ფითრის ექსტრაქტი – აქვს თუ არა Mistletoe-ს ადგილი კიბოს მკურნალობაში?
ამ სტატიაში
2000 წლამდე, მას შემდეგ რაც შენიშნეს, რომ ფითრი კიბოს პაციენტებში მკურნალობით გამოწვეულ ზოგ გვერდით ეფექტს ამცირებდა და ცხოვრების ხარისხს აუმჯობესებდა, დაისვა კითხვა: შეიძლება თუ არა მისი გამოყენება თავად კიბოს სამკურნალოდაც? სტატიაში შევკრიბეთ ინფორმაცია ფითრის სამედიცინო გამოყენების შესახებ, განსაკუთრებით კიბოს დროს.
ფითრის;
- ინგლისური სახელწოდება: mistletoe
- სამეცნიერო სახელწოდება: Viscum album, Viscum coloratum
- სავაჭრო სახელწოდებები: Helixor, Iscador
ფითრი ნახევრად პარაზიტული მცენარეა, რომელიც სხვადასხვა ხეზე სახლდება. ფითრის ზოგი პროდუქტი საკვები დანამატისა და ჰომეოპათიური პროდუქტის სახით იყიდება, თუმცა არც აშშ-ში და არც ჩვენს ქვეყანაში ფითრის ექსტრაქტისგან დამზადებული დამტკიცებული წამალი არ არსებობს.
მისი ექსტრაქტის საინექციო ფორმა გერმანულენოვან ქვეყნებში კიბოს მკურნალობის გვერდითი ეფექტებისთვის ფართოდ გამოიყენება. ევროპაში ეს კიბოს პაციენტებისთვის ყველაზე ხშირად დანიშნული მცენარეული პროდუქტია. ისტორიულად ერთ-ერთი „ყველა სენის წამალი“ მცენარეა. მისი ექსტრაქტი კიბოს, ეპილეფსიის, უნაყოფობის, მენოპაუზური ჩივილების, ასთმის, წნევისა და თავის ტკივილის დროს გამოიცადა. ფოთლები და ნაყოფი ადამიანისთვის შხამიანია. მრავალ სუსტ კლინიკურ კვლევაში მისი კიბოს საწინააღმდეგო ეფექტიანობა შემოწმდა.
ფითრის ექსტრაქტში აქტიური ნაერთებია ვისკოტოქსინები, პოლისაქარიდები და ლექტინები. ქიმიური შემადგენლობა შეიძლება განსხვავდებოდეს იმ ხის მიხედვით, რომელზეც ფითრი მიმაგრებულია.
ადამიანებზე ცდების წინარე საბაზისო კვლევები აჩვენებს, რომ ფითრის ექსტრაქტებმა შეიძლება იმუნური სისტემა კიბოსთან საბრძოლველად წაახალისოს. ადამიანებზე ჩატარებული, ანუ კლინიკური კვლევები გვაფიქრებინებს, რომ ფითრმა შეიძლება კიბოს მკურნალობის გვერდითი ეფექტები შეამციროს. გარდა ამისა, ზოგმა ადრეულმა კლინიკურმა კვლევამ, რომლებიც კიბოს პაციენტების სიცოცხლის ხანგრძლივობაში ფითრის წვლილს აჩვენებდა, დიდი აღფრთოვანება გამოიწვია. თუმცა ამ მტკიცების დასადასტურებლად 2000 წლის შემდეგ ჩატარებულმა ფართომასშტაბიანმა კვლევებმა უარყოფითი შედეგები აჩვენა და კიბოს მედიცინის ინტერესი ფითრისადმი მნიშვნელოვნად შემცირდა.
ფითრი თავად კიბოს ან მისი მკურნალობით გამოწვეული ჩივილების შესამცირებლად
ლაბორატორიულმა და ცხოველებზე კვლევებმა ფითრის ზოგი სიმსივნის საწინააღმდეგო და იმუნური სისტემის მასტიმულირებელი მოქმედება აჩვენა. არსებობს ცხოველებსა და ადამიანებზე კვლევები, რომლებიც აჩვენებს, რომ ფითრის ექსტრაქტმა შეიძლება კიბოს მკურნალობის გვერდითი ეფექტები შეამციროს და პაციენტებმა უფრო დიდხანს იცოცხლონ. თუმცა ამ ეფექტების დასადასტურებლად ჩატარებული კვლევები წარუმატებელი აღმოჩნდა. ამ წინააღმდეგობამ დასვა კითხვა, იყო თუ არა პირველი კვლევები — რომელთა უმრავლესობა 2000 წლამდე ჩატარდა — სათანადო სამეცნიერო წესით შესრულებული. ფითრი ინტენსიურად გამოიცადა განსაკუთრებით იმუნურ სისტემასთან მჭიდროდ დაკავშირებულ კანის კიბოში, ავთვისებიან მელანომაში, და წარუმატებლობის შემდეგ ავტორიტეტულ ონკოლოგიურ ჟურნალ European Journal of Cancer-ში მის შესახებ ასეთი კომენტარი გამოქვეყნდა: „მელანომის პაციენტებში კიბოს უჯრედების გასანადგურებლად იმუნური სისტემის ბუნებრივი მეთოდებით მასტიმულირებელ მკურნალობებს ეჭვით უნდა შევხედოთ.“
ჰეპატიტის (ღვიძლის ანთების) მკურნალობაში
არ არსებობს მტკიცებულება, რომ ფითრის გამოყენება ჰეპატიტის სამკურნალოდ შეიძლება.
