4. სტადიის კუჭის კიბოს მქონე პაციენტებისთვის შექმნილი ახალი ანტისხეულოვანი პრეპარატი სიცოცხლეს მნიშვნელოვნად ახანგრძლივებს: ASCO 2016
ამ სტატიაში
ამ დღეებში ჩიკაგოში მიმდინარე ASCO 2016 კონგრესზე, მსოფლიოში კიბოს ერთ-ერთ უმთავრეს შეხვედრაზე, წარდგენილმა კვლევამ მეტასტაზური (4. სტადიის) კუჭის კიბოს მკურნალობის იმედი გააჩინა. ამ კვლევის შედეგების მიხედვით, თავის კლასში პირველმა ანტისხეულმა IMAB362-მა სტანდარტულ ქიმიოთერაპიასთან შედარებით მედიანური გადარჩენა 8,4 თვიდან 13,2 თვემდე გაზარდა.
ამ მკურნალობაში სამიზნეა კუჭის სიმსივნეებში უხვად არსებული ცილა claudin-18 (CLDN18.2). კლაუდინები ცილების ოჯახია, რომელიც უჯრედებს შორის მჭიდრო კავშირებში (tight junctions) მონაწილეობს. ახალი მკურნალობით ყველაზე მეტი სარგებელი იმ პაციენტებმა მიიღეს, რომელთა სიმსივნეებში ეს ცილა ყველაზე მაღალი კონცენტრაციით აღმოჩნდა.
ევროპული II ფაზის FAST კვლევის შედეგების მიხედვით, 4. სტადიის კუჭის კიბოს მქონე პაციენტების დაახლოებით ნახევარში ცილა CLDN18.2 უხვადაა და მოსალოდნელია, რომ ეს პაციენტები ახალი მიზნობრივი ანტისხეულოვანი მკურნალობით სარგებელს მიიღებენ. ასევე აღინიშნა, რომ ეს ცილა ჯანმრთელ კუჭის ქსოვილებში არ არის; ამგვარად, სხვა მიზნობრივი, ე.წ. ჭკვიანი პრეპარატების მსგავსად, მკურნალობის გვერდითი მოვლენების საკმაოდ მცირე სიხშირეს მოელიან.
როდესაც ანტისხეულები უჯრედის ზედაპირზე არსებულ CLDN18.2-ს უმიზნებს, სხვადასხვა უჯრედული და იმუნური პასუხი ვითარდება და ანტისხეულებით დაფარული კიბოს უჯრედები იღუპება. ეს უჯრედული პროცესები ცნობილია, როგორც ანტისხეულზე დამოკიდებული უჯრედებით განპირობებული ციტოტოქსიკურობა და კომპლემენტზე დამოკიდებული ციტოტოქსიკურობა.
FAST კვლევა
კუჭის კიბო მსოფლიოში ყოველწლიურად დაახლოებით 1 მილიონ ახალ პაციენტში ვლინდება და სიხშირით 5. კიბოა. 4. სტადიის კუჭის კიბოს სტანდარტული საწყისი მკურნალობა ქიმიოთერაპიაა. მკურნალობაზე მიზნობრივი პრეპარატის ტრასტუზუმაბის (Herceptin) დამატება სასარგებლოა, თუმცა Herceptin მხოლოდ HER2-დადებითი სიმსივნეების დროს გამოიყენება და კუჭის კიბოების მხოლოდ დაახლოებით %15 არის HER2-დადებითი.
კვლევაში ჩაერთო შორსწასული, ანუ მეტასტაზური ან განმეორებითი კუჭისა და გასტროეზოფაგური შეერთების კიბოს მქონე 161 პაციენტი. მათ სიმსივნურ ნიმუშებში CLDN18.2 გარკვეულ დონეზე მაღალი იყო. ისინი შეირჩნენ პაციენტებიდან, რომლებსაც მეტასტაზური კუჭის კიბოსთვის ადრე არავითარი მკურნალობა არ ჰქონდათ მიღებული და HER2-ზე მიმართული ტრასტუზუმაბით მკურნალობისთვისაც არ გამოდგებოდნენ.
პაციენტები 2 ჯგუფად დაყვეს;
- ერთ ჯგუფს მხოლოდ სტანდარტული ქიმიოთერაპია — ეპირუბიცინი, ოქსალიპლატინი და კაპეციტაბინი — ჩაუტარდა,
- მეორე ჯგუფს კი ქიმიოთერაპიასთან ერთად IMAB362 მიეცა.
კვლევის შედეგები
მხოლოდ ქიმიოთერაპიასთან შედარებით IMAB362-მა დაავადების პროგრესიამდე (გაუარესებამდე) მედიანური დრო 4.8 თვიდან 7.9 თვემდე, ხოლო საერთო გადარჩენის მედიანა 8.4 თვიდან 13.2 თვემდე გაზარდა. CLDN18.2-ის უმაღლესი დონის მქონე პაციენტებში საერთო გადარჩენა 16.7 თვე იყო, ამავე ჯგუფში მხოლოდ ქიმიოთერაპიის გამოყენებისას კი ეს დრო 9 თვე აღმოჩნდა.
საბოლოოდ, ამაღელვებელია იმის დანახვა, რომ იმუნოთერაპია კუჭის კიბოს დროს მოქმედებს. ასევე აღმოჩნდა, რომ ცილა CKDN18.2 კუჭის სიმსივნის გარდა სხვა სიმსივნეებშიც ფართოდაა გავრცელებული. როგორც ჩანს, მომავალ პერიოდში ამ უჯრედის ზედაპირული ცილისა და მასზე მოქმედი პრეპარატების სახელს ხშირად გავიგონებთ. ამასთან უნდა აღვნიშნოთ, რომ ეს ახალი მკურნალობა რუტინულ პრაქტიკაში ჯერ არ დამკვიდრებულა, შედეგები წინასწარია და ამჟამად იგი მხოლოდ იმედისმომცემია.
წყაროები
FAST: An international, multicenter, randomized, phase II trial of epirubicin, oxaliplatin, and capecitabine (EOX) with or without IMAB362, a first-in-class anti-CLDN18.2 antibody, as first-line therapy in patients with advanced CLDN18.2+ gastric and gastroesophageal junction (GEJ) adenocarcinoma.
2016 ASCO Annual Meeting. Abstract No: LBA4001
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.