TrueBeam STx ilə radioterapiya — şüa müalicəsi

Bu gün xərçəngin radioterapiyasında da “hədəfə yönəlmiş şüalandırma” prinsipi əsas götürülür. Şüa müalicəsi texnologiyalarında xərçəngli sahəyə yönələrək sağlam hüceyrələrin minimum zədəsi ilə daha yüksək uğur təmin edilir.

TrueBeam STx onkoloji müalicədə bütün radioterapiya texnikalarını birgə və yüksək səviyyədə istifadə edə bilən yeni nəsil cihazdır. Həm üçölçülü müalicələr (3D-CRT), həm intensivliyi tənzimlənən radioterapiya (IMRT), həm həcmli ARC müalicələri birgə aparıla bilər. Stereotaktik bədən radioterapiyasına (SBRT) da imkan verən cihaz radioterapiyada ən geniş spektrli müalicə imkanı yaradır.

Cihaz xüsusilə stereotaktik xüsusiyyətləri ilə seçilir. Stereotaktik radioterapiyada bir və ya bir neçə seansda yüksək dozalı şüa tətbiq olunur.

Hədəflənmiş şüalandırma texnologiyası

Xərçəngdə ən yeni nəsil şüa texnologiyası TrueBeam STx radiasiya onkologiyasında bədənin hər nöqtəsində şişlərin şüalandırılmasında istifadə edilir. Keçmişdə bu sahədə tanınan Gama Knife və Cyber Knife sistemlərindən fərqli olaraq xəstəyə mühüm üstünlüklər verən TrueBeam STx, radioterapiya və radiocərrahiyyəni birlikdə həyata keçirmə xüsusiyyətinə malikdir. Gama Knife yalnız kəllədaxili şişləri şüalandıra bildiyi halda Truebeam STx həm bunlar, həm bədəndəki bütün şişlər üçün istifadə olunur. Cyber Knife bütün bədənə tətbiq olunsa da, böyük şişləri təsirli şüalandırma xüsusiyyəti yoxdur. Truebeam STx bədənin hər yerindəki böyük şişlərdə də təsirli şüalandırma xüsusiyyətinə malikdir.

Sistem robotik görüntüləmə, avtomatik xəstə yerləşdirmə, hərəkət idarəsi və müalicəni dinamik sinxronlaşdırmaq üçün tam yenidən qurulmuş nəzarət funksiyaları ilə bir çox texniki yenilikdən istifadə edir. Adətən çatılması çətin nahiyələrdəki şişlərin müalicəsində uğurla istifadə olunur. TrueBeam STx-i oxşar texnologiyalardan fərqləndirən yüksək doza sürətinə çataraq daha yüksək dozanı daha qısa vaxtda verə bilməsi, beləcə seans müddətini və sayını mühüm dərəcədə azaldan yüksək performanslı müalicə prosesləri təmin etməsidir.

Şişi aşkarlama və şüalandırma xüsusiyyəti

TrueBeam şişi hədəfləyən, dəqiq yönələn və şişi izləyərək millimetrik şüalandıran sistemlə radioterapiya tələb edən bütün xərçəng növlərində istifadə edilir. Ən böyük xüsusiyyəti müalicədən əvvəl və zamanı alınan 3 ölçülü görüntülərlə şişin yerini müəyyən edib şüaların daim onu hədəfləməsinə imkan yaratmasıdır. Şişlər adətən düzgün formalı deyil. TrueBeam STx şüaları şişin formasına uyğunlaşdırır, beləcə ətraf sağlam toxumanın daha az doza almasını təmin edir.

Müalicə ilə eynivaxtlı görüntüləmə sistemi

TrueBeam STx, tənəffüs izləmə sistemi sayəsində xüsusilə ağciyər, döş, prostat və onurğa nahiyəsi xərçənglərinin müalicəsində böyük fərq yaradır. Xəstə ətrafında daim dönərək verdiyi dozanı görüntüləmə ilə sinxronlaşdıran və şiş hərəkətini nəzərə alıb kompensasiya edən ‘‘Gated’’ RapidArc texnologiyasına da imkan verir. Digər xüsusiyyət müalicə ilə eynivaxtlı görüntüləmə sayəsində şüanın şişi tam hədəfləyib-hədəfləmədiyinin yoxlanmasıdır. Xoşxassəli və bədxassəli beyin şişləri, Akustik Neyrinoma, Kavernoma, Hipoz Adenomaları, Meningioma, Qaraciyər Şişləri / Metastazları, Ağciyər Şişləri / Metastazları, Kraniofaringioma, Pediatrik Beyin Şişləri, Gliomalar, Prostat Xərçəngi, Spinal Şiş / Metastazlar, Trigeminal Nevralgiya, Adrenal Metastazlar, Mədəaltı Vəzi Şişləri, Baş - Boyun Xərçəngləri və Oliqometastazların müalicəsində istifadə edilir.

Eyni vaxtda radioterapiya və radiocərrahiyyə tətbiqi

TrueBeam STx radioterapiya və radiocərrahiyyəni eyni platformada həyata keçirərək digər radioterapiya cihazlarından üstünlük təmin edir. TrueBeam ocaqlı radioterapiya adlanan radiocərrahiyyə xüsusiyyəti ilə 3 santimetrdən kiçik şişləri məhv etməyə yönəlmiş müalicə aparır. Radiocərrahiyyə bəzi şişlərdə cərrahiyyəyə alternativ tətbiq edilir.

Qısa müalicə müddəti

TrueBeam STx müalicə müddətlərini qısaldaraq xəstəyə daha çox rahatlıq verir, çox qısa dozagöndərmə zamanı şiş hərəkətlərinə daha az vaxt qoyaraq daha dəqiq şüalandırır. Normalda 10-15 dəqiqə çəkən intensivliyi tənzimlənən radioterapiya 5 dəqiqədən az vaxtda aparıla bilər. 40 dəqiqədən 2 saata qədər çəkən mürəkkəb radiocərrahiyyə də 5 ilə 20 dəqiqədə tamamlana bilər.