შარდისა და პროსტატის მიკრობიოტის გასაოცარი კავშირი პროსტატის კიბოსთან

განვითარებულ ქვეყნებში მამაკაცებში პროსტატის კიბო, კანის კიბოს გარდა, ყველაზე გავრცელებული კიბოა. მსოფლიოში ყოველწლიურად 250 ათასზე მეტი მამაკაცი პროსტატის კიბოთი იღუპება.
პროსტატის კიბოს არაერთგვაროვანი / ცვალებადი კლინიკური მიმდინარეობა აქვს და ბიოფსიის შემდეგ დადგენილი Gleason-ის ქულის ჩათვლით მიღებული ინფორმაციით ფასდება, რამდენად სავარაუდოა დაავადების აგრესიულობა.
კიბოს მიმდინარეობის პროგნოზირება ბიომარკერებით
პროსტატის აგრესიული კიბოს გამოსავლენად შარდში არსებული ბიომარკერების იდენტიფიცირება მზარდი ინტერესის სფეროა. პროსტატის მიერ წარმოქმნილი მოლეკულები შარდში გამოიყოფა. კარგადაა ცნობილი შარდის პროსტატაში შეღწევა, რაც პროსტატა-შარდის ციკლის არსებობას უჭერს მხარს.
შარდში ადრე აღწერილი ბიომარკერები მოიცავს PCA3-სა და სხვადასხვა გენის კომბინაციის ექსპრესიის პროფილებს ან გენების მეთილაციის შეფასებას. თუმცა არცერთი მათგანი კლინიკაში ფართოდ არ გამოიყენება. ამასთან, პაციენტის საწყისი შეფასებიდან პროსტატის კიბოს რისკის ჯგუფებისა და დაავადების პროგრესირების საიმედოდ პროგნოზირებისთვის გამოსადეგი ბიომარკერებისა და კლინიკური მონაცემების კომბინაციის პოვნა კვლავ რთულია.
- დაკავშირებული თემა: არის თუ არა Gleason 6 პროსტატის კიბო და საჭიროა თუ არა მისი მკურნალობა?
მიკრობიოტა და კიბოს განვითარება
მემკვიდრეობითი ფაქტორებისა და ეთნიკური წარმოშობის როლი პროსტატის კიბოს განვითარებაში ცნობილია; მიზეზობრივ ფაქტორად ქრონიკული ანთებაცაა შემოთავაზებული.
Helicobacter pylori-ის ბაქტერიით გამოწვეული ქრონიკული ინფექცია კუჭის კიბოს განვითარების უმნიშვნელოვანესი მიზეზია, რაც სხვა კიბოების განვითარებაში მიკრობების მონაწილეობის შესწავლას ხელს უწყობს.
ცნობილია, რომ ბაქტერიები შარდსასქესო გზებსა და პროსტატის ქსოვილში არსებობს, პროსტატიდან გამოყოფილ ბაქტერიებს კი ცხოველურ მოდელებში ანთების გამოწვევა შეუძლია.
პროსტატის ქსოვილში არსებული მიკრობები Gleason-ის სხვადასხვა ქულის მქონე პაციენტებში განსხვავდება. ასევე არსებობს კავშირები პროსტატის კიბოს არსებობასა და შარდისა და კუჭ-ნაწლავის სისტემის განსხვავებულ მიკრობულ პროფილებს შორის.
2019 წელს გამოქვეყნებულ მიმოხილვაში მიკრობიომსა და პროსტატის პათოლოგიებს შორის კავშირი განიხილეს, თუმცა საბოლოოდ აღნიშნეს, რომ მნიშვნელოვანი სირთულეები კვლავ რჩება;
- ნიმუშის კონტამინაცია (დაბინძურება)
- შესაბამისი საკონტროლო ჯგუფის ქსოვილის მიღება
- ხშირად გამოვლენილი ახალი ბაქტერიების კლასიფიკაცია
ამის შემდეგ, European Urology Oncology ჟურნალში გამოქვეყნებულ სტატიაში მკვლევრებმა ზემოთ ჩამოთვლილი პირობები გააუმჯობესეს და ბაქტერიების არსებობასა და პროსტატის კიბოს რისკის ჯგუფებს შორის კავშირი შეისწავლეს.
