Evlərdə istifadə olunan həşərat dərmanları uşaqlar üçün xərçəng riski daşıyır

Böyümə və inkişaf böyük ölçüdə genlərimiz tərəfindən əvvəlcədən planlaşdırılmışdır. Qeyri-kafi qidalanma və xəstəlik kimi səbəblər mane olmazsa, bədəndə böyümə və inkişaf hədəfinə doğru əmin addımlarla irəliləyir. Özümüz və uşaqlarımız üçün daha gigiyenik mühit yaratmaq məqsədilə texnologiyadan da faydalanaraq gətirilən həllər faydaları ilə yanaşı bəzən inkişaf edən insan bədəninə zərər də verə bilər. Evlərdə həşəratlara qarşı istifadə olunan kimyəvi maddələr buna nümunədir. Bunların uşaqlarda bəzi xərçəng növlərinə tutulma riskini artırdığı uşaq sağlamlığı və xəstəliklərinin nüfuzlu jurnalı Pediatrics-də dərc edilmiş tədqiqatla göstərilmişdir.

Uşaq xərçənglərində xəstəliyin səbəblərini, risk amillərini və müalicəyə müsbət töhfə verə biləcək hər addımı araşdırmaq üçün aparılan yüzlərlə tədqiqata yenisi əlavə edilmişdir. Bu günlərdə Pediatricsdə dərc edilmiş tədqiqatın nəticəsində ev kimi qapalı yerlərdə istifadə olunan həşərat dərmanlarına məruz qalan uşaqlarda bəzi xərçəng növlərinə tutulma ehtimalının artdığı müşahidə edilmişdir. Ən çox risk artımı kəskin leykemiya və uşaqlıq çağı limfomalarında görülmüşdür. Digər tərəfdən açıq havada istifadə olunan həşərat dərmanları uşaq xərçəngi riskinin artması ilə əlaqələndirilməmişdir.

Tədqiqatçılar uşaqların bu kimyəvi maddələrə daha həssas olmasının səbəbini qaraciyər inkişafının hələ tamamlanmaması kimi açıqlamışlar. Yəni uşaq qaraciyəri həşəratlara qarşı istifadə olunan kimyəvi maddələrin yaratdığı zəhərli toksinləri kifayət qədər təmizləyə bilmir. Buna görə kiçik uşağı olan ailələrin məcbur qalmadıqca evdə həşərat dərmanı istifadə etməməsi yerində qərar olacaqdır. Dərmanlama etdikdə istifadə təlimatındakı müddət qədər evin bağlı saxlanması və həmin müddətdə evdən uzaq qalmaq lazımdır. Sonra həşərat dərmanlarının evdən uzaqlaşması üçün evi yaxşı havalandırmaq tövsiyə edilir.

Dəyərli dostlarım, unutmayaq! Uşaqlar ən qiymətli varlıqlarımızdır. Onları qorumaq, sağlam və güclü fərd kimi cəmiyyətə qazandırmaq ən mühüm vəzifələrimizdəndir…

Hamınıza uşaqlarınızla birlikdə sağlam və xoşbəxt ömür arzulayıram.