İrəliləmiş mərhələ prostat xərçənginin müalicəsi üçün ilk oral hormon müalicəsi FDA təsdiqi aldı

İrəliləmiş mərhələ prostat xərçəngli xəstələrin müalicəsi üçün ilk oral qonadotropin ifraz etdirən hormon (GnRH) reseptor antaqonisti olan relugolix təsiredici maddəli Orgovyx adlı dərman 18 dekabr 2020-ci ildə ABŞ Qida və Dərman İdarəsinin (FDA) təsdiqini aldı.
Bu təsdiq bu sinif hormonal müalicənin təsdiqlənmiş ilk oral (ağızdan qəbul edilən) dərmanıdır. Beləcə xəstələrin tibb müəssisəsinə müraciət tezliyi azala bilər. COVID-19 pandemiyası dövründə bir çox xəstə haqlı olaraq tibb müəssisələrinə getməkdən çəkinir; yeni dərmanların klinik ziyarətləri azaltmaq potensialı xərçəngli xəstələrin evdə qalmasına kömək baxımından xüsusilə faydalı ola bilər.
2018 Dünya Xərçəng Statistikasına görə hər il 1.28 milyon yeni prostat xərçəngi diaqnozu qoyulur.
Relugolixin təsir mexanizmi necədir?
İrəliləmiş mərhələ prostat xərçənginin əsas müalicəsi prostat xərçənginin böyüməsinə kömək edən kişi hormonlarının səviyyəsini azaltmaq üçün dərmanlardan istifadə edən androgen məhrumiyyəti müalicəsidir. Bu növdə mövcud FDA təsdiqli əvvəlki müalicələr iynə ilə yeridilir və ya dərialtına kiçik implant kimi yerləşdirilir. Relugolix (Orgovyx) qonadotropin ifraz etdirən hormonun (GnRH) reseptorlarına bağlanır və hipofiz vəzinin lüteinləşdirici hormon (LH) və follikulstimullaşdırıcı hormon (FSH) adlı hormonları hazırlamasına mane olur. Beləliklə xayaların istehsal edə bildiyi testosteron miqdarını azaldaraq işləyən ağızdan qəbul edilən müalicədir. GnRH reseptor antaqonisti sinfindən hormon müalicəsidir.
HERO tədqiqatı
Relugolixin təhlükəsizliyi və effektivliyi, radioterapiya və ya əməliyyatdan sonra prostat xərçəngi təkrarlanan, yaxud yeni diaqnoz qoyulmuş metastatik kastrasiyaya həssas irəliləmiş mərhələ prostat xərçəngi səbəbilə ən azı bir il androgen məhrumiyyəti müalicəsi tələb edən kişilərdə aparılmış randomizə edilmiş, açıq etiketli HERO tədqiqatında qiymətləndirildi. 934 xəstə ilk gün 360 mg oral relugolix yükləmə dozası alacaq şəkildə 2:1 nisbətində təsadüfi olaraq 2 qoldan birinə təyin edildi. Ardınca 120 mg gündəlik oral dozalar və ya 48 həftə ərzində hər 3 ayda bir başqa hormon hədəfləyici dərman olan leuprolide asetatın 22.5 mg dərialtı inyeksiyası tətbiq edildi. Məqsəd müalicənin 29-cu günündən sonunadək relugolixin kifayət qədər aşağı testosteron səviyyələrinə (kastrasiya səviyyələri) çatıb-çatmadığını müəyyən etmək idi (testosteron <50 ng / dL).
Relugolix alan 622 xəstədə kastrasiya nisbəti % 96.7 idi.
Yan təsirlər
Relugolixin ən geniş yayılmış yan təsirlərinə istilik basması, qlükozanın artması, triqliseridlərin artması, əzələ-skelet ağrısı, hemoqlobinin azalması, yorğunluq, qəbizlik, ishal və bəzi qaraciyər fermentlərinin səviyyəsinin artması daxildir. Relugolix kimi androgen məhrumiyyəti müalicələri ürəyin elektrik xüsusiyyətlərinə təsir edə və ya elektrolit pozuntularına səbəb ola bilər, buna görə səhiyyə mütəxəssisləri elektrokardioqramların və elektrolitlərin dövri izlənməsini nəzərdən keçirməlidirlər. Heyvanlardakı tapıntılara və təsir mexanizminə əsasən, relugolix hamilə qadına tətbiq edildikdə dölə zərər və hamiləlik itkisi yarada bilər; reproduktiv potensialı olan qadın partnyorları olan kişilərə müalicə zamanı və son relugolix dozasından sonrakı iki həftə ərzində təsirli doğuşa nəzarət üsulundan istifadə tövsiyə olunur.
Mənbələr
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.