სოლიდური სიმსივნეებისთვის ინჟინერიით შექმნილმა უჯრედულმა თერაპიამ პირველად მიიღო FDA-ს დამტკიცება

FDA-მ (აშშ-ის სურსათისა და მედიკამენტების ადმინისტრაცია) 2 აგვისტოს 2024 წელს დაჩქარებული წესით დაამტკიცა afamitresgene autoleucel (afami-cel) (Tecelra, Adaptimmune LLC) შორსწასული სინოვიური სარკომის სამკურნალოდ.

რევოლუციური მკურნალობის დამტკიცება სოლიდური სიმსივნეებისთვის

Tecelra მყარი სიმსივნეებისთვის ინჟინერიით შექმნილი პირველი უჯრედული თერაპიაა და განსაკუთრებით განკუთვნილია არარეზექციული ან მეტასტაზური სინოვიური სარკომის მქონე ზრდასრულებისთვის, რომლებსაც ადრე ქიმიოთერაპია ჩაუტარდათ, ადამიანის ლეიკოციტური ანტიგენების (HLA) სხვადასხვა ტიპზე დადებითი შედეგი აქვთ და რომელთა სიმსივნეებიც მელანომასთან ასოცირებულ ანტიგენ A4-ს (MAGE-A4) ექსპრესირებს.

სოლიდური სიმსივნე, კიბოს სახეობაა, რომელიც სხეულის ქსოვილებსა თუ ორგანოებში ვითარდება, სისხლიდან ან ძვლის ტვინიდან არ წარმოიშობა და მასის სახით იზრდება.

სინოვიური სარკომა, კიბოს იშვიათი სახეობაა, რომელიც რბილ ქსოვილებში, ჩვეულებრივ სახსრებთან ახლოს ვითარდება. ეს სიმსივნე სინოვიური ქსოვილებიდან წარმოიშობა და განსაკუთრებით ახალგაზრდა ზრდასრულებში გვხვდება.

მიზნობრივი უჯრედული იმუნოთერაპიის მიდგომა

ეს ერთდოზიანი უჯრედული მკურნალობა მიზანში იღებს MAGE-A4 ცილას, რომელიც სინოვიურ სარკომაში მაღალი დონით ექსპრესირდება.

სინოვიური სარკომა კიბოს იშვიათი სახეობაა, რომელიც აშშ-ში წელიწადში დაახლოებით 1000 ადამიანს აზიანებს. კიბოს უჯრედები რბილ ქსოვილებში, ჩვეულებრივ კიდურებში, სიმსივნეს წარმოქმნის.

მეტასტაზური სინოვიური სარკომის მქონე ზრდასრულებს, კიბოს გავრცელებისა თუ რეციდივის რისკთან ერთად, ხშირად მკურნალობის შეზღუდული არჩევანი აქვთ. ეს დამტკიცება მნიშვნელოვანი ეტაპია ამ იშვიათი, მაგრამ პოტენციურად სასიკვდილო დაავადებისთვის ინოვაციური, უსაფრთხო და ეფექტიანი მკურნალობის შემუშავებაში.

მსგავსება და განსხვავება CAR T-უჯრედულ თერაპიასთან

T-უჯრედული რეცეპტორის თერაპია, ქიმერული ანტიგენის რეცეპტორის (CAR) T-უჯრედული (CAR-T) თერაპიის მსგავსად, გულისხმობს პაციენტების T უჯრედების შეცვლას ისე, რომ მათ კიბოს წინააღმდეგ იბრძოლონ. მაშინ როცა CAR-T თერაპია ხელოვნურ რეცეპტორს ამატებს კიბოს უჯრედების ზედაპირზე არსებული კონკრეტული ცილის მიზანში ამოსაღებად, T-უჯრედული რეცეპტორის თერაპია, არსებულ რეცეპტორებს ცვლის, რათა კიბოს უჯრედების ზედაპირზე არსებული ანტიგენების მთელი რიგი ამოიცნოს — ეს სოლიდური სიმსივნეების მიზანში ამოსაღებად იმედისმომცემი სტრატეგიაა.

Tecelra-ს დაჩქარებული დამტკიცება: SPEARHEAD-1 ფაზა 2 კვლევის შედეგები

Tecelra-ს დაჩქარებული დამტკიცება ეფუძნება SPEARHEAD-1 ფაზა 2 კვლევას, რომელშიც სინოვიური სარკომის მქონე 44 პაციენტმა მკურნალობა ერთჯერადი ინფუზიით მიიღო. კვლევაში 52 პაციენტი ჩაერთო, თუმცა რვა პაციენტს Tecelra არ მიუღია, სამი გარდაიცვალა, ხოლო ერთმა მონაწილეობა შეწყვიტა.

FDA-ს განცხადების მიხედვით, საერთო პასუხის მაჩვენებელი 43,2% იყო, ხოლო პასუხამდე დროის მედიანა 4,9 კვირად განისაზღვრა. პასუხის ხანგრძლივობის მედიანა 6 თვე იყო (95% სანდოობის ინტერვალი, 4,6 თვიდან განუსაზღვრელამდე). იმ პაციენტების 39%-ს, რომლებმაც მკურნალობას უპასუხეს, პასუხი 12 თვე ან უფრო დიდხანს შეუნარჩუნდა.

ეს შედეგები აჩვენებს, რომ Tecelra-თი ერთჯერად მკურნალობას სიცოცხლის გახანგრძლივების პოტენციალი აქვს და ამავდროულად მკურნალობაზე მოპასუხე პაციენტებს ქიმიოთერაპიის შეწყვეტის შესაძლებლობას აძლევს.

დანიშვნის ინფორმაცია შეიცავს ჩარჩოში მოთავსებულ გაფრთხილებას მძიმე ან სიცოცხლის დაკარგვის რისკის მქონე ციტოკინების გამოთავისუფლების სინდრომის შესახებ.

ყველაზე გავრცელებული არალაბორატორიული გვერდითი ეფექტები, რომლებიც პაციენტების სულ მცირე 20%-ს აღენიშნებოდა, იყო ციტოკინების გამოთავისუფლების სინდრომი, გულისრევა, ღებინება, დაღლილობა, ინფექციები, ცხელება, ყაბზობა, ქოშინი, ტაქიკარდია, ჰიპოტენზია, დიარეა და შეშუპება. ყველაზე გავრცელებული 3. ან 4. ხარისხის ლაბორატორიული დარღვევები, რომლებიც პაციენტების სულ მცირე 20%-ს აღენიშნებოდა, იყო ლიმფოციტების, ნეიტროფილების, სისხლის თეთრი უჯრედების, სისხლის წითელი უჯრედებისა და თრომბოციტების რაოდენობის შემცირება.

რეკომენდებული დოზა მერყეობს 2,68x10⁹-დან 10x10⁹-მდე MAGE-A4 T-უჯრედული რეცეპტორ–დადებითი T-უჯრედის ფარგლებში. FDA-ს შეტყობინებაში რეკომენდებულია, არ იქნეს გამოყენებული ლეიკოდეპლეციური ფილტრი ან პროფილაქტიკური სისტემური კორტიკოსტეროიდი.

Fierce Pharma-ს მიხედვით, ერთჯერადი მკურნალობის სიის ფასი 727000 დოლარია.