ონკოლოგიის წლის მიღწევად ქირურგიული მკურნალობის სიახლეები დასახელდა

ონკოლოგიური ქირურგიის გაუმჯობესება ყოველწლიურ ანგარიშში ამერიკის კლინიკური ონკოლოგიის საზოგადოებამ (ASCO) გამოაცხადა კიბოს კლინიკური მკურნალობის წლის მიღწევად . ანგარიშის მიხედვით, უფრო ეფექტიანი მკურნალობების ბოლო წარმატებამ კიბოს ოპერაციის როლი შეცვალა და მელანომის, პანკრეასის, თირკმლისა და შარდის ბუშტის კიბოს დროს ოპერაციის საჭიროება შეამცირა. ქირურგია კიბოს მკურნალობაში ძირითად როლს ასრულებს და ისტორიაში ასობით წლის განმავლობაში ერთადერთი ხელმისაწვდომი არჩევანი იყო. 1950-იანი წლებიდან სისტემური მკურნალობების სწრაფმა განვითარებამ მნიშვნელოვნად შეცვალა, როდის და როგორ ტარდება ოპერაცია კიბოს სამკურნალოდ. ASCO-ს ყოველწლიური ანგარიში კიბოს წინააღმდეგ პროგრესზე, რომელიც 15. წელია გამოიცემა, 4 თებერვალს კლინიკური ონკოლოგიის ჟურნალში (Journal of Clinical Oncology) ონლაინ გამოქვეყნდა. Clinical Cancer Advances 2020 სახელწოდების ეს ანგარიში ჩამოთვლის 2018 წლის ოქტომბრიდან 2019 წლის სექტემბრამდე კიბოს მკურნალობის მრავალ კლინიკურ მიღწევას, თუმცა ქვემოთ მოყვანილ კვლევებს „ამ წლის ყველაზე შთამბეჭდავი კვლევითი წარმატებების ნაწილად“ გამოყოფს. ისინი გვაწვდის ახალ ინფორმაციას, როგორ ამცირებს სისტემური მკურნალობა საჭირო ქირურგიის მოცულობას, ზოგჯერ კი მის საჭიროებასაც აქრობს, და როგორ ხდებიან პაციენტები აუცილებლობის შემთხვევაში ოპერაციისთვის შესაფერისი.
მელანომის ნეოადიუვანტური (ოპერაციამდე შემამცირებელი) მკურნალობა
ორი კლინიკური კვლევა აჩვენებს, როგორ იძლევა მიზნობრივი პრეპარატებისა და იმუნოთერაპიის გამოყენება ადგილობრივად გავრცელებული მელანომის დროს წარმატებული და უფრო ნაკლებად მინიმალური ქირურგიის შესაძლებლობას. Lancet Oncology-ში გამოქვეყნებულ NeoCombi კვლევაში ნეოადიუვანტური დაბრაფენიბის (Tafinlar) და ტრამეტინიბის (Mekinist) კომბინაცია შეისწავლეს IIIC სტადიის, BRAF V600 მუტაციადადებითი მელანომის მქონე პაციენტებში. 35 მონაწილიდან % 86-ს ოპერაციისას ობიექტური პასუხი ჰქონდა და თითქმის ნახევარს (% 46) სრული პასუხი აღენიშნა. ორი პრეპარატის კომბინაციამ პაციენტთა % 46-ში სიმსივნისა და მიმდებარე ქსოვილის ქირურგიული მოცილება გააადვილა. გვერდითი მოვლენები ზოგადად მსგავსი იყო იმ მოვლენებისა, რომლებიც ამ მკურნალობის მეტასტაზური დაავადებისთვის მიმღებებში ადრე აღიწერა. ასევე Lancet Oncology-ში გამოქვეყნებულ OpACIN-neo კვლევაში რეზექტაბელური (ოპერირებადი) III სტადიის მელანომის მქონე პაციენტებში ორი იმუნოთერაპია — იპილიმუმაბი (Yervoy) და ნივოლუმაბი (Opdivo) — გამოიყენეს. ალტერნატიული დოზირების 2 კურსის/ციკლის მიმღებებში (ყოველ 3 კვირაში იპილიმუმაბი 1 mg/kg და ნივოლუმაბი 3 mg/kg) რადიოლოგიური ობიექტური პასუხი % 57, ხოლო პათოლოგიური პასუხი % 77 იყო. სტანდარტულ დოზირებასთან შედარებით პირველ 12 კვირაში ნაკლები მძიმე (3/4 ხარისხის) გვერდითი მოვლენა დაფიქსირდა (4 კურსისთვის ყოველ 3 კვირაში იპილიმუმაბი 3 mg/kg პლუს ნივოლუმაბი 1 mg/kg). ეს მონაცემები მიანიშნებს, რომ ამ მიდგომაში იპილიმუმაბისა და ნივოლუმაბის დოზის შემცირებამ ამტანობა შეიძლება გააუმჯობესოს; თუმცა მოვლის სტანდარტად რეკომენდაციამდე გრძელვადიანი შედეგებია საჭირო.
