Xərçəng xəstəsinin məmnuniyyəti tibb bacılarının yaxşı koordinasiyası ilə təmin edilə bilər

Xərçəng xəstələrinə onkologiya tibb bacıları tərəfindən göstərilən koordinasiyalı və fasiləsiz qulluğun həyat keyfiyyətini və xəstə məmnuniyyətini artırdığı Cenevrədə keçirilən 2018 Avropa Ağciyər Xərçəngi Konqresində təqdim edilib.

Bu tədqiqatda araşdırmaçıların əsas məqsədi ağciyər xərçənginə görə müalicə alan xəstələrdə koordinasiyalı işləyən tibb bacılarının fasiləsiz göstərdiyi qulluğun adi qaydada işləyən tibb bacıları ilə müqayisədə konkret fayda verib-vermədiyini müəyyən etmək olub.

Ağciyər xərçəngikişilərdə və qadınlarda xərçəng səbəbli həyat itkilərində ilk yerdədir. İnkişaf edən müalicələrlə əvvəlki dövrlə müqayisədə irəliləyiş əldə edilsə də, xəstəliyin daha yaxşı nəticələri üçün daha yaxşı qulluq lazımdır. Çünki artan müalicə variantları və uzanan müalicə müddətləri ömrü uzatmaqla yanaşı, daha çox yan təsirlərə səbəb olub.

Kombinə edilmiş müalicələri idarə etmək üçün lazım olan çoxprofilli komandalar yaxşı təşkil olunmamış sistemlərdə qulluq prosesinin mürəkkəbləşməsinə gətirib çıxara bilər. Sistem yaxşı təşkil edilməyibsə, daha çox imkanın olması gözlənilənin əksinə olaraq müalicə prosesində həyat keyfiyyətini aşağı sala bilər. Səhiyyə müəssisələri gecikmələr və hətta yanlış məlumatlandırma barədə narazılıqlarla getdikcə daha çox üzləşir. Bütün bunlar xəstələr arasında çaşqınlıq, sıxıntı və uyğunlaşma kimi problemlərə səbəb olur.

Kanadada xəstələri müalicə edən həkimlərlə yanaşı onkologiya tibb bacısı da var. Hər onkologiya tibb bacısının telefon nömrəsi 50 - 60 xəstədə olur və o, onların hər biri ilə müntəzəm məşğul olur.

Onkologiya tibb bacısı xəstələrinin sənədlərini və yeni test nəticələrini izləmək, həkim qəbullarını təşkil etmək kimi vəzifələri yerinə yetirir. Xəstə onu narahat edən şikayətlərini bildirmək üçün zəng etdikdə tibb bacısı birbaşa həkimlə əlaqə saxlayır. Beləliklə, xəstələr təcili yardım şöbəsinə getmədən də qısa müddətdə müdaxilə ala bilirlər.

Monrealdakı Notre Dame Universitet Xəstəxanasında irəli (4-cü) mərhələ ağciyər xərçəngi olan 65 xəstə ilə bu mövzuda bir tədqiqat aparılıb. Xəstələr iki qrupa ayrılıb və hər iki qrupdakı xəstələr məmnuniyyət və həyat keyfiyyəti anketlərini doldurub. Bundan başqa, fasiləsiz qulluq qrupu onkologiya tibb bacılarının rolu ilə bağlı xüsusi bir anket doldurub.

Nəticədə iki qrup arasında həyat keyfiyyəti, fiziki, emosional və funksional məmnuniyyət səviyyələri daxil olmaqla bütün kateqoriyalarda onkologiya tibb bacılarından fasiləsiz qulluq alan qrupun xeyrinə əhəmiyyətli fərqlər bildirilib. Xəstələrin böyük əksəriyyəti anket suallarına cavablarında xəstəliklərinin və müalicənin yan təsirlərinin gedişini daha yaxşı başa düşdüklərini və onkologiya tibb bacılarının mövcudluğunun xərçəng proseslərində onlara daha çox güc verdiyini qeyd edib.

• Xəstə maarifləndirilməsi keyfiyyətli xərçəng müalicəsinin ayrılmaz hissəsinə çevrilib