პროლაქტინის რეცეპტორი და სამმაგად (ტრიპლ) ნეგატიური ძუძუს კიბო

ავტორიტეტულ სამეცნიერო ჟურნალ Nature-ში 2016 წლის ოქტომბერში გამოქვეყნებული კვლევის თანახმად, სამმაგად (ტრიპლ) ნეგატიური ძუძუს კიბოს პაციენტებში პროლაქტინის ჰორმონის უჯრედის ზედაპირზე არსებული სენსორი, (პროლაქტინის რეცეპტორი), შეიძლება მნიშვნელოვანი მარკერი იყოს სიცოცხლის გასახანგრძლივებლად და ინტენსიური მკურნალობის თავიდან ასაცილებლად.

სამმაგად ნეგატიური ძუძუს კიბოძუძუს კიბოს სახეობაა, რომელიც აგრესიული მიმდინარეობით, სხვა ტიპებთან შედარებით მიზნობრივი მკურნალობის ნაკლები ვარიანტითა და საკუთარი ქვეტიპების არსებობით ხასიათდება.

კვლევაში სამმაგად ნეგატიური ძუძუს კიბოს დიაგნოზის მქონე 580 პაციენტის ქსოვილის ნიმუშებზე მოწინავე გენეტიკური ანალიზები ჩატარდა. ანალიზები მოიცავდა პროლაქტინის წარმოებაში მონაწილე გენებსაც (PRL, JAK2, STAT5a).

კვლევის ყველაზე საინტერესო შედეგია, რომ პროლაქტინის რეცეპტორის მაღალი შემცველობის სიმსივნეების მქონე პაციენტები უფრო დიდხანს ცხოვრობენ.

ამასთან, ექსპერიმენტულ ცხოველურ მოდელებზე ჩატარებულმა კვლევამ დაადგინა, რომ პროლაქტინის ჰორმონი კიბოს უჯრედების გამრავლებას აფერხებს.

რას ნიშნავს ეს კვლევა კლინიკური თვალსაზრისით?

• ძუძუს კიბოს 4 ქვეტიპიდან ერთ-ერთი, სამმაგად ნეგატიური ძუძუს კიბო, ერთგვაროვანი დაავადება არ არის; შიგნითაც მრავალფეროვანია. ეს აჩვენებს, რომ ექიმებს შესაბამისი მკურნალობის ასარჩევად ბიოლოგიური მარკერები სჭირდებათ. პროლაქტინის რეცეპტორების სიმჭიდროვის დადგენამ შეიძლება პაციენტისთვის ყველაზე შესაფერისი მკურნალობის შერჩევას შეუწყოს ხელი.
• პროლაქტინის რეცეპტორ-დადებითი სიმსივნეების მქონე პაციენტებში მომავალში შეიძლება პროლაქტინისა და ქიმიოთერაპიის კომბინაცია გამოიყენონ.
• პროლაქტინი დედის რძის წარმოქმნაში მონაწილე ჰორმონია. ძუძუთი კვება ძუძუს ქსოვილში მისი მაღალი დონის შენარჩუნების ყველაზე ბუნებრივი გზაა. ეს შედეგები ძუძუს კიბოში ძუძუთი კვების დამცავ ეფექტსაც უჭერს მხარს.