წონის დაკლება კიბოში ახალი სისხლძარღვების წარმოქმნის ცილებს ამცირებს

სიმსუქნე თამბაქოს შემდეგ კიბოს მეორე ყველაზე ხშირი გარემო მიზეზია. თუმცა, როგორც პრევენცირებადი ფაქტორის, მის წინააღმდეგ ბრძოლა იმედისმომცემია. ამავე დროს ეს კვლევების ხშირი სამიზნე სფეროა, რომლის კიბოს გამომწვევი მექანიზმები სრულად არ არის გარკვეული და ზოგი ვარაუდი თეორიად რჩება.

გასულ კვირას გამოქვეყნებული ახალი კვლევა ეფუძნებოდა თეორიას, რომ სიმსუქნის გავლენა კიბოზე ანგიოგენეზის (ახალი სისხლძარღვების წარმოქმნის) გზის ცილებით ხორციელდება, და მნიშვნელოვანი შედეგები აჩვენა.

სიმსივნური უჯრედების მიერ კვებისთვის გამოყოფილი სისხლძარღვოვანი ფაქტორები (PAI-1, VEGF, PEDF ცილები) სიმსივნის უბანში სისხლძარღვებსა და კვებას ზრდის და დაავადების წინსვლას დამატებით ბიძგს აძლევს. იგივე ფაქტორები სიმსუქნის ბუნებრივი შედეგის — ცხიმოვანი ქსოვილის მატების — პირდაპირპროპორციულად იზრდება.

კვლევა ეფუძნებოდა ვარაუდს, რომ წონის კლებასთან ერთად ცხიმოვანი ქსოვილის შემცირება ამ ფაქტორებსაც შეამცირებს და კიბოსგან დაცვაში როლს ითამაშებს. ჰორმონული მკურნალობის არმიმღები, 50-75 წლის, მენოპაუზის შემდგომი 439 ჯანმრთელი ქალი 4 ჯგუფად დაყვეს და 12 თვე სისხლძარღვოვანი ცილების ცვლილებას აკვირდებოდნენ. პირველი ჯგუფი მხოლოდ კალორიული შეზღუდვის დიეტა

12-თვიანი დაკვირვების ბოლოს დიეტისა და ვარჯიშის ჯგუფში PAI-1-ის შემცირება საკონტროლოზე მნიშვნელოვნად მეტი იყო. მხოლოდ დიეტისა და დიეტა-ვარჯიშის ჯგუფებში PEDF და VEGF-ის კლება საკონტროლოსთან შედარებით გამოკვეთილი იყო. დიეტის შემცველი პროგრამებისგან განსხვავებით, მხოლოდ ვარჯიშსა და კონტროლს შორის მნიშვნელოვანი სხვაობა ვერ იპოვეს.

ამრიგად, დიეტისა და წონის კლების სისხლძარღვოვანი ცილების შემცირებასთან წრფივი ურთიერთობა კვლევის ჯგუფს მხარს უჭერს და გვიჩვენებს, რომ სიმსუქნე, რომელიც მომავალში კიბოს უმთავრეს რისკფაქტორად მიიჩნევა, სინამდვილეში პრევენციისას ჩვენს სასარგებლოდ გამოსაყენებელ ფაქტორად უნდა განვიხილოთ და იმედისმომცემ პრევენციულ გეგმებში შევიტანოთ.