebo, üstəlik ən yaxşı dəstəkləyici qulluq (2:1) alacaq şəkildə təsadüfi qruplara ayrıldılar.

Xəstələr xəstəlik irəliləyənə və ya qəbuledilməz toksiklik yaranana qədər müalicə aldılar.

Hər iki tədqiqatda əsas effektivlik nəticəsi ümumi sağqalım idi.

Nəticələr

• FRESCO-2-də fruquintinib ilə müalicə olunanlarda median ümumi sağqalım 7,4 ay idi (95% GA: 6,7, 8,2), plasebo qrupunda isə 4,8 ay idi (95% GA: 4,0, 5,8) (HR 0,66 [95% GA: 0,55, 0,80] p-dəyəri < 0,001).
• FRESCO-da müalicə qollarında median ümumi sağqalım müvafiq olaraq 9,3 ay (95% GA: 8,2, 10,5) və 6,6 ay (95% GA: 5,9, 8,1) idi (HR 0,65 [95% GA: 0,51, 0,83] p-dəyəri < 0,001).

Ən çox rast gəlinən arzuolunmaz reaksiyalar (xəstələrin 20%-dən çoxunda bildirilən) hipertoniya, palmar-plantar eritrodizesteziya, proteinuriya, disfoniya, qarın ağrısı, ishal və asteniya idi.

Fruquintinibin tövsiyə edilən dozası xəstəlik irəliləyənə və ya qəbuledilməz toksiklik yaranana qədər hər 28 günlük dövrün ilk 21 günü ərzində gündə bir dəfə ağızdan 5 mg olmaqla, qida ilə və ya qidasız qəbul edilməsidir.