თირკმლის კიბოში „ჯერ ქირურგიის“ მიდგომის გაუქმება
ქირურგია ტრადიციულად მრავალი სოლიდური სიმსივნის, მათ შორის თირკმლის კიბოს (თირკმელუჯრედოვანი კარცინომის) ძირითადი მკურნალობა იყო, თუმცა ორი ახლახან გამოქვეყნებული კვლევა აჩვენებს, რომ ზოგი პაციენტისთვის ოპერაციის გამოტოვება უკეთესია . NEJM-ში გამოქვეყნებული CARMENA კვლევის მიხედვით, მეტასტაზური თირკმლის კიბოს მქონე 450 პაციენტში მხოლოდ სუნიტინიბით (Sutent) მკურნალობას „ნეფრექტომია პლუს სუნიტინიბის“ მსგავსი შედეგები ჰქონდა. მხოლოდ სუნიტინიბის ჯგუფში მედიანური საერთო გადარჩენა 18.4 თვე იყო, ქირურგიისა და სუნიტინიბის ჯგუფში კი — 13.9 თვე. სუნიტინიბით მედიანური საერთო გადარჩენა უფრო ხანგრძლივი იყო ცუდი და საშუალო გადარჩენის შანსის კატეგორიებშიც (შესაბამისად, 23.4 თვე 19.0 თვესთან და 13.3 თვე 10.2 თვესთან შედარებით). 3 ან უფრო მაღალი ხარისხის გვერდითი მოვლენები მხოლოდ სუნიტინიბის ჯგუფში ოდნავ მეტი იყო (% 42.7 შედარებით % 32-თან). JAMA Oncology-ში გამოქვეყნებული SURTIME კვლევის შედეგებით, თავდაპირველი ქირურგიის მიდგომა ოპერაციამდე სუნიტინიბის მიცემასთან შედარებით პროგრესირების გარეშე გადარჩენის მაჩვენებელს არ აუმჯობესებდა. თირკმლის კიბოს ყველაზე ხშირი ქვეტიპის, ნათელუჯრედოვანი და 4. სტადიის კიბოს მქონე 99 პაციენტში 28. კვირას პროგრესირების გარეშე გადარჩენა ორივე ჯგუფში მსგავსი იყო (% 42 შედარებით % 43-თან). თუმცა სუნიტინიბის მიმღებ, გადადებული ოპერაციის ჯგუფში მედიანური საერთო გადარჩენა 32.4 თვე იყო, დაუყოვნებლივ ნაოპერაციებებში კი — 15 თვე.
- დაკავშირებული თემა: რომელია მეტასტაზური თირკმლის კიბოს საუკეთესო საწყისი მკურნალობა?
