ინოვაციების მიტანა კიბოს პაციენტებამდე! რა გველის ESMO-ს ვირტუალურ კონგრესზე 2020?

მსოფლიოს მასშტაბით ონკოლოგიის პროფესიონალების გამაერთიანებელი ევროპის კიბოს კონგრესი ESMO 2020წელს COVID-19 პანდემიის გამო ვირტუალურად ჩატარდება და ძირითადი სამეცნიერო პროგრამა 19 სექტემბერს დაიწყება.

ევროპის კლინიკური ონკოლოგიის საზოგადოება (European Society for Medical Oncology, ESMO), დაარსების, 1975 წლიდან, კიბოს კვლევების მხარდაჭერის მისიას ახორციელებს, უმთავრესად ევროპაში, თუმცა მთელი მსოფლიოდანაც.

წელს პირველად ვირტუალურად ჩატარებული ESMO კონგრესი COVID-19-ის მიმდინარე ეპოქაში ონკოლოგებს კიბოს მკურნალობის შედეგების გასაუმჯობესებლად აკავშირებს.

მკურნალობის გამორჩეული წინსვლები ESMO 2020-ზე

წელს ESMO 2020-ის მთავარი თემები იქნება ზედა კუჭ-ნაწლავის ტრაქტის სიმსივნეებსა და თირკმლის კიბოში იმუნოთერაპიის გამოყენება და ფილტვის არაწვრილუჯრედოვან კიბოში(KDHAK) ALK და EGFR გენეტიკური ცვლილებების სამიზნე მიზნობრივი პრეპარატების კვლევები.

შორსწასული კუჭ-ნაწლავის კიბოების ძირითადი მკურნალობა ჯერ კიდევ ქიმიოთერაპიაა და ბოლო წლებში ამ სფეროში იმუნოთერაპიაში მცირე წინსვლა მოხდა. წელს დადებით იმუნოთერაპიულ შედეგებს არა მხოლოდ შორსწასულ, არამედ ლოკალურად შორსწასულ (3) სტადიის კუჭ-ნაწლავის კიბოების ოპერაციის შემდგომ ადიუვანტურ (დამცავ) მკურნალობაშიც ველით.

წარმოდგენილი იქნება ფილტვის კიბოს 2 საყურადღებო კვლევა, რომელთა შედეგებს მიმდინარე სამკურნალო სტანდარტების შეცვლის პოტენციალი აქვს. ერთია შორსწასული ALK-დადებითი KHDAK-ის მქონე პაციენტთა პირველ ხაზში ლორლატინიბისა და კრიზოტინიბის შემდარებელი CROWN 3 ფაზის კლინიკური კვლევა. მეორეა ოპერირებულ, EGFR მუტაციაზე დადებით KHDAK-ის პაციენტებში ადიუვანტური ოსიმერტინიბის ტვინის მეტასტაზებზე შედეგების წარმომდგენი ADURA 3 ფაზის კვლევა.

შორსწასული თირკმლის კიბოსთვის ჩატარებული CheckMate 9ER კვლევისგანაც საყურადღებო შედეგებს ველით. მასში c-Met-ისა და VEGFR2-ის ინჰიბიტორი კაბოზანტინიბი (Cabometyx) იმუნოთერაპია ნივოლუმაბთან (Opdivo) გაერთიანდა და სუნიტინიბს (Sutent) შეადარეს.

გასულ წელს შორსწასული თირკმლის კიბოს პირველი ხაზის მკურნალობაში აქსიტინიბის (Inlyta) პემბროლიზუმაბთან (Keytruda) ან აველუმაბთან (Bavencio) კომბინაციის შთამბეჭდავი შედეგებისა და FDA დამტკიცებების მოწმენი გავხდით.

წელს წარმოდგენილი იქნება არა მხოლოდ სიცოცხლის გახანგრძლივების კვლევითი მონაცემები, არამედ მრავალი კლინიკური კვლევის ცხოვრების ხარისხის შედეგებიც. კიბოს პაციენტებში ცხოვრების ხარისხი თავად სიცოცხლის არანაკლებ მნიშვნელოვანი საკითხია, თუმცა ხშირად უგულებელყოფილია.

