ონკოლოგიის ერთ-ერთი ნამდვილი გიგანტი, დოქტორი Jose Baselga, 61 წლის ასაკში გარდაიცვალა

ონკოლოგიის სამყარო გლოვობს საერთაშორისო სახელის მქონე ონკოლოგსა და კიბოს მკვლევარს, დოქტორ Jose Baselga-ს, რომელიც 61 წლის ასაკში გარდაიცვალა.
ძუძუს კიბოს მიზნობრივი მკურნალობების მამა
კიბოს კვლევის ამერიკული ასოციაცია აღნიშნავს, რომ Baselga-ს კვლევებმა ძუძუს კიბოს მქონე პაციენტთა გადარჩენა მნიშვნელოვნად გააუმჯობესა. მან წამყვანი როლი შეასრულა ამ დაავადების ბედის შემცვლელი წამლების — trastuzumab (Herceptin), lapatinib (Tykerb), pertuzumab (Perjeta) და everolimus-ის (Afinitor) — კლინიკურ კვლევებში .
საფრანგეთის ვილჟუიფში Gustave Roussy-ის (ევროპის ყველაზე ყოვლისმომცველი კიბოს ცენტრი) გენერალურმა დირექტორმა Jean-Charles Soria-მ დაწერა: „ონკოლოგიის ერთ-ერთი ნამდვილი გიგანტი და ყველაზე ნათელი გონება, ვინც მიცნია. მან თანამედროვე ონკოლოგია ჩამოაყალიბა და მრავალი სიცოცხლე გადაარჩინა“. Baselga ნამდვილ მეგობრად და მენტორად მოიხსენია და თქვა, რომ მისი სიკვდილის გაგებამ გაანადგურა.
Baselga ესპანეთის კატალონიის რეგიონში, ბარსელონაში დაიბადა. ონკოლოგიის სპეციალიზაციის შემდეგ სამედიცინო კარიერის ადრეული წლები აშშ-ში გაატარა, შემდეგ კი ბარსელონაში დაბრუნდა Vall Hospital d’Hebron-ის ონკოლოგიური სამსახურის სათავეში ჩასადგომად (1996-2010). ამ პერიოდში Vall d’Hebron-ის ონკოლოგიის ინსტიტუტი (VHIO) დააარსა.
მეგობარმა, მენტორმა და VHIO-ის ამჟამინდელმა დირექტორმა, დოქტორმა Josep Tabernero-მ Baselga-ს ხსოვნისადმი მიძღვნილ წერილში აღნიშნა, რომ მისმა ბოლო ხელმძღვანელობით ჩატარებულმა კვლევამ ბარსელონა და Vall d’Hebron კიბოს საერთაშორისო რუკაზე განათავსა და მსოფლიოს ერთ-ერთ ყველაზე კონკურენტულ ცენტრად აქცია.
Baselga 2010 წელს აშშ-ში გადავიდა. ბოსტონის Massachusetts General Hospital-ში ჰემატოლოგია-ონკოლოგიის განყოფილებას ხელმძღვანელობდა, შემდეგ კი ნიუ-იორკის Memorial Sloan Kettering-ის კიბოს ცენტრის (MSKCC) სამედიცინო დირექტორი და მთავარი ექიმი გახდა (2012-2018).
თუმცა მას შემდეგ, რაც Propublica-მ და New York Times-მა დაწერეს, რომ Baselga The Lancet -ისა და The New England Journal of Medicine -ის მსგავსი პრესტიჟული ჟურნალების სტატიებში ფარმაცევტულ კომპანიებთან ფინანსურ კავშირებს არ ამჟღავნებდა, MSKCC სადავო გარემოებებში დატოვა (გავრცელებული მტკიცებით, წასვლისას 3,5 მილიონი დოლარის კომპენსაცია მიიღო).
მან MSKCC-დან გადადგომისას თქვა, რომ გამოტოვებები უნებლიე იყო, თუმცა სრულ პასუხისმგებლობას იღებდა და პუბლიკაციებში ინტერესთა კონფლიქტების ინფორმაციას ასწორებდა. დაამატა, რომ ამ კომპანიებთან კავშირების გამჟღავნების არათანმიმდევრულობის მიუხედავად, კვლევებისა და გამოქვეყნებული ნაშრომების სანდოობა ეჭვქვეშ არ დამდგარა.