კვლევაში გამოიყენეს ინგლისში, Norfolk-ისა და Norwich-ის საუნივერსიტეტო საავადმყოფოებში პროსტატის კიბოს ან ჰემატურიის (სისხლიანი შარდის) გამო ბიოფსიისთვის მომზადებული პაციენტებისგან ბიოფსიამდე აღებული შარდის ნიმუშები და პროსტატექტომიის შემდეგ ამოღებული პროსტატიდან მიღებული სეკრეტი.
- პირველ რიგში, პროსტატის კიბოს მაღალი რისკის ჯგუფებსა და გარკვეული ბაქტერიების არსებობას შორის მნიშვნელოვანი ხაზოვანი კავშირი აჩვენეს (ბაქტერიების DNA ფლუორესცენტული მიკროსკოპული ანალიზით გამოავლინეს).
- მეორე მხრივ, გამოვლინდა მეტასტაზური დაავადების უფრო მაღალი ტვირთის მქონე პაციენტების ქვეჯგუფი. ამ დაკვირვებამ ხუთი ტიპის ანაერობული ბაქტერიისგან შემდგარი ABBS-ის (ანაერობული ბაქტერიების ბიომარკერების ნაკრების) შემუშავებამდე მიიყვანა მკვლევრები (იხ. სურათი 1).
- მესამე მხრივ, შარდის ნიმუშების ანალიზმა ABBS-ის მნიშვნელობის მხარდამჭერი საჩვენებელი შედეგები მოგვცა. პროსტატექტომიის სიმსივნურ ნიმუშებში არსებული ბაქტერიების მონაცემებით ABBS-ის მნიშვნელობა ქსოვილშიც დადასტურდა.
ერთობლივად ეს კვლევები მყარ ინფორმაციას გვაწვდის პროსტატა-შარდის რეფლუქსის ციკლში არსებული გარკვეული ABBS-ების როლზე პროსტატის აგრესიული კიბოს პროგნოზირებაში.

დასკვნა
ამ საკითხის ყველა კვლევა თანმიმდევრულად მიდის დასკვნამდე, რომ სიმსივნურ ქსოვილში ან სისხლში არსებული მიკრობიომები შეიძლება რამდენიმე ტიპის კიბოს დიაგნოსტიკისა და მიმდინარეობის პროგნოზირების ბიომარკერებად გამოვიყენოთ.
ამ ახალ კვლევაში ანაერობული ბაქტერიების ბიომარკერების ნაკრებში (ABBS) აღწერილი ბაქტერიები სხვა ტიპის კიბოებშიც აღმოჩნდა. ამან შეიძლება ხელი შეუწყოს პროსტატის კიბოს აგრესიულობის დასადგენად გამოყენებული მეთოდის საზღვრების გადალახვას.
საჭიროა დამატებითი კვლევები იმის დასადგენად, იწვევს თუ არა ABBS-ის სპეციფიკური ბაქტერიები კიბოს, რა პათოგენური პროცესები არსებობს, თუ არსებობს, და შემდეგ რომელი შესაძლო მკურნალობა შეძლებს ანაერობული პათოგენების აღმოფხვრას.
ამრიგად, ახალმა კვლევამ შარდსა და პროსტატაში არსებული ბაქტერიების მნიშვნელობა აჩვენა, როგორც დაავადების მიმდინარეობის შესაძლო პროგნოზული მარკერებისა. წინა ნაშრომებთან ერთად ეს კვლევა საწყისი საფეხურია მომავალი კვლევებისთვის, რომლებიც პროსტატის კიბოს პათოგენეზსა და ევოლუციაში ბაქტერიების როლზე გაამახვილებს ყურადღებას.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.