HIV-ისა და AIDS-ის მკურნალობაში
ზოგმა კვლევამ დაადგინა, რომ ფითრის ექსტრაქტმა შეიძლება შიდსის პაციენტებში იმუნურ სისტემაზე დადებითად იმოქმედოს. თუმცა მისი მკურნალობის მეთოდად გამოყენების საკმარისი მტკიცებულება არ არსებობს.
მაღალი წნევის დასაწევად
ლაბორატორიული მონაცემები ვარაუდობს, რომ ფითრს შეუძლია არტერიული წნევის დაწევა. თუმცა არცერთი კლინიკური კვლევა არ ჩატარებულა იმის გასარკვევად, არის თუ არა ის მაღალი წნევის ეფექტიანი მკურნალობა.
არ გამოიყენოთ შემდეგ შემთხვევებში
- თუ ორსულად ხართ: ფითრის ზოგმა კომპონენტმა შეიძლება საშვილოსნო გააღიზიანოს და ბავშვს ზიანი მიაყენოს.
- თუ იღებთ ღვიძლის ციტოქრომ P450 სისტემაზე მოქმედ წამლებს: ფითრმა შეიძლება ამ წამლების გვერდითი ეფექტების გამოვლენის რისკი გაზარდოს.
ფითრის გვერდითი ეფექტები
- ხშირი: ცხელება, შემცივნება, სისხლის თეთრი უჯრედების რაოდენობის ზრდა, ინექციის ადგილზე რეაქცია, ჰიპერმგრძნობელობა.
- იშვიათად: ჭარბი დოზის ნიშნები: დიარეა, ღებინება, თავის ტკივილი, წნევის დაქვეითება, დაბალი პულსი, გულის წასვლა ან გონების დაკარგვა, სისხლის შაქრის მომატება, ქავილი, სიწითლე.
- ძალიან იშვიათად: ფითრის ჭარბი დოზის გამოყენებამ შეიძლება სიცოცხლის დაკარგვა გამოიწვიოს.
სტატია დავასრულოთ ალტერნატიული მედიცინის სფეროში მსოფლიოში ავტორიტეტად აღიარებული პროფესორ დოქტორ ედცარდ ერნსტისშემდეგი სიტყვებით: „ვაცნობიერებ, რომ ალტერნატიული მედიცინის ბევრ მომხრეს ვანაწყენებ, მაგრამ შეუძლებელია ინტუიციამ სამეცნიერო მტკიცებულებები ჩაანაცვლოს.“
წყაროები
Final results of the EORTC 18871/DKG 80-1 randomised phase III trial. rIFN-alpha2b versus rIFN-gamma versus ISCADOR M versus observation after surgery in melanoma patients with either high-risk primary (thickness >3 mm) or regional lymph node metastasis.
Eur J Cancer. 2004 Feb.
2. Ostermann T, Raak C, Bussing A.
Survival of cancer patients treated with mistletoe extract (Iscador): a systematic literature review.
BMC Cancer. 2009
3. Bar-Sela G, Wollner M, Hammer L, et al.
Mistletoe as complementary treatment in patients with advanced non-small-cell lung cancer treated with carboplatin-based combinations: a randomised phase II study.
Eur J Cancer. Mar 2013
4. Troger W, Galun D, Reif M, et al.
Viscum album [L.] extract therapy in patients with locally advanced or metastatic pancreatic cancer: a randomised clinical trial on overall survival.
Eur J Cancer. Dec 2013
5. Bar-Sela G.
White-berry mistletoe (Viscum album L.) as complementary treatment in cancer: Does it help?
Eur J Integr Med. 2011
6. Mistletoe (European).
Integrative Medicine | Memorial Sloan Kettering Cancer Center
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.