ნაღვლის კენჭები შესაძლოა პანკრეასის კიბოს წინასწარი ნიშანი იყოს

გამოქვეყნდა კვლევა, რომელიც ვარაუდობს, რომ შესაძლოა კავშირი არსებობდეს ნაღვლის კენჭებსა და პანკრეასის კიბოს ყველაზე ხშირ ტიპს – „პანკრეასის სადინრულ ადენოკარცინომას“ – შორის. აღმოჩნდა, რომ დიაგნოზის დასმამდე პანკრეასის კიბოს მქონე პაციენტებში, კიბოს არმქონე პირებთან შედარებით, ნაღვლის კენჭოვანი დაავადების არსებობის ალბათობა 6-ჯერ უფრო მაღალი იყო.

პანკრეასის კიბოსა და ნაღვლის კენჭებს შორის კავშირის შესახებ

მასაჩუსეტსის შტატში მდებარე ბოსტონის სამედიცინო ცენტრის დოქტორმა ტევია საქსმა კვლევის შესახებ განაცხადა:

"ამჟამად დანამდვილებით ვერ ვიტყვით, ნაღვლის კენჭოვანი დაავადება პანკრეასის კიბოს წინასწარი ნიშანია თუ პანკრეასის კიბოს განვითარებას იწვევს, თუმცა ვიცით, რომ კავშირი არსებობს, და შემდგომ კვლევებს ვგეგმავთ. არ გვინდა, ნაღვლის კენჭოვანი დაავადების მქონე ადამიანებმა იფიქრონ, რომ პანკრეასის კიბო აქვთ ან განუვითარდებათ, რადგან აშკარაა, რომ მათ უდიდეს უმრავლესობას პანკრეასის კიბო არ აქვს. თუმცა სპეციალისტებს შეგვიძლია ვუთხრათ: თუ მათ პაციენტს ნაღვლის ბუშტის კენჭები აქვს და სხვა სიმპტომებიც აღენიშნება, ამ სიმპტომების მიზეზად მხოლოდ კენჭები არ უნდა მიიჩნიონ. სიმპტომების მქონე პაციენტებში, რომელთა მდგომარეობაც მხოლოდ ტიპური ნაღვლის კენჭებით ვერ აიხსნება, პანკრეასის კიბოს დიაგნოზიც უნდა იქნეს გათვალისწინებული." ასე აღნიშნა მან.

პანკრეასის კიბო ხშირად სიცოცხლისთვის საშიში დაავადებაა, რადგან უმეტესად შორსწასულ სტადიებამდე შეუმჩნეველი რჩება და ადრეულ ეტაპზე დიაგნოზი ვერ ისმება.

ადრეულ დიაგნოსტიკას ისიც ართულებს, რომ პანკრეასის კიბოს სიმპტომები ხშირად ნაღვლის კენჭოვანი დაავადებისა და ნაღვლის ბუშტის ინფექციების სიმპტომებს ჰგავს. დამტკიცებულია, რომ ორივე მდგომარეობა პანკრეასის კიბოს რისკფაქტორია.

• დაკავშირებული თემა: ნაღვლის სადინრის კენჭოვანი დაავადების – ქოლედოქოლითიაზის – სიმპტომები და მკურნალობა

პანკრეასის კიბოსა და ნაღვლის კენჭოვანი დაავადების წლიური სიხშირე

მოცემული კვლევის მიზანი იყო ზოგად მოსახლეობაში პანკრეასის კიბოს წლიური სიხშირის შედარება ქოლელითიაზისა (ნაღვლის ბუშტში კენჭების წარმოქმნა) და ქოლეცისტიტის (ნაღვლის ბუშტის ანთება) სიხშირესთან პანკრეასის კიბოს დიაგნოზის დასმამდე ერთი წლის განმავლობაში.

კვლევაში ჩაერთო პანკრეასის კიბოს მქონე სულ 18700 პაციენტი, რომლებიც აშშ-ის SEER-Medicare-ის მონაცემთა ბაზაში 2008-დან 2015 წლამდე იყვნენ რეგისტრირებული; ასაკის მედიანა 76 წელი იყო. პანკრეასის კიბოს დიაგნოზის დასმამდე წინა წელს ნაღვლის კენჭოვანი დაავადების გამო საავადმყოფოში მიმართვის სიხშირე შეადარეს SEER-Medicare-ში რეგისტრირებულ, კიბოს არმქონე ნაღვლის კენჭოვანი დაავადების მქონე პირთა სიხშირეს.

კიბოს არმქონე ჯგუფში ყოველწლიურად საშუალოდ 99287 პაციენტი იყო; მათგან 0,8%-ს ნაღვლის კენჭოვანი დაავადება ჰქონდა, ხოლო 0,3%-ს ნაღვლის ბუშტი ამოკვეთილი ჰქონდა. ამის საპირისპიროდ, პანკრეასის სადინრული ადენოკარცინომის (PDAK) მქონე პირების 4,7%-ს დიაგნოზამდე წინა წელს ნაღვლის კენჭები ჰქონდა დიაგნოსტირებული, ხოლო 1,6%-ს ნაღვლის ბუშტი ამოკვეთილი ჰქონდა.

დასკვნის სახით, ნაღვლის კენჭები პანკრეასის კიბოს არ იწვევს; შესაბამისად, პრევენციის მიზნით ნაღვლის ბუშტის ამოკვეთა პანკრეასის კიბოს რისკის შემამცირებელი ჩარევა არ არის. თუმცა პანკრეასის კიბოსა და ნაღვლის კენჭებს შორის კავშირის და ორივე მდგომარეობის საერთო მიზეზების (სიმსუქნის, მეტაბოლური სინდრომისა და ხანდაზმული ასაკის და სხვ.) გაგებამ შეიძლება პანკრეასის კიბოს, რომელსაც მაღალი სიკვდილიანობა (სიცოცხლის დაკარგვა) ახასიათებს, უფრო ადრეული დიაგნოსტიკისა და მკურნალობის შესაძლებლობა შექმნას.