ნივოლუმაბი იშვიათი მუტაციის მქონე შორსწასულ სიმსივნეებში იმედისმომცემია

ESMO 2020-ის ვირტუალურ კონგრესზეწარდგენილი საყურადღებო კვლევა აჩვენებს, რომ POLE გენის ეგზონუკლეაზურ დომენში პათოგენური მუტაციის (edPOLE) მქონე, დნმ-ის შეუსაბამობის რეპარაციის მექანიზმში (MMR) დარღვევის არმქონე შორსწასულ სიმსივნეებში ნივოლუმაბით (Opdivo) იმუნოთერაპია, როგორც ერთპრეპარატიანი მკურნალობა, პასუხისა და დაავადების კონტროლის მაღალ მაჩვენებელს უზრუნველყოფს.
POLE გენი პასუხისმგებელია მნიშვნელოვანი ცილის წარმოქმნაზე, რომელიც დნმ-ის რეპარაციასა და გამრავლებაში მონაწილეობს. მკვლევართა გუნდის წევრი Dr. Rousseau აღნიშნავს, რომ edPOLE მუტაციები იშვიათია და ამიტომ ნივოლუმაბის ეფექტიანობა იმ პაციენტებში, რომელთაც MMR გამართულად მუშაობს და აქვთ edPOLE მუტაცია, არ გამოცდილა. თუმცა მკვლევრები აღნიშნავენ, რომ ეს მუტაციები დნმ-ის გამრავლებისას მნიშვნელოვან შესწორების მექანიზმში (proofreading) დარღვევებსა და მრავალი მუტაციის დაგროვებას იწვევს და ასეთი გენეტიკის მქონე სიმსივნეები იმუნოთერაპიებისთვის შეიძლება სამიზნე გახდეს.
მოკლედ, კვლევაში მკვლევრებმა შეისწავლეს POLE გენის ეგზონუკლეაზური დომენი, რომლის მნიშვნელობაც კიბოს მკურნალობისთვის მანამდე ნაკლებად იყო ცნობილი, და იქ იშვიათი მუტაციები აღმოაჩინეს. შემდეგ შეამოწმეს, ეფექტიანია თუ არა ნივოლუმაბი ამ მუტაციების მქონე პაციენტებში.
კვლევის დეტალები
ანტი-PD-1 ანტისხეულის, ნივოლუმაბის, იშვიათ სიმსივნეებში ეფექტიანობის შესასწავლად დაგეგმილ 2 ფაზის კლინიკურ კვლევაში პაციენტები ნივოლუმაბს ყოველ ორ კვირაში ინტრავენურად იღებდნენ. ეს პროცესი დაავადების პროგრესირებამდე ან მოულოდნელი გვერდითი მოვლენის გამოვლენამდე, მაქსიმუმ 2 წელი გრძელდებოდა.

ნივოლუმაბმა პათოგენური მუტაციის მქონე პაციენტებში უკეთესი შედეგები აჩვენა
კვლევაში ჩართული 16 პაციენტის %50-ში პათოგენურ მდგომარეობას გამომწვევი edPOLE მუტაცია გამოვლინდა; 3 პაციენტში დადგინდა გაურკვეველი მნიშვნელობის მუტაციები, ხოლო 5 პაციენტში — არაპათოგენური მუტაციები.
12 კვირაზე ჩატარებული გაზომვების შედეგად საერთო პასუხის მაჩვენებელი %38 იყო; დაფიქსირდა, რომ 5 პაციენტს ნაწილობრივი პასუხი ჰქონდა, ხოლო 6 პაციენტს დაავადება სტაბილურად მიმდინარეობდა. პათოგენური მუტაციის მქონე ჯგუფში საერთო პასუხის მაჩვენებელი %50 აღმოჩნდა და სტაბილური დაავადების მქონე ორ პაციენტთან ერთად დაავადების კონტროლის მაჩვენებელი %75 იყო. მეორე მხრივ, გაურკვეველი მნიშვნელობის მუტაციის მქონე 3 პაციენტიდან 2-მა მკურნალობას უპასუხა, ხოლო 1-ში დაავადების სტაბილური მიმდინარეობა გამოვლინდა. არაპათოგენური მუტაციის მქონე 5 პაციენტის ჯგუფში კი დაავადების პროგრესირება და ორი პაციენტის სიკვდილი დაფიქსირდა.
კვლევაში, რომელშიც პროგრესირების გარეშე გადარჩენასა (PFS) და საერთო გადარჩენას ზომავდნენ, პათოგენური მუტაციის არმქონე ჯგუფის PFS იყო 1,1 თვე, ხოლო პათოგენური ან გაურკვეველი მნიშვნელობის მუტაციის მქონე ჯგუფში ეს მაჩვენებელი 5,6 თვე იყო. საერთო გადარჩენა პათოგენური მუტაციის არმქონე პაციენტთა ჯგუფში 5,3 თვე აღმოჩნდა, ხოლო მეორე ჯგუფისთვის კვლევის გამოქვეყნების მომენტში ამ მონაცემის განსაზღვრა ვერ მოხერხდა.
შეჯამება
ეს კვლევა POLE მუტაციის მქონე და MMR-ის დარღვევის არმქონე სიმსივნეებში ანტი-PD1 აგენტ ნივოლუმაბის შეფასების პირველ კლინიკურ კვლევას წარმოადგენს. მკვლევრები ასკვნიან, რომ ნივოლუმაბი edPOLE მუტაციის მქონე, MMR-ის დარღვევის არმქონე შორსწასული კიბოს მქონე პაციენტების მკურნალობაში იმედისმომცემად გამოიყურება, თუმცა ეს ეფექტი შესაძლოა მხოლოდ პათოგენური მუტაციის მქონე სიმსივნეებით შემოიფარგლებოდეს.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.