Süd vəzi xərçəngi xəstələrində isti basmalarının müalicəsi üçün akupunktur

İsti basmaları xərçəng müalicəsi alan xəstələrdə tez-tez görülən yan təsirlərdəndir. Daha çox qadın xəstələrdə görülsə də, kişilərdə də ola bilər (məsələn, prostat xərçəngi müalicəsi zamanı). Ən çox isə süd vəzi xərçəngi müalicəsi alan qadınlarda görülür. Damar sisteminin təsirlənməsi nəticəsində yaransa da, mexanizmi mürəkkəbdir. Bir çox xəstə çox çətin ola bilən bu vəziyyəti xəstəliyin və ya müalicənin təbii gedişi hesab edərək həkiminə bildirmir. Halbuki isti basmaları çarəsiz deyil; hormonal dərmanlar, hormonal olmayan dərmanlar və tamamlayıcı tibb üsulları daxil olmaqla çoxlu müalicə seçimi mövcuddur.

İsti basmaları menopauzaya girmiş süd vəzi xərçəngi olan hər 3 qadın xəstənin 2-sində görülür. Eyni zamanda bu xəstələrin təxminən yarısında gecə tərləmələri də olur. Süd vəzi xərçəngi olmayan, menopauzaya girmiş qadınlarda isə isti basmalarının tezliyi %20 civarındadır.

- Əlaqəli mövzu: Süd vəzi xərçənginin əlamətləri, mərhələləri və müalicəsi

İsti basmalarının müalicəsi üçün istifadə edilən üsullardan biri də akupunkturdur. Akupunktur isti basmalarını olduqca təsirli şəkildə yüngülləşdirə və beləliklə, həyat keyfiyyətini artıra bilər.

Akupunkturun süd vəzi xərçəngi olan qadınlarda isti basmalarına təsiri

Onkologiyanın ən nüfuzlu elmi nəşrlərindən biri olan Journal of Clinical Oncologyjurnalında mart 2016-cı ildə dərc edilmiş tədqiqatda akupunkturun süd vəzi xərçəngi olan qadınlarda isti basmalarına təsiri araşdırılmışdır.

Yazımızın mövzusu olan tədqiqata süd vəzi xərçəngi olan 190 qadın daxil edilmişdir. İsti basmaları şikayətinə görə bu xəstələrin 105-nə yaxşı dəstəkləyici qulluq, 85-nə isə akupunkturla birlikdə yaxşı dəstəkləyici qulluq tətbiq edilmişdir. 10 ənənəvi akupunktur seansından sonra xəstələr əsas olaraq isti basmaları, ikinci olaraq menopauza şikayətləri və həyat keyfiyyəti baxımından şkalalarla qiymətləndirilmişdir. Tədqiqatın nəticəsində yaxşı dəstəkləyici qulluğa əlavə olaraq akupunktur tətbiq edilənlərdə isti basması balının nəzərəçarpacaq dərəcədə aşağı, həyat keyfiyyətinin isə daha yüksək olduğu müəyyən edilmişdir.

Nəticə

Nəticə olaraq, alternativ və tamamlayıcı tibb tətbiqlərini tamamilə rədd etmək əvəzinə, faydası elmi şəkildə sübut edilmiş, akupunktur kimi xəstələrin həyat keyfiyyətinə müsbət töhfəsi olanları klinik tətbiqlərə inteqrasiya etmək çox düzgün yanaşma olacaqdır.