შეიძლება D ვიტამინის დანამატი ორგანიზმში ანთებას ამცირებდეს?

ცნობილია, რომ სიმსუქნე და D ვიტამინის დეფიციტი კიბოს ზოგიერთ ტიპთან არის დაკავშირებული. ამ კავშირს ანთებითი პროცესებითა და ცხიმოვანი ქსოვილიდან გამოყოფილ გარკვეულ შუამავალ ცილებთან დაკავშირებულ მექანიზმებს მიაწერენ. ნაჩვენებია, რომ ჭარბწონიან ადამიანებში სისხლში D ვიტამინის დონე უფრო დაბალია. ცხიმოვანი ქსოვილი D ვიტამინს ცხიმის მარაგებში აკავებს და ამით სისხლში მის რაოდენობასა და ორგანიზმში მის გამოყენებას ამცირებს. ამიტომ წონის კლებას D ვიტამინის დონეზეც დადებითი გავლენა აქვს.

რადგან ცნობილია, რომ წონის კლება ორგანიზმში ანთებით პროცესებს ამცირებს, ვარაუდობენ, რომ ეს ეფექტი შესაძლოა D ვიტამინის დონეს უკავშირდებოდეს. ამიტომ ახლახან გამოქვეყნებულ კვლევაში შეისწავლეს D ვიტამინის გავლენა ანთების მარკერებზე.

კვლევაში მონაწილეობდნენ ჭარბწონიანი (სხეულის მასის ინდექსი > 25 kg/m2) და D ვიტამინის დაბალი დონის ( 10 - 32 ng/mL) მქონე მენოპაუზის შემდგომი ასაკის 218 ქალი. მონაწილეები 2 ჯგუფად დაყვეს. 12 თვის განმავლობაში ერთ ჯგუფს წონის კლების პროგრამასთან ერთად D ვიტამინის დანამატს აძლევდნენ, ხოლო მეორეს მხოლოდ წონის კლების პროგრამას უტარებდნენ. 12 თვის ბოლოს მონაწილეები ქვეჯგუფებად დაყვეს: ისინი, ვინც წონა ვერ დაიკლო ან მოიმატა; ვინც საკუთარი წონის %5-ზე ნაკლები დაიკლო; ვინც %5-10 დაიკლო და ვინც %10-ზე მეტი დაიკლო. ჯგუფების შესწავლამ აჩვენა, რომ ანთების მარკერების დონე ორივე ჯგუფში შემცირდა. თუმცა საკუთარი წონის %5-10-ისა და %10-ზე მეტის დამკლებთა შორის, D ვიტამინის დანამატის მიმღებებში IL-6-ის დონე (ანთების ერთ-ერთი მარკერი) გაცილებით მეტად შემცირდა, ვიდრე მათში, ვინც დანამატს არ იღებდა. ანუ D ვიტამინმა გააძლიერა წონის კლების გავლენა ანთების მარკერების შემცირებაზე.

შედეგად, ამ კვლევაში წონის კლების პროგრამით საკუთარი წონის %5-ისა და მეტის დამკლებ პირებში D ვიტამინის დანამატმა ანთების მნიშვნელოვანი მარკერის შემცირება უზრუნველყო. მართალია, ეს შედეგები შეიძლება განიმარტოს როგორც „D ვიტამინი შესაძლოა კიბოსა და ქრონიკულ დაავადებებთან დაკავშირებულ სისტემურ ანთებას ამცირებდეს“, მაგრამ რაიმეს დანამდვილებით თქმა ჯერ ნაადრევია. თუმცა ეს კვლევა ისეთი წინგადადგმული ნაბიჯია, რომელიც მკვლევრებს ახალი კვლევების ჩასატარებლად გაამხნევებს.

ერთ-ერთ წინა სტატიაში „D ვიტამინისა და კიბოს პრევენციის“ შესახებ ვრცელი, მტკიცებულებებზე დაფუძნებული ინფორმაცია გაგიზიარეთ. ამ სტატიის სანახავად შეგიძლიათ დააჭიროთ.