პროსტატის კიბოს ოპერაციამდე ინტენსიური ჰორმონული დათრგუნვით მიღწეული პათოლოგიური სრული პასუხი

ადგილობრივად გავრცელებული პროსტატის კიბოს მქონე პაციენტებში, რადიკალური პროსტატექტომიის ოპერაციისწინ, ნეოადიუვანტური (შემამცირებელი) მკურნალობის სახით, ენზალუტამიდითა და ლეიპროლიდით ჰორმონულ დათრგუნვაზე აბირატერონისა და პრედნიზონის დამატებამ პათოლოგიური სრული პასუხისა და მინიმალური ნარჩენი დაავადების სიხშირე გაზარდა. კვლევა 2019 წლის აპრილში Journal of Clinical Oncology ჟურნალში გამოქვეყნდა.
ამ ღია, მრავალცენტრიან II ფაზის კლინიკურ კვლევაში75 პაციენტი შემთხვევითად ორ ჯგუფში 2-ის 1-თან თანაფარდობით განაწილდა:
- 1. ჯგუფში 50 პაციენტს აბირატერონი 1.000 mg / დღე, ენზალუტამიდი 160 mg / დღე, ლეიპროლიდი (leuprolide) ყოველ 12 კვირაში ერთხელ 22.5 mg და პრედნიზონი 5 mg / დღე 24 კვირის განმავლობაში ეძლეოდა. ჰორმონული დათრგუნვის ამ ინტენსიურ სქემას ELAP ეწოდა.
- 2. ჯგუფში 25 პაციენტს ენზალუტამიდი 160 mg / დღე და ლეიპროლიდი ყოველ 12 კვირაში ერთხელ 22.5 mg დოზით 24 კვირის განმავლობაში ეძლეოდა (EL ჯგუფი).
- ორივე ჯგუფის პაციენტებს ნეოადიუვანტური მკურნალობის დასრულების შემდეგ რადიკალური პროსტატექტომია ჩაუტარდათ.
- პაციენტების პროსტატის მაგნიტურ-რეზონანსულ გამოსახულებაზე T3 დაავადება ჩანდა (სიმსივნე პროსტატის კაფსულას გასცდენოდა). ლიმფური კვანძების ზომა <20 mm უნდა ყოფილიყო. გლისონის ქულა 4 + 3 = 7 ან უფრო მაღალი, ხოლო პროსტატასპეციფიკური ანტიგენი (PSA)> 20 ng / mL ან უფრო მაღალი უნდა ყოფილიყო.
კვლევის პირველადი საბოლოო მაჩვენებელი იყო ოპერაციით ამოღებულ პროსტატის ქსოვილში კიბოს უჯრედების სრულ არარსებობას აღმნიშვნელი პათოლოგიური სრული პასუხი ან მინიმალური ნარჩენი დაავადება, რაც ≤5 mm სიმსივნის დარჩენას ნიშნავდა. პაციენტების უმრავლესობას (% 87), აშშ-ის კიბოს ეროვნული ყოვლისმომცველი ქსელის (NCCN®) კრიტერიუმებით, მაღალი რისკის პროსტატის კიბო ჰქონდა.
პასუხის სიხშირე
- ELAP ჯგუფში პათოლოგიური სრული პასუხის ან მინიმალური ნარჩენი დაავადების სიხშირე % 30 იყო (50 პაციენტიდან 15). ამ ჯგუფის პაციენტების %10-ს პათოლოგიური სრული პასუხი ჰქონდა.
- EL ჯგუფში პათოლოგიური სრული პასუხის ან მინიმალური ნარჩენი დაავადების სიხშირე %16 აღმოჩნდა (% 25 პაციენტიდან 4). პათოლოგიური სრული პასუხის სიხშირე % 8 იყო. ამ განსხვავებებმა სტატისტიკური მნიშვნელოვნების დონეს ვერ მიაღწია (p=0.263).
- ორ ჯგუფს შორის ქირურგიული კიდისა და ლიმფური კვანძების დადებითობა მსგავსი იყო.
- სიმსივნის ნიმუშების მოლეკულური პროფილირებით გამოვლინდა, რომ ERG-დადებით და PTEN-ის დანაკარგის მქონე სიმსივნეებში ნარჩენი (დარჩენილი სიმსივნის) მოცულობა უფრო დიდი იყო; ითვლებოდა, რომ ეს ორი მდგომარეობა უარეს შედეგებს უკავშირდებოდა.
გვერდითი მოვლენები
- ორივე ჯგუფში მკურნალობა კარგად აიტანეს.
- მკურნალობასთან დაკავშირებული გვერდითი მოვლენები ორ ჯგუფში მსგავსი იყო, გარდა ELAP ჯგუფში ნებისმიერი ხარისხისა და 3. ხარისხის ჰიპერტენზიის, ALT-ისა და AST-ის სიხშირისა.
- მკურნალობასთან დაკავშირებული 4. ხარისხის (ჰოსპიტალიზაციის მომთხოვნი) გვერდითი მოვლენა არ გამოვლენილა.
დასკვნის სახით, ამ მცირე კლინიკური კვლევით, პროსტატის კიბოს ნეოადიუვანტურ (ოპერაციამდე შემამცირებელ) მკურნალობაში ინტენსიური ჰორმონული დათრგუნვით, როგორც ჩანს, ამ დრომდე საუკეთესო შედეგები იქნა მიღებული. თუმცა ELAP სქემის რეციდივის სიხშირესა და საერთო გადარჩენაზე გავლენის შესაფასებლად უფრო ხანგრძლივი დაკვირვებაა საჭირო.
წყაროები
Evaluation of Intense Androgen Deprivation Before Prostatectomy: A Randomized Phase II Trial of Enzalutamide and Leuprolide With or Without Abiraterone.
J Clin Oncol. 10 April 2019.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.