თირკმლის კიბოს 3. და შემდგომი ხაზის მკურნალობისთვის ტივოზანიბმა FDA-ის დამტკიცება მიიღო

10 მარტს, 2020 წელს, სურსათისა და წამლის ადმინისტრაციამ (FDA) ტიროზინკინაზის ინჰიბიტორი ტივოზანიბი(Fotivda, AVEO Pharmaceuticals, Inc.) დაამტკიცა გავრცელებული თირკმელუჯრედოვანი კარცინომის (თირკმლის კიბოს) სამკურნალოდ, რომელიც სისტემური მკურნალობის ორი ან მეტი ხაზის შემდეგ განმეორდა ან მკურნალობის მიმართ რეზისტენტული იყო.
TIVO-3 კვლევა და ტივოზანიბი
ტივოზანიბის ეფექტიანობა შეფასდა რანდომიზებულ, ღია, მულტიცენტრულ კვლევაში, რომელიც ტივოზანიბსა და სორაფენიბს ადარებდა თირკმელუჯრედოვანი კარცინომის მქონე პაციენტებში, რომლებსაც მანამდე სისტემური მკურნალობის ორი ან სამი ხაზი, მათ შორის ერთხელ მაინც VEGFR კინაზის ინჰიბიტორი, ჰქონდათ მიღებული. ეს კლინიკური კვლევა TIVO-3 იყო.
პაციენტები რანდომულად განაწილდნენ ჯგუფებში, რომლებიც დაავადების პროგრესირებამდე (წინსვლა / გაუარესება) ან მიუღებელ ტოქსიკურობამდე იღებდნენ ან ყოველ 28 დღეში ზედიზედ 21 დღის განმავლობაში დღეში ერთხელ პერორალურად 1,34 mg ტივოზანიბს, ან უწყვეტად, დღეში ორჯერ პერორალურად 400 mg სორაფენიბს.
ეფექტიანობის მთავარი გამოსავლის საზომი იყო რადიოლოგიური შეფასების დამოუკიდებელი, ბრმა კომიტეტის მიერ შეფასებული პროგრესირების გარეშე გადარჩენა. ეფექტიანობის სხვა საბოლოო მაჩვენებლები იყო საერთო გადარჩენა და ობიექტური პასუხის სიხშირე.
პროგრესირების გარეშე გადარჩენის მედიანა სორაფენიბით ნამკურნალევებში 3,9 თვე იყო, ხოლო ტივოზანიბის ჯგუფში – 5,6 თვე.
საერთო გადარჩენის მედიანა ტივოზანიბისა და სორაფენიბის ჯგუფებში, შესაბამისად, 16,4 და 19,2 თვე იყო. ობიექტური პასუხის სიხშირე ტივოზანიბის ჯგუფში 18%, ხოლო სორაფენიბის ჯგუფში 8% იყო.
ყველაზე ხშირი არასასურველი ეფექტები (≥ 20%);
- დაღლილობა
- ჰიპერტენზია
- დიარეა
- მადის დაქვეითება
- გულისრევა
- დისფონია (ხმის ფუნქციური დარღვევა)
- ჰიპოთირეოზი
- ხველა
- სტომატიტი (პირის ღრუს ანთება)
ყველაზე ხშირი 3. ან 4. ხარისხის ლაბორატორიული დარღვევები (≥ 5%);
- ნატრიუმის შემცირება
- ლიპაზის მატება
- ფოსფატის შემცირება
ტივოზანიბის რეკომენდებული დოზა
ტივოზანიბის რეკომენდებული დოზაა ყოველ 28 დღეში ზედიზედ 21 დღის განმავლობაში დღეში ერთხელ 1,34 mg, დაავადების პროგრესირებამდე ან მიუღებელ ტოქსიკურობამდე.
FDA-მ ეს განაცხადი დაგეგმილ სამიზნე თარიღზე 3 კვირით ადრე დაამტკიცა. ჯანდაცვის სპეციალისტებმა ნებისმიერი წამლისა თუ მოწყობილობის გამოყენებასთან დაკავშირებული ყველა საეჭვო სერიოზული არასასურველი მოვლენა FDA-ის წამლებზე დაკვირვებისა და ანგარიშგების სისტემას (MedWatch Reporting System) უნდა შეატყობინონ.
ქვემოთ შეჯამებულია თირკმლის კიბოს მკურნალობის ამჟამინდელი ეტაპი და ბოლო მიღწევები
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.