სიცოცხლის ბოლო 2 წელი AstraZeneca-ში ონკოლოგიის კვლევისა და განვითარების ვიცე-პრეზიდენტი იყო. კომპანიის აღმასრულებელმა დირექტორმა Pascal Soriot-მ განაცხადა: „გამორჩეული მეცნიერული ლიდერი Jose სამეცნიერო საზოგადოებასა და აქ, AstraZeneca-ში, მუდმივ მემკვიდრეობას ტოვებს.“
Soriot-მ თქვა: „ჩვენი ონკოლოგიური კვლევა-განვითარება შესანიშნავ ტრაექტორიაზე დააყენა და ხელი შეუწყო Daiichi-Sankyo-სთან თანამშრომლობას Enhertu-ს (trastuzumab deruxtecan) და datopotamab deruxtecan-ის კლინიკურ განვითარებაზე“.
Baselga 2015-დან 2016 წლამდე კიბოს კვლევის ამერიკული ასოციაციის (AACR) პრეზიდენტი იყო.
AACR-მ განცხადებაში თქვა: „დოქტორ Baselga-ს სიკვდილი კიბოს კვლევისთვის დიდი დანაკარგია“.
AACR-ის აღმასრულებელი დირექტორი Margaret Foti ამბობს: „მან წამყვანი როლი შეასრულა კიბოს მკურნალობის საფუძვლად ქცეული სხვადასხვა წამლის კლინიკურ კვლევაში. მზრუნველი ონკოლოგი და ექიმებისა და მეცნიერების მთელი თაობის მხარდამჭერი მენტორი იყო. კიბოს მეცნიერებასა და პაციენტთა მოვლის გაუმჯობესებაში შეტანილი დიდი წვლილის გამო მთელ მსოფლიოს ძალიან დააკლდება“.
შემზარავი სიკვდილის ამბავი
Baselga-ს სიკვდილის ამბავმა ბევრი კოლეგა და მეგობარი შოკში ჩააგდო.
ესპანური გაზეთი La Vanguardia იუწყება, რომ სიკვდილის მიზეზი სწრაფად განვითარებადი და ყოველთვის სასიკვდილო დეგენერაციული ნევროლოგიური აშლილობა — კროიცფელდტ-იაკობის დაავადება (CJD) იყო.
გაზეთში ეწერა: „დიაგნოზის გაგებისთანავე გადაწყვიტა, სიცოცხლის ბოლო კვირები კატალონიაში გაეტარებინა. La Cerdanya-ს სახლში, ოჯახის გარემოცვაში გარდაიცვალა“. მას მეუღლე და ოთხი შვილი დარჩა.
მისმა ქალიშვილმა, მედიცინის სტუდენტმა Clara Baselga-Garriga-მ CJD-ის კვლევისთვის GoFundMend გვერდი შექმნა. „შემოწირულებებს ვითხოვთ მათთვის, ვინც თანამედროვე ნეიროდეგენერაციული კვლევის მოწინავე ხაზზე დგას. ვიმედოვნებთ, რომ ერთ დღეს ამ ტკივილს არცერთი ოჯახი აღარ გადაიტანს.”
“CJD-ის საკითხში მეცნიერება გამოცანას ებრძვის და, სამწუხაროდ, მოქმედი მკურნალობა არ არსებობს“ — დაწერა მან. აღნიშნა, რომ სიმპტომების დაწყებიდან პაციენტები 3 კვირიდან 6 თვემდე ცხოვრობენ.
Baselga-Garriga-მ ასევე აღნიშნა, რომ მამა სპორადული CJD-ით გარდაიცვალა, რომელიც განსხვავდება გენეტიკური ან იატროგენული CJD-ისგან (ოპერაციისას ინფიცირებული ხელსაწყოებით ან დაბინძურებული ხორცით გადაცემული — შეშლილი ძროხის დაავადება). დაამატა, რომ CJD ყოველწლიურად მილიონიდან ერთ ადამიანს ეხება.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.