3 ათასი პაციენტის დიდ კვლევაში ასპირინი ძუძუს კიბოს სამკურნალოდ ეფექტიანი არ აღმოჩნდა
ამ სტატიაში
ასპირინი გავრცელებული პრეპარატია, რომელსაც ისტორიულად მრავალი დაავადების სამკურნალოდ და პრევენციისთვის იყენებდნენ. ის განსაკუთრებით გულ-სისხლძარღვთა დაავადებებსა და ზოგიერთი კიბოს ტიპზე დადებითი გავლენითაა ცნობილი. ძუძუს კიბოს მსგავსი გავრცელებული და მძიმე დაავადების მკურნალობისას ასპირინის შესაძლო სარგებელს დაკვირვებითი კვლევები უჭერდა მხარს. თუმცა ეს სარგებელი პროსპექტულ, ანუ წინმსწრებ, კვლევებშიც უნდა დადასტურდეს. ამ კონტექსტში JAMA-ში გამოქვეყნებულმა კვლევამ მაღალი რისკის არამეტასტაზური, ადრეული სტადიის, ძუძუს კიბოს მქონე პაციენტებში ასპირინის გავლენა დაავადებისგან თავისუფალ გადარჩენაზე შეისწავლა. შედეგები ამ მკურნალობის ეფექტიანობის შესახებ მნიშვნელოვან კითხვებს აჩენს.
კვლევის დეტალები
დოქტორ Wendy Y. Chen-ისა და გუნდის მიერ ჩატარებული, JAMA-ში გამოქვეყნებული III ფაზის Alliance A011502 კვლევის შუალედურმა ანალიზმა აჩვენა, რომ მაღალი რისკის არამეტასტაზური ძუძუს კიბოს დროს ადიუვანტური ასპირინი პლაცებოსთან შედარებით ინვაზიური დაავადებისგან თავისუფალ გადარჩენას არ აუმჯობესებდა. უშედეგობის გამო კვლევა ადრე შეწყდა.
ადიუვანტური მკურნალობა დამატებითი მკურნალობაა, რომელიც ძირითად მკურნალობას მხარს უჭერს და მის ეფექტიანობას ზრდის. კიბოს დროს ოპერაციის, ქიმიოთერაპიის ან სხივური თერაპიის შემდეგ გამოყენებულ მედიკამენტებს ადიუვანტურ მკურნალობას უწოდებენ.
ინვაზიური დაავადებისგან თავისუფალი გადარჩენა ნიშნავს პერიოდს, როდესაც პაციენტი ცოცხალია ისე, რომ კიბო სხეულის სხვა უბნებში არ ვრცელდება, ანუ ინვაზიური არ ხდება. ეს საზომი კიბოს მკურნალობის ეფექტიანობის შესაფასებლად გამოიყენება.
მნიშვნელოვანი მიგნებები
- კვლევის სტრუქტურა: 2017 წლის იანვრიდან 2020 წლის დეკემბრამდე აშშ-ისა და კანადის ცენტრებიდან 3020 პაციენტი შემთხვევითად განაწილდა ასპირინის 300 mg დღეში ერთხელ (1510 პაციენტი) ან პლაცებოს (1510 პაციენტი) მისაღებად. პაციენტებს ყველა ადგილობრივი მკურნალობა და ქიმიოთერაპია დასრულებული უნდა ჰქონოდათ; ენდოკრინული მკურნალობის გაგრძელება ნებადართული იყო. პირველადი გამოსავალი ინვაზიური დაავადებისგან თავისუფალი გადარჩენა იყო.
- პირველი შუალედური ანალიზი: მონაცემებისა და უსაფრთხოების მონიტორინგის კომიტეტმა პირველი შუალედური ანალიზისას კვლევის შეწყვეტა ურჩია მას შემდეგ, რაც ინვაზიური დაავადებისგან თავისუფალი გადარჩენის საფრთხის თანაფარდობამ (HR) უშედეგობის დადგენილ ზღვარს გადააჭარბა. დაკვირვების მედიანური ხანგრძლივობა 33,8 თვე იყო (დიაპაზონი = 0,1–72,6 თვე). ამ ანალიზში ინვაზიური დაავადებისგან თავისუფალი გადარჩენის მოვლენები ასპირინის ჯგუფში 141, ხოლო პლაცებოს ჯგუფში 112 პაციენტს ჰქონდა (HR = 1,27, 95% ნდობის ინტერვალი [CI] = 0,99–1,63, P = 0,06).
- გადარჩენის მონაცემები: ასპირინისა და პლაცებოს ჯგუფებს შორის ინვაზიური დაავადებისგან თავისუფალი გადარჩენის მოვლენების განსხვავება სტატისტიკურად მნიშვნელოვანი არ იყო. ასპირინის ჯგუფში გარდაიცვალა 63, ხოლო პლაცებოს ჯგუფში 52 პაციენტი (HR = 1,19, 95% CI = 0,82–1,72, P = 0,36). სულ 81 სიკვდილი ძუძუს კიბოს უკავშირდებოდა: 46 ასპირინის, ხოლო 35 პლაცებოს ჯგუფში.
- გვერდითი ეფექტები: ≥ 3 ხარისხის გვერდითი ეფექტები ასპირინის ჯგუფის 9,3%-სა და პლაცებოს ჯგუფის 10,2%-ში გამოვლინდა. ორივე ჯგუფში ყველაზე ხშირი გვერდითი ეფექტი სისხლძარღვოვანი მოვლენები იყო (1,8% და 1,5%). გვერდითი ეფექტების გამო დოზა 100 mg-მდე შემცირდა ასპირინის ჯგუფის 2,3%-სა და პლაცებოს ჯგუფის 2,2%-ში.
დასკვნა
მკვლევრებმა აღნიშნეს, რომ მაღალი რისკის არამეტასტაზური ძუძუს კიბოს მქონე მონაწილეებში ყოველდღიურმა ასპირინმა ადრეული დაკვირვების პერიოდში ძუძუს კიბოს რეციდივის ან გადარჩენის რისკი არ გააუმჯობესა. ამიტომ, მიუხედავად გავრცელებისა და ხელმისაწვდომობისა, ასპირინი ძუძუს კიბოს ადიუვანტურ მკურნალობად არ უნდა იყოს რეკომენდებული.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.