პანკრეასის კიბოს ოპერაციის შესაძლებლად ქცევა
პანკრეასის კიბოში გადარჩენის საუკეთესო შედეგი ქირურგიით მიიღწევა, თუმცა პაციენტებს დიაგნოზი ხშირად იმ შორსწასულ სტადიაზე ესმებათ, როცა სიმსივნის მოცილება შეუძლებელია. ორი კვლევა მიანიშნებს, რომ ოპერაციამდე სისტემურმა მკურნალობამ ზოგი პაციენტისთვის ქირურგია შეიძლება შესაძლებელი გახადოს. JAMA Oncology-ში გამოქვეყნებულ ერთჯგუფიან 2 ფაზის კლინიკურ კვლევაში საზღვრულად რეზექტაბელური პანკრეასის კიბოს მქონე 48 პაციენტში ნეოადიუვანტური FOLFIRINOX პლუს რადიოთერაპია შეაფასეს. მკურნალობის შემდეგ სტადია ხელახლა განისაზღვრა. სისხლძარღვების ჩართვის (სისხლძარღვებში კიბოს გავრცელების) გაუმჯობესებისას ჩატარდა ხანმოკლე პროტონული რადიოთერაპია კაპეციტაბინთან ერთად; მდგრადი სისხლძარღვოვანი ჩართვისას — სტანდარტული რადიოთერაპია პლუს კაპეციტაბინი ან ფტორურაცილი. მთელ ჯგუფში მედიანური პროგრესირების გარეშე გადარჩენა 14.7, საერთო გადარჩენა კი 37.7 თვე იყო. ნაოპერაციები 31 პაციენტის % 67-ში უარყოფითი ქირურგიული კიდეების მიღება მოხერხდა; ამ ჯგუფში პროგრესირების გარეშე გადარჩენა მნიშვნელოვნად გაუმჯობესდა (48.6 თვე). რადგან პაციენტთა ნახევარზე მეტი ცოცხალი იყო, მედიანური საერთო გადარჩენა ჯერ არ მიღწეულა; თუმცა 2. წელს საერთო გადარჩენა ნაოპერაციებ ჯგუფში % 72, ყველა პაციენტში კი % 56 იყო. ასევე JAMA Oncology-ში გამოქვეყნებული მეორე ერთჯგუფიანი 2 ფაზის კვლევა FOLFIRINOX -ის პლუს რენინ-ანგიოტენზინ-ალდოსტერონის სისტემაზე მოქმედი წნევის წამლის, ლოზარტანის მიმღებ ადგილობრივად გავრცელებული პანკრეასის კიბოს მქონე პაციენტებს აფასებდა. მკურნალობის ბოლოს რადიოლოგიურად ოპერირებად პაციენტებს დამატებით ხანმოკლე პროტონული რადიოთერაპია და კაპეციტაბინი მიეცათ; მდგრადი სისხლძარღვოვანი ჩართვისას — ხანგრძლივი სტანდარტული რადიოთერაპია ფტორურაცილით ან კაპეციტაბინით. ჯგუფის % 61-ს ჩაუტარდა ოპერაცია უარყოფითი ქირურგიული კიდეებით. მთელ ჯგუფში მედიანური პროგრესირების გარეშე გადარჩენა 17.5 თვე, საერთო გადარჩენა კი 31.4 თვე იყო. ნაოპერაციებებში მედიანური პროგრესირების გარეშე გადარჩენა 21.3 თვე, საერთო გადარჩენა კი 33 თვე იყო.
- დაკავშირებული თემა: შორსწასული პანკრეასის კიბოს მკურნალობაში დღემდე მიღებული საუკეთესო შედეგები
დასკვნა
გასული წლის კიბოს კვლევების ყველაზე შთამბეჭდავი მიღწევების ნაწილი ონკოლოგიურ ქირურგიას ეხებოდა. შორსწასული თირკმლის კიბოს დროს საწყისი ოპერაციის აუცილებლობა მოიხსნა, მელანომისა და პანკრეასის კიბოს დროს კი ვნახეთ, რომ ოპერაციასთან ეფექტიანი სისტემური მკურნალობებისა და თანამედროვე რადიოთერაპიის კომბინაციების დამატებამ დაავადების შედეგები გააუმჯობესა.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.