4-cü mərhələ mədə xərçəngli xəstələr üçün hazırlanmış yeni anticisim dərmanı yaşamı nəzərəçarpacaq uzadır: ASCO 2016

Bu günlər Çikaqoda keçirilən, dünyanın aparıcı xərçəng toplantısı ASCO 2016 Konqresində təqdim olunan tədqiqat metastatik (4-cü mərhələ) mədə xərçəngi müalicəsinə ümid verib. Sinfində ilk anticisim IMAB362 standart kimyaterapiyaya nisbətən median sağqalımı 8,4 aydan 13,2 aya yüksəldib.

Müalicədə mədə şişlərində çox olan claudin-18 (CLDN18.2) zülalı hədəflənib. Klaudinlər hüceyrələrarası sıx birləşmələrdə (tight junctions) işləyən zülal ailəsidir. Şişində ən çox zülal tapılanlar ən çox faydalanıb.

Avropa faza II FAST nəticələrinə görə 4-cü mərhələ xəstələrinin təxminən yarısında CLDN18.2 çoxdur və yeni hədəfli anticisim müalicəsindən faydalanacaqları proqnozlaşdırılır. Zülalın sağlam mədə toxumasında olmadığı da bildirilib; bununla digər ağıllı hədəfli dərmanlar kimi yan təsirlərin az olması gözlənilir.

Anticisimlər səthdəki CLDN18.2-ni hədəflədikdə müxtəlif hüceyrə və immun cavablar yaranıb anticisimlə örtülmüş xərçəng hüceyrələrini öldürür. Proseslər anticisimdən asılı hüceyrə vasitəli sitotoksiklik və komplementdən asılı sitotoksiklik adlanır.

FAST tədqiqatı

Mədə xərçəngi dünyada ildə təxminən 1 milyon yeni xəstə ilə 5-ci ən çox xərçəngdir. 4-cü mərhələdə standart ilkin müalicə kimyaterapiyadır. Hədəfli trastuzumab (Herceptin) əlavəsi faydalı olsa da, yalnız HER2-müsbət şişlərdə istifadə edilir və mədə xərçənglərinin təxminən %15-i HER2-müsbətdir.

Tədqiqata irəliləmiş, yəni metastatik və ya təkrarlamış mədə və qastroezofageal birləşmə xərçəngli 161 xəstə daxil edilib. Şiş nümunələrində CLDN18.2 müəyyən həddən yüksək olub. Əvvəllər metastatik mədə xərçəngi müalicəsi almayan və HER2-hədəfli trastuzumaba uyğun olmayanlardan seçiliblər.

Xəstələr 2 qrupa ayrılıb;

• birinə yalnız standart epirubicin, oxaliplatin və capecitabine kimyaterapiyası,
• digərinə kimyaterapiya ilə IMAB362 verilib.

Tədqiqatın nəticələri

Tək kimyaterapiya ilə müqayisədə IMAB362 median proqressiyaya (pisləşməyə) qədər vaxtı 4.8 aydan 7.9 aya, median ümumi sağqalımı 8.4 aydan 13.2 aya uzadıb. Ən yüksək CLDN18.2-li xəstələrdə ümumi sağqalım 16.7 ay, bu qrupda yalnız kimyaterapiya ilə 9 ay olub.

Nəticə olaraq immunoterapiyanın mədə xərçəngində işləməsini görmək həyəcanvericidir. CKDN18.2 zülalının başqa şişlərdə də geniş olduğu kəşf edilib. Görünür, qarşıdakı dövrdə bu səth zülalı və ona təsirli dərmanların adını tez eşidəcəyik. Lakin yeni müalicənin hələ rutin praktikada olmadığını, ilkin nəticə və hazırda yalnız ümidverici olduğunu deməliyik.