ცხიმის უჯრედები შესაძლოა ქიმიოთერაპიის ეფექტს ამცირებდეს
ამ სტატიაში
მოლეკულური კიბოს კვლევების ჟურნალშიგამოქვეყნებული ახალი კვლევის თანახმად, ცხიმის უჯრედებმა შეიძლება ქიმიოთერაპიის სამკურნალო ეფექტი შეამციროს და მკურნალობის უარესი შედეგები გამოიწვიოს.
წინა კვლევებმა აჩვენა, რომ სიმსუქნე დაავადების მიმდინარეობაზე უარყოფითად მოქმედებს სხვადასხვა კიბოს დროს, მათ შორის ძუძუს, კოლონის (მსხვილი ნაწლავის), საკვერცხისა და პროსტატის კიბოში. თუმცა აქამდე ეს უარყოფითი გავლენა არ უკავშირდებოდა ვარაუდს, რომ ჭარბ ცხიმს ქიმიოთერაპიის ეფექტის შემცირება შეეძლო. ეს კვლევა აჩვენებს, რომ ჭარბმა ცხიმმა შეიძლება სიმსივნურ ქსოვილში ქიმიოთერაპიის უფრო სწრაფი დაშლა გამოიწვიოს.
მკვლევრებმა შეისწავლეს, როგორ ცვლის სიმსუქნე ანტრაციკლინების ჯგუფის ქიმიოთერაპიული პრეპარატის, დაუნორუბიცინის ფარმაკოკინეტიკას [ფარმაკოკინეტიკა ნიშნავს, როგორ ამუშავებს ორგანიზმი წამალს (შეწოვა, განაწილება, გარდაქმნა და გამოყოფა)].
კვლევაში ლეიკემიის (სისხლის კიბოს) უჯრედები ცხიმის უჯრედების შემცველ გარემოში გაამრავლეს, შემდეგ კი დაუნორუბიცინით მკურნალობა სცადეს. ამავდროულად კიბოს მქონე ადამიანებისგან ცხიმოვანი ქსოვილი აიღეს და შეისწავლეს, ახდენდა თუ არა ეს ქსოვილი დაუნორუბიცინის მეტაბოლიზებას (შეცვლა-გარდაქმნას).
კვლევის ძირითადი მიგნებები იყო
- ცხიმის უჯრედების (ადიპოციტების) არსებობამ ლეიკემიის უჯრედებში დაუნორუბიცინის დაგროვება მნიშვნელოვნად შეამცირა.
- ცხიმის უჯრედებმა ქიმიოთერაპია შეიწოვა და ლეიკემიის მიკროგარემოდან მოაშორა. დაუნორუბიცინით ნამკურნალები ლეიკემიის უჯრედები ცხიმის უჯრედების შემცველ ნიმუშებში გადარჩა და უკეთ გამრავლდა.
- ცხიმის უჯრედები დაუნორუბიცინის მეტაბოლიზებას ახდენს. მათში არსებული ფერმენტები ქიმიოთერაპიის მოლეკულის სტრუქტურას ცვლის და მას ლეიკემიის უჯრედებისთვის ნაკლებად ტოქსიკურს ხდის.
რას გვეუბნება ეს კვლევა?
- ახალი და საინტერესო მიგნებაა, რომ ადამიანის ცხიმის უჯრედებს ქიმიოთერაპიის მეტაბოლიზება და გაუვნებელყოფა შეუძლია.
- სიმსივნის მიკროგარემოს მნიშვნელობა კიდევ ერთხელ გამოიკვეთა. განსაკუთრებით შორს წასულ დაავადებაში ახალი მკურნალობის შემუშავებისას კიბოს უჯრედების გარშემო არსებული მრავალი სხვადასხვა ტიპის უჯრედი უგულებელყოფილი ვერ იქნება. მაგალითად, სისხლის კიბოში სისხლის მიმოქცევაში შედარებით მუდმივი და მცირე მიკროგარემოა, ძვლის ტვინში კი — საკმაოდ რთული მიკროგარემო.
- ცხიმის უჯრედებში არსებული ფერმენტები კლინიცისტებსა და მკვლევრებს შეიძლება დაეხმაროს უფრო ძლიერი ქიმიოთერაპიული წამლების შექმნასა და უფრო ეფექტიანი მკურნალობის შეთავაზებაში.
- კვლევამ ასევე ახალი მოსაზრება შემოგვთავაზა იმის შესახებ, როგორ მოქმედებს ჭარბი წონა და სიმსუქნე კიბოს მიმდინარეობაზე უარყოფითად.
დაკავშირებული თემა:
წყაროები
Adipocytes Sequester and Metabolize the Chemotherapeutic Daunorubicin.
Molecular Cancer Research, November 2017
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.