პროსტატის კიბოს 3 ფაზის IPATential150 კვლევისგანაც საყურადღებო შედეგებს ველით. ამ კვლევაში ჩაერთნენ მეტასტაზური ჰორმონული დათრგუნვისადმი რეზისტენტული პროსტატის კიბოს პაციენტები და აბირატერონი (Zytiga) პლუს იპატასერტიბი აბირატერონ პლუს პლაცებოს შეადარეს. იპატასერტიბი Akt-ის სამიზნე მცირე მოლეკულური ტიროზინკინაზის ინჰიბიტორი აგენტია.

ამ კვლევების გარდა სამმაგად უარყოფით ძუძუს კიბოშიჩატარებული ASCENT ცდის შედეგებისა და კიბოს პაციენტებში COVID-19-ის ეფექტებისგაზიარების სხვა საყურადღებო პრეზენტაციებიც გაიმართება.

ESMO 2020-ის სლოგანი: ინოვაციების მიტანა კიბოს პაციენტებამდე!

მართლაც, წლევანდელი „ინოვაციების მიტანა კიბოს პაციენტებამდე“ სლოგანი ხაზს უსვამს სამეცნიერო სიახლეებისა და უახლესი მკურნალობების კლინიკურ პრაქტიკაში შეტანის გადაუდებელ საჭიროებას. ვიცით, რომ ყოველთვიურად ახალი წამლები მტკიცდება, თუმცა მათ მსოფლიო მასშტაბით პაციენტებამდე მიტანასა და სხვადასხვა ქვეყნის ჯანდაცვის უწყებების მიერ ლიცენზირებაში შეიძლება შეფერხებები იყოს. კიდევ ერთხელ შეგახსენებთ, რომ პაციენტებისთვის ახალ წამლებზე უფასო წვდომის ყველაზე მარტივი გზა კიბოს კლინიკური კვლევებია .  

გახსნის ცერემონიის მთავარი გმირები T-უჯრედებია

ESMO-სა და 2020 წლის კონგრესის პრეზიდენტმა Solange Peters-მა განაცხადა, რომ გახსნის ცერემონია ონკოლოგებისთვის აუცილებლად სანახავი იქნება. აშშ-ის Jonsson-ის კიბოს ყოვლისმომცველი ცენტრის Prof. Antoni Ribas კიბოს მეცნიერების მოწინავე მიღწევებზე T-უჯრედებისმიერ კიბოს რეგრესიის გამოწვევას განმარტავს. ამ მექანიზმების უკეთ გაგება ახალი თაობის იმუნოთერაპიებზე (იმუნური საკონტროლო წერტილების ინჰიბიტორებზე) უპასუხო კიბოს ტიპების უკეთ გაგების საშუალებას მოგვცემს.

კიბო და COVID-19

მსოფლიოში COVID-19-ზე საუბრისას ყველაზე ცნობილი მეცნიერია აშშ-ის ჯანმრთელობის ეროვნული ინსტიტუტების ალერგიისა და ინფექციურ დაავადებათა ეროვნული ინსტიტუტის დირექტორი Dr. Fauci. Fauci-მ გასულ კვირას განაცხადა: „ამ დაავადების მნიშვნელოვანი ასპექტია, რომ ინფიცირებულთა დაახლოებით %40-45 უსიმპტომოა.“ დაავადების უსიმპტომოდ გამავრცელებელი ადამიანების (უსიმპტომო მატარებელი) სიმრავლე პანდემიასთან ბრძოლას ძლიერ ართულებს. Fauci ხაზს უსვამს, რომ გადაცემა ყველაზე ხშირად ახლო კონტაქტით ხდება (სახლსა და ჯანდაცვის გარემოში).

ESMO 2020-ზე COVID-19-ის გავლენა კიბოს მკურნალობაზე მკაფიოდ იქნება წარმოჩენილი. პანდემიის გამო ჯანდაცვის კვლევებისთვის განკუთვნილი რესურსების დიდი ნაწილიც COVID-19-ზე გადამისამართდა. ამას მოკლე და გრძელვადიანი შედეგები ექნება.

წელს, სხვა წლებისგან განსხვავებით, კლინიკებში აქტიურად მომუშავე ექიმების გარდა, კონგრესში მნიშვნელოვან წვლილს საბაზისო მეცნიერებების მკვლევრებისა და ჯანდაცვის ინფორმატიკის სპეციალისტებისგანაც ველით.

ESMO 2020-ს ყურადღებით მივადევნებთ თვალს და სიახლეებს გაგიზიარებთ.